Rojda Aydin

 

ŞIRNEX - Nafîye Kuçuk, serranê 90î de 3 birayê aye yenê qetilkerdiş û di serranê 2015 - 2016î de zî di lajê aye sixnaqê Cizîrî de yenê qetilkerdiş û lajêke ci zî di serra 2017î de yeno tepiştişî. Nafîye pêwa dejê zerrîya xo wina vana: "Ganî bêro zanayene ke heta dalpeyêke gonîya ma bibo ma do serê na rayîrî de bê. Ma Kurd ê û ma serberzê. Ma estê û ma do di her cayî de bê."

 

Nafîye Kuçuk, seke bi hezaran cinîyê Kurdî binê zilm û zordarîya dewlete de rî bi rî mendê aye zî 2 lajê xo Egît û Adil Kuçuk vindî kerdbî, dimayê serrêke, na reyî zî lajê aye Serhat  Kuçuk ame tepiştiş. Nafîye,  ard ziwan ke tu reyî hemverê zilmî de sereçewtîye nêkerda û wina vat: "Heta dalpeyêke gonîya ma bibo ma do serê na rayîrî de bê û fek na dewa ra vera nêdê. Ma Kurd ê û ma serberzê. Ê ma bikişê  û bitepişê  zî ma Kurd ê  û ma nêqedênê ."

 

Serê herdê Kurdistanî de bi hezaran hîkayeyê cinîyanê Kurdan ê ke şibenê yewbînan estê û la heta nika yê ke qet nêameyê vatişî zî estê. Pêwa dej û ezabî cinîyî bi xoverdayîş têkoşîna xo zî her tim mîyanê xoverdayîşî de bîy. Sey cinîyê Cizîrî yê Şirnexî. Cizîrî ya Şirnexî  de 14ê Çileyê 2015î de hemverê wehşetê tarîxêke de xoverdayîş ame nuştiş. Nafîye Kuçuk şahidîya nê wehşetî û xoverdayîşî kerd.

 

Sewbîna Nafîye bi vîrameyîşê xo, rastîya Kurdan ana ziwan. Serranê 90î de 3 birayê aye yenê qetilkerdiş, serra 2015 û 2016î de zî 2 lajê aye sixnaqanê Cizîrî de yenê qetilkerdiş û lajêke aye zî serra 2017î de yeno tepiştiş. Nafîye pêwa dejê zerrîya xo, wazena aştîyêke bêro ca û no zilm û zordarî peynî bibo.

 

'Egît û Adil'

 

Nafîye, di wextê qedexekerdişê vejîyayîşê  kuçeyan ê serranê 2015 û 2016î de Cizîrî de bî û 2 lajê aye; Egît û Adil Kuçuk sixnaqan de ameyî qetilkerdiş. Çiqas ke 6 serrî zî derbas bibo zî Nafîye hema zî ê rojan ciwîyena û eynî dejî ancena. Nafîye wina hîs û fehmê xo ardî ziwan: "Egît û Adil sixnaqanê Cizîrî de bi tewirêke wehşîyî ameyî qetilkerdiş. 2 lajê mi qetilkerdî zerrîya înan rehet nêbî, dima ra lajêke mi tepişt û kerdî zîndan. 2 tutê min ê ke verê mi de yê zî astengdar ê."

 

'Wehşîyîya ke merdim nêeşkeno qal bikero...'

 

Nafîye, zilm û wehşîyîya ke  amî ca, wina ard ziwan: "Banê ma dayî verê topan û tutê ma bêçare mendî ke di sixnaqanê Cizîrî de kom bîyî. Tutê ma bi tewirêke zanabîyaye bi kîmyasalî ameyî veşinayîş. Wexto ke mi asteyê meyîtê lajê xo Egîtî vîna û ê meyîtî kerdî tewreyê çopî... Lajê mi Adil zî bi ganîyî tepiştbî û uca de qetil kerdbî. Vera ke rîyê lajê mi Adil heme bi kardî amebî birnayîş, çimêke ey bi kardî vetbî... Mi bi xo lajê xo wina teşhîs kerd. Laşê lajê mi pêro bi kardî birnabî. Adil û çende embazê ey birîndar tepiştîbî û bi îşkenceyî ê qetil kerdbî. Dima ra ma şi ma meyîtê xo morga Nêweşxaneyî Silopî ra ardî û defin kerdî. Birazayê mi zî di sixnaqa Cizîrî de qetil kerdî. "

