Şehrîban Aslan

 

AMED - Gumanbar Ahmet Bîtgîn hewl dabi ke cinîya ke ey dir zewicnayebî Dîlek Bîtgîn qetil bikero. Serdozgerîya Komare ya Amedî derheqê gumanbar Ahmet Bîtgîn de îdianame amade kerd û cezaya zîndanî ya muebetî waşt.

 

Dîlek Bîtkîn ke Bismilê Amedî de ciwîyayîne, 10ê teşrîna peyêne 2021 de hetê Ahmet Bîtgîn ke ey dir zewicnayebî, bi çeko giran ameye birîndarkerdiş. Eynî roje de gumanbar ame destbendkerdiş û 11ê teşrîna peyêne de ame tepiştiş. Ame dîyarkerdiş ke merdima gumanbarî Pakîze Bîtgîn zî delîlan werte ra wedarnayê. Serê serebûtî dir Serdozgerîya Komare ya Amedî derheqê gumanbarî de sûcê ‘teşebusê qestî kes kiştiş’ û ‘Çekê bê ruhsat û gule girewtiş û serê xo de gernayîş' û derheqê Pakîze Bîtgîn de zî sûcê ‘çinkerdişê delîlan, nimitiş û vurnayîş’ îdianame amade kerd.

 

Gumanbarî Dîleke bi giranî birîndar kerd

 

Îdianameyî de ame dîyarkerdiş ke  10ê teşrîna peyêne 2021 de qezaya Bismilî ya Amedî de gumanbar Ahmet Bîtgîn cinîya ke ey dir zewicnayebî Dîlek Bîtkîn bi çek birîndar kerd û serê îxbarê ke berdê Beşê Lezgîn ê Nêweşxaneyê Dewlete ya Bismilî, cipersayîş ameyo destpêkerdiş. Ame vatiş ke seba tehlukeyê cuya Dîleke aye wedarneyê Nêweşxaneyê Fukulteyê Tipî yê Unîversîteya Dîcleyî.

 

Pêwa nê îdianameyî de ame dîyarkerdiş ke cinîya bi nameyê Pakîze Bîtgîn zî keyeyê ke serebût ame meydan delîl werte ra wedarnayî.

 

Hewl dayî çek binimnê

 

Dozgerî îdianame de dîmenê ke dosya de ca girewtêne, ewnîya û dîyar kerd ke O.B û H. saete 21.08’an de Dîleke berdê nêweşxane û gumanbar zî cayê serebûtî de mendo û hewl dayo çek binimno.

 

Pawitişê camêrdî yê rêze

 

Gumanbar îfadeyê xo de îdia kerd ke Dîleke cinîya ey ya bi mehra fermî ya, di roj vernîya serebûtî mesajêk ci rê ameyo û seba nê bi Dîleke dir munaqeşe kerdo. Gumanbarî îdia kerd ke kênaya ci ameya oda vata ke dadîya ci birîndar a û sûcdarî qebûl nêkerd. Gumanbar bi nê pawitişê, pawitişê ke camêrdê gumanbarî yê her tim vanê, ard hişê merdiman.

 

Gumanbar rayîr da ver

 

Dozgerî îdianame de zî wina ca da îfadeyê Pakîze Bîtgîn: “Pakîze îfadeyê xo de vat, Ahmet birayê mêrdeyê aye yo, şewa serebûtî dayo pacaya înan ro, a zî ber akerd û demo ke ber akerdo kes çin bîyo, mêrdeyê ci Dîleke kerdêne wesayît û serê nê de şîya verê înan. Pakîze îfade de vat, Ahmet ci ra waşto ke nîvînê ke Dîleke ser de bîya, xaliyê erdî wedarne û her ca pak bike û serebût tam fam nêkerda û çîyê ke vato kerda. Pakîze vat, Ahmetî vato ke Dîleke întîxar kerda û sûcdarî qebûl nêkerd.”

 

Bi merdiş tehdîd kerd

 

Nêweşxaneyê Unîversîteya Dîcle de zî îfadeyê Dîleke ame girewtiş û Dîleke dîyar kerd ke têkiliyê gumanbarî bi cinîyêke bîne dir bîyo û nê ser de munaqeşe kerdê, bi çek ameyo verê ci û vato, ‘yan to ra yan tutan ra.' Dîleke dewamê îfadeyê xo de vat, gumanbarî verê çekî dayo ci, hewl daya asteng bikero la birîndar bîya, gumanbar zî oda ra vejîyayo, aye birîndar erd de menda, kênaya ci ameya oda û aye vînaya. Dîleke vat, kênaya ci xebere dana babîyê xo û nîno vîrê aye ke kamî aye ardo nêweşxane.

 

‘Dimayê birîndarkerdişî îşkence kerd’

 

Raporê dermankerdişê edlî yê 25ê teşrîna verêne yê 2021ê yê Nêweşxaneyê Cigêrayîş û Perwerdî yê Gazî Yaşargîl de ame vatiş Dîleke seba serebûtî birîndar bîya û bi mudaxaleyê tibî yê asan no safî nêbeno. Sewbîna îfadeyê Dîleke yê 21ê Kanûna 2021î de zî Dîleke dîyar kerd ke gumanbarî vato, 'xo bikişe' û no qebûl nêkerda, serê nê de gumanbarî dayo piro. Dîleke sewbîna vat ke gumanbar dimayê aye birîndar kerdo, îşkence bi ci kerdo û wina oda ra vejîyayo.

 

Serekê Beşê Zanistî Tipê Edlî yê Nêweşxaneyê Fakulteya Tipî yê Unîversîteya Dîcleyî zî raporê 22ê Teşrîna peyêne 2021 de zî birîna Dîleke bi mudaxaleyêke tibî yê normal çareser nêbîne û cuya ci kewtêne tehluke.

 

Dozgerî cîya cîya ceza waşt

 

Dozgerî netîceyê îfade û delîlê ke ameyê bidestkerdiş, derheqê gumanbarî de sûcê ‘teşebusê qestî kes kiştiş’ û ‘Çekê bê ruhsat û gule girewtiş û serê xo de gernayîş' cezaya muebetî û derheqê Pakîze Bîtgîn de zî sûcê ‘çinkerdişê delîlan, nimitiş û vurnayîş’ 6 mengan heta 5 serran ceza waşt.