Sema Çaglak

 

AMED - Cinîyan bale ant serê rewşa tepişteyê nêweşan, binpaykerdişê zîndanan û dîyar kerdî ke wa heme tepişteyê sîyasî serbest bêrê veradayîş. Sewbîna cinîyan vengdayîşê hîsgêrî kerd û vatî ke ganî şarê ma hemverê rewşa tepişteyan û bi taybetî zî seba tepişteyê nêweşan wurzê serê lingan.

 

Binpaykerdişê heqan ê zîndanan her ke şino tewr zêde beno. Sere de Aysel Tugluk tepişteyê nêweşî ke nêeşkenê bi xo lazimîyê xo bikerê zîndanan de yenê tepiştiş. Tepişteyê nêweşî zîndanan de hucreyê yew kesî de yenê tepiştiş û bi tena sereyê xo dinyaya xo bedilnenê. Tecrîd sere de Îmrali, heme zîndanan de hemverê tepişteyan sey metodêkê îşkence yeno kerdiş. Tepişteyî her roj bi binpaykerdişê heqan ê newe dir rî bi rî manenê. Bi taybetî keyeyê tepişteyê nêweşî û yê ke înfazê înan ameyo veşnayîş hemverê nê binpaykerdişê heqan ê tepişteyan  bi rojano xeylêk bajaran de binê nameyê, "Nobeda Edaletî de" çalakîyan bikerê. Keyeyî vengdayîşê hîsgêrî rayaumumî û selahîyetdaran kenê. La selahîyetdarî bêvengîya xo dewam kenê.

 

Hemverê nê bêvengiya selahîyetdaran reaksîyonê keyeyan û yê şarî roj bi roj zêdeyêr benê. Na çarçewa de ma zî mikrofonê xo dergê cinîyan kerdî. Cinîyê ke derheqê rewşa zîndanan de qisey kerdî, vengdayîşê hîsgêrî kerdî.

 

‘Wa şar seba tepişteyan wurzo serê lingan'

 

Emîne Al vat ke kênaya aye 6 serrî yo tepişte ya û nika zîndanê Bûnyanî yê Qeyserî de yena tepiştiş. Emîne wina vat: "Kênaya mi Gulîstan Al zîndanê Bûnyanî yê Kayserî de tepişte ya. Wa şar êdî bêveng nêmano û seba tepişteyî wurzê serê lingan. Wa heme tepişteyê nêweş û yê ke cezaya înan qedîyaya serbest bêrê veradayîş. Xeylêk tepişteyî bê sûc cezaya muebetê giran înan rê ameyo birnayîş. Ez silamê xo Serek Apo rê şawena û wazena sere de Serek Apo, heme tepişteyê sîyasî azad bibê.”

 

‘Wa Aysel Tûglûk serbest bêro veradayîş'

 

Kîbar Yildiz zî wina vat: “Ma wazenê sîyasetmedarê ma û heme tepişteyê sîyasî serbest bêrê veradayîş. Zîndanan de tepişteyî şert û mercê zehmet de yenê tepiştiş. Tepişteyê edlî vera danê la tepişteyê sîyasî bi bahaneyê veng zîndan de yenê verdayîş û bi hawayê kêfî hemverê înan têgêrenê. Wa Aysel Tugluk ke nêweşîya ci giran a, heme tepişteyî serbest vera bidê û aştî bêro nê welatî.”

 

‘Bi serran o ez nêeşkena lajê xo bivînî'

 

Koçer Ucu zî wina vat: “Ma seba azadîya tepişteyan wareyan de yê. Wa bes zilm bi ma û tepişteyanê ma bikerê. Lajê mi 26 serrî yo zîndanan de yo. Emrê mi pîl o û xeylêk nêweşîyê mi estê. Seba rewşa xo bi serran o ez nêeşkena lajê xo bivînî. Çi heqê înan esto ke nê zulmî bi ma kenê. Ma înan rê se kerdo? Ma wazenê tepişteyan vera bidê û tepişteyê nêweşî wa keyeyê xo de bê."

 

‘Birayê mi 30 serrî yo zîndan de binê zulmî de yo'

 

Lutfîye Kaba zî wina vat: “Birayê mi bi serran o tepişte yo û xeylêk nêweşî zîndan de ro ci peyda bîyê. Tutê ey bi tena manenê. Dadîya mi, pîyê mi û birayê mi ey nêdî dinyaya xo bedilnayî. Sewbîna waya mi zî ey nêdî dinyaya xo bedilnaye. Kesêke birayê mi nêmend û o zî bi serran o zindanan de binê zulmî de yo. Zilmê ke kenê êdî bes o. Birayê mi nêweş o û qelb û mîdeyê xo ra emelîyat bîyo. Sewbîna nêweşîya qelbî ey dir esta."

 

Munevver Kurtay zî wina vat: “Bi hawayê kêfî hemverê zîndanan têgêrenê. Awa germine nêdenê înan, werdê başî nêdanê. Wa nê zulmî peynî bikerê."