STENBOL - Hemverê qedexeyê qeymeqamtî yê seba "Nobeta Edaletî" ya verê Edliyeyê Stenbolî, keyeyê tepişteyan reaksîyon ramojnayî û vatî, ê do qedexeyan nas nêkerê, kes nêeşkeno vernîya înan pado.

 

Zîndananê bajaran ê Vakurê Kurdistanî û Tirkîya de nêheqî, şîdet, teda, zordestî dewam kenê. Heqê tepişteyan yenê binpaykerdiş û tepişteyî nînê tedawîkerdiş. Pêwa rewşa giran yê tepişteyan zî, terkê mergî ameyê kerdiş. Eynî wextî de zî tepişteyê ke cezaya înan qedîyaya û nînê veradayîş zî paweyê veradayîşê xo. Hemverê na rewşe de keyeyê tepişteyan Amed, Wan, Îzmîr û Stenbol de nobetê edaletî dewam kenê. Nobeta Edaletî ya Stenbolî her hewte roja panşeme verê berê Edlîyeyê Stenbolî yê Çaglayanî de yena girewtiş. La hewteyê vîyarte de nobete bi bahaneyê qedexeyê çalakîyan ê seba 15 rojan ê Qeymeqamtîya Kagithaneyî ra ame astengkerdiş.

 

Keyeyê tepişteyan ke nobete gênê hemverê nê vejîyayî û dayî zanayîş ke do nobete dewam bikerê.

 

'Ma astengî, destbendkerdiş û qedexeyan ra nêtersenê'

 

Dadîya tepişteyê bi nameyê Yakûp Akman ke Zîndanê Sîlîvrî de yeno tepiştiş, Fincê Akman dîyar kerd ke ê nêtersenê û vat: "Sebebê destbendkerdişan zî tersnayîşê dadîyan bi. Bi nê wazenê çalakî nêro kerdiş. Ma astengî, destbendkerdiş û qedexeyan ra nêtersenê. Ma do hewteyê bêro zî  çalakîya xo dewam bikerê. Vanê ke  'tîya qedexe yo meyerê tîya.' Ma heta amancê xo bi ca nêarê ma do fek çalakîya xo ra vera nêdê û qedexeyan nas nêkerê."

 

'Ganî ma hîna zêde wayîrê tutanê xo vejîyê'

 

Fince, dîyar kerd ke ê heqanê tutanê xo pawenê û vat: "Dewlete vana, 'tutanê xo wayîr mevîjîyê. Eke merdî zî wa bimirê, ma çi bîyarê sereyê înan zî ganî şima vengê xo nêkerê.' Lazim o ma vera nê vatişan tewr zêde wayîrê tutanê xo vejîyê.  Ma bi çimanê xo vînenê ke zîndanan de cenazeyê tutanê ma vejênê. Seba ke cenazeyê tutanê ma zîndanan ra nêvejîyê ma na çalakî kenê. Wa keyeyê tepişteyan nêtersê. Ma zî nêtersenê ke ma sereyê xo bitewênê do tewr zêde serê ma de bêrê. Wa heme kesê wayîrê wijdanî roja panşeme bêrê verê berê Çaglayanî de nobeta ma rê wayîr vejîyê û paştdayîş bidê ma."

 

'Ê çek zî bidê sîneyê mi, ez o nêtersî'

 

Waye tepişteyê bi nameyê Selîm Çîftçî Cemîle Çîftçî zî astengkerdişê nobeta înan û destbendkerdişê înan ard vîr û vat: "Ê çiqas vanê, 'qedexe yo û meyerê tîya zî.' ma do şêrê û  çalakîya xo bikerê. Ma nêeşkenê tena deqeyêke zî vinderê. Tut, pî, bira û merdimê ma zîndanan de nêweşê û verê mergî de yê. Ma mecbûr ê şêrê înan rê wayîr vejîyê. Ê çek zî bidê sîneyê mi, ez o nêtersî. Heta ke halê mi weş bo, ê mi bikerê gor zî ez fek na dewa ra vera nêdana. Ganî tu kes fek na dewa ra vera nêdo. Ma nêvindenê û kes nêeşkeno vernîya ma bigîro. Ez tena zî bimanî, ez o na çalakî dewam bikerî. Ez zî seba edaletî şina nobete. Vanê, 'meyerê wayîrê tepişteyan mevejîyê.' Ma êdî nêwazenê zîndanan ra cenazeyî vejîyê."

 

'Wa heme kes wurzo serê lingan'

 

Cemîle tewr peyîn wina veng da: "Wa keye, avûkat, parlementer û sazgehê komelî heme kes wurzo serê lingan. Wa têkoşînê ma girs bibo û heme dinya çalakîya ma bivîno. Heta çareserî nêro ma do bi nê caardişan çalakîya xo dewam bikerê."