Medya Uren

 

AMED - Komêke kesî Qazakisatan de hêrişê dewa Kurdan Sovetskoyî ke herêma Tirkistanî ya Qazakistanî de bî kerdî û cinîya kurde Xanim Koçarîevna Rustamova bi îşkence qetil kerdibî. Derheqê hêrişî de ma xo resna zanayîşê newe.

 

Dewa Tugan Ayil (Sovetsko) qezaya Saîram a girêdayê herêma Turkîstanê Qazakîstanî, 25ê Adare de hemverê keyeyê kurdî de hêrişê nîjadperestî ame kerdiş. Netîce de komêke kesî hêrişê keyeyêk kurdan kerdî û cinîya bi nameyê Xanim Koçarîevna Rustamova (66) bi rayîrê şewat û bi îşkence qetil kerdî. 

 

Polîsan gerreyê ciwananê kurdan nêkerd

 

Goreyê zanayîşê ke ma ma dewijanê Sovetskoyî û cîranan ra girewt, vernîya hêrişî zî ciwanê Qazakîstanî hêrişê tutanê kurdan kenê û vatişê nîjadperestî înan ra vanê. Serê seebûtî ra lajê Xanim Koçarîevna zî wazeno ke bikewo mabêne, ey ra zî vatişê nîjadperest yenê vatiş. Serê hêriş û vatişê çewtî de lajê Xanim Koçarîevna zî telefonê polîsan keno û gerre keno. Polîsî nînê cayê serebûtî. Ciwanê Qazakî zî vanê, “Xora polîsî embazê ma yê, şima xerîb ê.' Lajê Xanim Koçarîevna ke wazeno tutanê  kurd hêrişê înan ra xilas bikero, reyna hêriş ci rê yeno kerdiş. Goreyê zanayîşî şer de 2 ciwanê Qazak zî birîndar benê. Nê ser de ê bi komêke girseyî dir hêrişê keyeyê Xanim Koçerîevna kenê. Na girse 10 kesan ra zêdeyêr ê û seba teşqele vejenê, Xanim Koçarîevna peyser şina. Bi hawayêke ber akenê û kewenê zere û rîyê Rostamova bi benzîn veşnenê. Dimayê demêk kilm Rostamova nêweşxane de dinyaya xo bedilnena. 

 

‘Kurdan ra hes nêkenê û nêwazenê'

 

Kesê ke zanayîş da ma seba asayîşê ganê xo name nêda û vat: "Vatiş û nêzdîbîyayîşêkê ke kurdan qij fînenê kenê. Na dewlete ma nêwazena. Xeylêk nîjadperest û faşist ê. Bi taybetî zî kurdan ra aciz ê. Xora seba heskerdişê xo hemverê Tirkîya nîşan bidê, herêma ke ma ci de yê sey Tirkistan bi name kerdê. Hemkarê Tirkîya yê û bi nê hawa zî dişminîyê kurdan kenê. Demo ke babete hêrişkerdişê kurdan bo, vera Qazakistanî sebeb bimusê hetkarî kenê û hêrişê kurdan kenê. Vernîya nika zî hêrişêk bi eynî rengî bî û keyeyê kurdan veşnayî."

 

‘Çapemenîya Qazakistinî serebût nêdî'

 

Eynî kes qiseykerdişê xo wina dewam kerd: "No hêrişo ke serê keyeyê Rostamova Xanim de ame kerdiş, bê guman hêrişêk nîjadperestî yo û nîno qebûlkerdiş. Dewlete bêveng a û çapemeniya înan zî bêveng a. Hende serebûtêk rêze nîyo, cinîyêke kurde ameye qetilkerdiş û qet çapemenî de zî nêvejêno. Dewlete zî sey her hêrişê serê kurdan de ameyo kerdiş, wazena sey şerê mabêne cîranan de nîşa bikerê. Ma nê baş zanê ke no şerê cîranî nîyo, no hêrişê serê kurdan o."

 

‘Ganî heme kurdî vengê ma bieşnawê'

 

Kesê ke nameyê xo nêda tewr peyîn wina vat: “Êdî tehmûlê ma nêmendo. Ma koletîyê înan qebûl nêkenê. Kurdan bêwayîr vînenê. Semedo ke dewlete wayîrê kurdan nêvejêna, êdî problemanê xo zî qal nêkenê. Tena demê weçînayîşan de yenê dewe û ma dir qisey kenê. Sey nişane yewî kurdî ke hetgirê dewlete yo kerdê meclîs. Labelê kes çîyê ke kurdî ciwîyenê, nêano ziwan. Bi sucdarîya  û hêrîşan wazenê ma bêveng bikerê. Kurdan sey şerger û kiştox danê naskerdiş. Ganî her kes vengê ma bieşnawo ma tena nêverdê."