Medya Uren

 

 AMED - Embazê rojnamegere Evîn Buldan ke 2yê Nîsana 2017 de dinyaya xo bedilnaye derheqê ci de qisey kerdî û vatî: "Çîyo ke têkoşînê Evîne ma rê kerd mîras zî heskerdişê aye meslegê ci bi. Bi 5 serrî yo mabêne ma de yaç Ma aye bi hesret yad kenê."

 

Edîtora rojnameya rojane ya Kurdî Rojeva Medya ke bi KHK amebî padayîş, Evîn Buldan 2yê Nîsana 2017 de ver bi şan de verê keyeyê xo de netîceyê krîzê qelbî de dinyaya xo bedilnaye. Evîna 27 serrî ke hemverê surgun, qirkerdiş û tedayan kultur û ziwan de israr kerd.  Serê şehadetê Evîne ra 5 serrî derbaz beno, hemrayê ci yê karî aye her tim anê xo vîr û vanê ke aye seba rayîrê ma roşnayîyêke ya.

 

'Kurdewar bî'

 

Nevîn Alkan destpêkê qiseykerdişê xo de qalê şexsê Evîne kerd û vat: "Evîne hetê kar û xebatanê xo de zaf serkefte bî. Seba ke evîndarê rojnamegerîya kurdî bî. Bi taybetî zî têkilîyaê aye yê kurdewarî yê vatişî bi. Nînan ra nimûneyê tewr sereyîn o bi ke qet tirkî qisey nêkerdêne. Tim ziwanê kurdî de bi israr bî. Sey her kurdî zî hemverê hêzê serdestî de wayîrê reaksîyon bî û cuya xo ya rojane de zî nê reaksîyonê xo ramojnayîne. Bi taybetî tena qiseykerdişê bi kurdî zî reaksîyonêk pîl bi. Seba nê şexsêke aye ya cîya û  balkêş estbi."

 

'Tewr peyîn mi rîyê aye bî huyayîş dî'

 

Nevîne roja şehadetê Evîne ard vîr û vat: "Roja şehadetê aye de ez bi destûr bîya, vernîya rojêke ma yewbînan dîbi. O wext zî aye nobedara sazgehî bî. Aşxane de pakitî kerdêne û mi ci ra xatir waştibi. Aye tim rîgeş û kêfweş bî. A roje biyarîye mi ra vat, 'Keyf keyfê to yo, siba dora to ya û disibayî zî dora min a ez o  bi destûr bî'. Roja destûr zî embazî xebere danê û vanê Evîne nêweş kewta û ma nêweşxane de yê. Çi heyf cayê ke krîzê qelbî derbas kena uca de dinyaya xo bedilnena û ma nêresenê ci."

 

'Ma hewl danê qelema Evîn Buldan erd de nêverdê'

 

Nevîne tewr peyîn wina vat: "Merdişêk rew bi. Merdiş hîn kesan nîno û nê kesan ra yewe zî Evîne bî. Rîyê aye bi huyayîş vîrê ma ra nêşî. Vernîya ke Evîne bikewo zere, vengê huyayîşê aye ameyîne. Heskerdişê aye ya cuye zerrîya aye de pîl bi û qet bawerîya kesî bi merdişê aye nêame. Dimayê aye bêvengîyêke pîl sazgeh de virazya. Xora rojname bi KHK ame padayîş û sey dewamê xo bi Xwebûn dest bi weşan kerd. Ma nika reyna xebata xo kenê. Ma hewl danê ke têkoşînê ci gane verdê. Ma hewl danê qelema ci erd de nêverdê. Seba ke wina merdimêka erjîyaye bî ke tu wext nîna xovîrrakerdiş. Ma do kar û xebatê xo de zî aye bidê ciwîyayîş."

 

'Tena bi kurdî qisey kerdêne'

Dîlan Aydin zî 5in serrgera şehadetê Evîne ard vîr û vat: "5 serrî yo ke Evîne mîyanê ma de nîya. Coka qiseykerdiş serê aye û ganîkerdişî xeylêk zor o. Vîrardişê nê kesan seba ma wezîfeyêke yo. Mi 3 serrî rojnameya rojane ya Kurdî Rojeva Medya ke bi KHK amebi padayîş de bi Evîne dir xebate kerd. Aye wayîrê şexsêke kêfweş, zerrî ra û kelecan bî. Hetê kurdewarî de bi taybetî xeylêk hîsgêr û bisoz bî. Seba nê vindertişê xo aye qet bi ziwanê xerîb qisey nêkerd. Tena bi kurdî qisey kerdêne. Bi taybetî demo ke qalê  şehîdan ameyîne kerdiş aye zaf hesas nêzdî bîne. Girêdayîşê aye bi erjê xo dir zêde bi. No şexsê ci zaf bale antêne serê xo. Her wext zî bala mi antêne serê xo."

 

'Merdimêke xozayî bî'

 

Dîlane dîyar kerd ke Evîne merdimêke xozayî bî û vat: "Evîne embazêke serwext bî. Ruhêke tutî aye dir estbi. Kulturê xo, ziwanê xo nêkerdibi xo vîr ra. Hetêk ra zî sey merdim qalibê xo ra pîlêr bo. Vindertişêk aye wina estbi. Tay zêde qalkerdişê aye ra ma bîne şahidê şert û mercê cuya aye ya bi zehmet. Şert û mercê xidar de pîl bî. Pêwa nê cuye ra hes kerdêne û bi eşqêk pîl ko kerdêne. Merdimêke xozayî bî. Yeno zanayîş ke bi taybetî Tirkîya de merdim rojnamegerêke cinî bo, xeylêk zor o. La cinîyê kurdî şert û mercê zorî de karê xo bi heskerdiş kerdî. Çîyo ke Evîne ma rê kerdo mîras zî heskerdişê meslegê aye bi. Ma aye bi hesret anê vîr."