 

'Hîrê birayê mi zî ameyî qetilkerdiş'

 

Vêşêrî wehşîyîya hemverê wurdî lajanê aye de,  hîrê birayê Nafîyeye zî serranê 90î de hetê dewlete ra ameyê qetilkerdiş û wina vat: "Vêşêrî wurdî lajanê mi hîrê birayê mi zî serranê 90î de hetê dewlete ra ameyî qetilkerdiş.  Nê birayanê mi ra yew şi teberê welatî krîzê zerrî derbas kerd û ciwîya xo bedilna. Wurdî birayê min ê bînî zî hetê dewlete ra ameyî qetilkerdiş. Zilmê dewlete verî ra heta ewro dewam keno û tu reyî peynî nêbî."

 

'Serhatê mi zî ame tepiştiş'

 

Nafîye, ramojnayîş kerd ke zilm û zordarîyê dewlete dimayê qetilkerdişê 2 lajê aye peynî nêbîyo û wina qisey kerd: "Wurdî lajê mi ameyî qetilkerdiş. Di tutê mi zî astengdar ê, tenî Serhatê mi mendbî. Serhatê mi hem mîyanê xebatê partîye de bî û hem zî ramitox bî. Tu reyî zilm û tehdayê dewlete  yê hemverê ma de peynî nêbî. 11ê  Çileyî yê 2021î  de polîsan eşt serê keyeyî û Serhatê mi destbendkerdî û 17ê Çileyî de zî o şawit Zîndanê Tîpê Tyî yê Şirnexî."

 

'Hem tever de û hem zî zere de zilmêke esto'

 

Nafîye, pêwa hende dej û ezabî nika zerrîya aye seba Serhad o ke amewo tepiştiş dejeno û wina hîsê xo ana ziwan: "Zilm tena zere de nê tever de zî hemverê tutanê ma yê tepişteyan de zî yeno ca. Lajê mi coka şahido nimitkî û vatişê zûreyîn ame tepiştiş. Nika zî muhakemekerdişê ey domneno. Nika zî lajê mi Zîndanê Şirnexî de binê zilmî de yo. Sewbîna wexto ke ma şînê pêvînayîşî zî, zilmêke pîl ro ma kenê ke ma tutanê xo nêvînenê.  Her çîyî kenê behane ke pêvînayîş nêro ca. Sewbîna xo ra zîndan de rewşêke xirab esto û zilm ro tepişteyan kenê. Awa germine çinî  ya, nêeşkenê sereyê xo bişonê, cilanê xo bişonê. Werdêke baş nêdanê,  wexto werd zî danê kemî danê."

 

'Ma bi kiştiş û tepiştişî  nêqedênê'

 

Nafîye ya ke bi serran zilmî dir rî bi rî menda, seke bi hezaran cinîyanê Kurdî, tu  reyî zî fek  xoverdayîş ra vera nêda. Nafîyeye wina peynî ro qiseyanê xo ard: "Dewlete wazena bi zilmî keyeyanê Kurdan bêtesîr bikero. Labelê ganî bêro zanayene ke, heta dalpeyêke gonîya ma bibo ma do serê na rayîrî de bê û ma fek na dewa ra vera nêdanê. Ma Kurdê û ma serberzê. Ê ma bikişê û bitepişê zî ma Kurdê û ma nêqedênê. Ma estê û ma do her cayî de bê. No 40 serrî yo Kurdan kişenê û qetil kenê. La Kurdî tu reyî nêqedênê."