Medya Uren - Şîrîn Çinar

 

RIHA - Dadîya Mustafa Dag, Naîme Dag dîyar kerd ke Mustafa seba pîrozbayîyê rojbîyayîşê PKKyî Abdullah Ocalanî her tim bi kelecanêke pîl şîne Amara û vat: "La raywanîya 3in de Mustafa ame qetilkerdiş. Dimayê ey, ez û di tutê ey ma verê xo da Amarayî. Ez wazena wa kelecanê Mustafa yê 4ê Nîsane tu wext nêro xovîrrakerdiş."

 

Bi minasebetê rojbîyayîşê Rayberê PKKyî Abdullah Ocalanî, serra 2009 de bi sloganê, "Raywanîya ver bi ROJî de" rayrayîşêk ver bi dewa Amarayî de ame kerdiş. Hemverê rayrayîşî hêrişêko pîl ame kerdiş. Netîceyê hêrişî de Mahsun Karaoglan (21) û Mustafa Dag (27) ameyî qetilkerdiş û xeylêk kesî birîndar bî. 13 serrî serê qetilkerdişî ra derbas bi.

 

Keyeyê Mustafa û Mahsûnî xeylêk rey muracatê serdozgerîya serekkomarîya Bîrecîkê Rihayî kerdî. La her rey bi bahaneyê "Dosya de kêmî estê" îdaname nêame amadekerdiş. Cipersayîşê ke serra 2009ine ra dewam keno de tena nameyê kesê ke a roje xebityayê û bombaya gazî xebitnayê estê. Lîste de nameyê 85 kesan derbas beno û her rey zî yeno vatiş ke nîno zanayîş ke bombaya gazî hetê kamî ra ameya xebitnayîş.

 

Dadîya Mustafa Dag, Naîme Dag bi wesîleyê ameyîşê 4ê Nîsane û serrgera qetilkerdişê lajê xo ajansê ma rê qisey kerd. Naîme dîyar kerd ke Mustafa pîyê 2 tutan bi û vat: "Bi 13 serrî yo edalet bi ca nêameyo û heqê ma erd de mend. Mustafa her wext rayîrê welatparêzî de bi û heskerdişê ey kurdewarî her tim aver bi. Coka tu zirarê ci nêresa yewî. O zî sey xeylêk kurdî waşt ke seba pîrozbayî şêro Amara."

 

'Cenazeya ey ma ser de amî'

 

Naîme, wina qal kerd: “3 serrî bi ke Mustafa şîne Amara. Her serre zî bi kelecanêk pîl şîne. Vernê de amadekarîya xo kerdêne. Pirsûs ra ver bi Xelfetî û uca ra zî bi rayrayîş  derbasê Amara beno. Şîyayîşê ey 3in de zî zaf bi kelecan û kêyweş bi. Çi heyf ma nêzanayîne o reya peyîn o. O seba pîrozbayî şi û cenaze ma ser de amî."

 

'Mustafa seba welatê xo kewt rayîr...'

 

Naîme, vat Mustafa seba embazanê xo û welatê xo vejîya rayîr û vat: "Bi hezaran kurdê Şengalî, Kobanî de ameyî qetilkerdiş. Ma înan ra qîmetêr nîyê. Derûdorê ma de şehîdî zaf ê. Homa sebir bido dadîyan. Ma hizûr wazenê. Ziwanê xo û kulturê xo wazenê. Amancê ma zî tena aştîye ya."

 

Bi tutanê Mustafayî dir şinê Amara

 

Naîme, dewam de wina vat: "Mustafa her tim vatêne, ez o rayîrê serekî de dinyaya xo bedelnî. Raştî zî wina bi. Dimayê ke Mustafayê mi, tutanê ci zî berdêne Amara. Ma bi xemgînî ney, bi keyweşî şîne. Nika şîyayîşê Amara qedexe yo û ma nêeşkenê şêrê. Eke pîrozbayîyêk bibo ez o reyna bi tutan dir şêrî."

 

‘Wa tim biciwîyê’

 

Naîme tewr peyîn wina vat: “Wa Mustafa tu wext nêro xovîrrakerdiş. Wa a roje zî nêro xovîrrakerdiş. Wa ciwanî reyna 4ê Nîsane de wurzê û pîrozbayî bikerê. Ma wazenê ke şehîdê ma zî bi na wesîle bêrê yadkerdiş û tim biciwîyê. Wa kelecanê Mustafa yê 4ê Nîsane nêro xovîrrakerdiş."