Medya Uren- Şîrîn Çinar

 

RIHA - Cinîyê Rihayî bi wesîleyê 73yîn sergêra rojbîyayîşê Rayberê PKKyî Abdullah Ocalanî hîsê xo pare kerdî û wina vatî: "Ma umîd kenê ke emsar tecrîd peynî bêro kerdiş û ma azadîya Birêz Abdullah Ocalanî bîyarê. Senîn 8ê Adare de û Newroze de ma azadîya Birêz Abdullah Ocalanî waşt, ma do 4ê Nîsane de zî bi eynî waştişî meydanan de bê." 

 

Rayberê PKKyî Abdullah Ocalan bi komployê mîyanneteweyî yê 15ê Sibate ya serra 1999î de teslîmê Tirkîyayî ame kerdiş û 23 serrî yo Zîndanê Tîpê Fyî yê Asayîşê Berzî yê Îmralî de yeno tepiştiş. Polîtîkayê tecrîdî yê girankerde yê  serê Abdullah Ocalanî de wextê teslîmkerdişî ey ra  yê Tirkîyayî ra dewam kena. Keye û pawitoxê ey vera tecrîdê ey ke yeno dewamkerdiş, nê eşkenê ci dir pêvînayîş bikerê û muracatê înan ê seba pêvînayîşî Girawa Îmralî de bi behaneyê pûç û talî yenê redkerdiş. Pêwa qedexeyan wa tecrîd peynî bibo selahîyetdarî bêvengîya xo domnenê. 

 

Rayberê PKKyî Abdullah Ocalan,  o  ke 4ê Nîsane ya 1949î de dewa Amara ya girêdayeyê qezaya Xelfetî ya Rihayî de dadîya xo ra bîyo û rojbîyayîşê ey rê tena çend rojî mendê. Pêwa ke na roje  hetê merdimê ke şinê Amarayî bi girseyî ameyêne pîrozkerdiş, no 6 serrî yo ke, na pîrozîye zî yena manîkerdiş û dewa Amara verî yê na roje, çend rojî hetê polîsan û eskeran ra yena abluka kerdiş. Seba minasebetê na roje Cinîyê Rihayî di 73yîn sergêra rojbîyayîşê Rayberê PKKyî Abdullah Ocalanî de, hîsê xo pare kerdî û vatî: "Roja ma Amara ra  vejêna. Seba azadîya Rayberê xo 4ê Nîsane de ma do meydanan de bê." 

 

'Bî hêz û bawerî' 

 

Fatma Korkmaze destpêkerdişê qiseyanê xo de vat ke Birêz Abdullah Ocalan seba azadîya cinîye wayîrê erjêke muhîm e yo û wina dewam kerd: "No 40 serrî yo dimayîn de cinîyan seba azadîya xo rayîrê dergî û çetinî derbas kerdî û destqezencê pîlî zî  bi dest fînayê. Bi sayeya Birêz Abdullah Ocalanî cinîyan xo naskerd û seba nasnameyêke azadîya zayendî û kulturê xo têkoşîyayî. Cinîyî qalibo ke înan rê ameyo dîyarkerdiş ra vejîyayî  û xo her cayî de cakerd. Sîyasetî ra heta heme wareyan cinîyan bi keda xo, xo ca kerdî. No zî hêze da cinîye ke amancê xo de israr bikero. Yanê Birêz Abdullah Ocalan hem bî hêze hem zî seba serkewtişî bî bawerî. Ma cinîyî vera nê yewî  Birêz Abdullah Ocalanî pawenê û rêze fehmanê ey ra gênê. Duştê êsîrgirewtena ey de zî, ma cinîyî do xo organîze bikerê û seba azadîya ey têkoşîne bikerê." 

 

'Roja ameyîşê wisarî ya' 

 

Fatma tewr peynî rojbîyayîşê Birêz Abdullah Ocalanî pîroz kerd û wina qalê muhîmî ya roje kerd: "Na roje seba ma rojêka muhîm a û bi erj a. Na roje wisar û abîyayîşê vilikan a. Ma wazenê her serre na roje Amara de kom bibê. Her serre bi hezaran merdimî ameyêne Amara û pîrozîye kerdêne. Coka bi behaneyê talî hemverê nê de zî bîyî manî. Verîyê rojbîyayîşî bi rojan  dormeyê qeza û dewa Amarayî gênê. No 23 serrî yo Birêz Abdullah Ocalan zîndan de binê tecrîdî de yo û waştişê ma o yo ke, di 73yîn rojbîyayîşê xo de mîyanê Şarê Kurdî de bo. Ma Şarê Kurdî azadîya ey wazenê." 

 

'Bî felsefeyê azadîye' 

 

Hemîde Goktaşe zî bale ante serê muhîmî ya Rayberê PKKyî Abdullah Ocalanî, seba Şarê Kurdî û wina vat: "Asasê xo de tena nê seba Şarê Kurdî seba heme şaranê bindestan, o bî felsefeyêke  azadî. Tewr muhîme ci zî hetê naskerdişê nasnameyê cinîye de rayîrêk pîl akerd. Xonaskerdiş û bîyayîşê wayîrê nê nasnameyî seba ciwîyayîşê ma xeylêk muhîm a. Ez bi xo zî dima ke mi rêxistine nas kerd apey kewta ferqê xeylêk çîyan. Mi xo û nasnameyê xo yo zayendî naskerd. Gorêyê şuûrîya verî bîyne ma nêeşkabî keye ra vejîyê yan zî mîyanê sîyasetî de ca bigîrê. Coka nika seke ma bi hazeran cinîyê Kurdî dêsê vernîyê xo de yê şikitî û vejîyayî. Tecrîdo ke serê Birêz Abdullah Ocalanî de yeno kerdiş di eynî wextî de serê heme tepişteyê sîyasî û cinîyan de no tecrîd yeno kerdiş. Cinîyê ke destqezencê pîlî bi dest fînayê wazenê dorkerde înan êsîr bigîrê. Yanê beynîkerdişê tecrîdî seba Şarê Kurdî û seba heme Şaranê Rojhelatê Mîyanînî lazimîyêka sereyîne ya. Eke tecrîd bêro peynîkerdiş do krîzê komele û ekonomî zî bêro helkerdiş. Qetlîamê cinîyan do berê manîkerdiş. Ganî ma heme û bi xusûsî zî cinîyê Kurdî wayîr ro rayberî vejîyê. 4ê Nîsane de zî seba aştî ganî ma wurzê serê payan." 

 

'Newroze seba peynîkerdişê tecrîdî bî umîd' 

 

Naîme Bayrame wexto qalê Birêz Abdullah Ocalanî kerd Newroza 2022yîne vîr fîna û vat: "Newroza emsarî seba ma heminan bî umîdêke pîl. Ma xeylêk şa bî. Coka Şarê Kurdî waştişê xo meydanan de ardî ziwan. Ê girseyî  û waştişî, ma rê umîdê peynîkerdişê tecrîdê serê Birêz Abdullah Ocalanî  zêdeyêr kerd. No 23 serrî yo, no tecrîd bê mabên  dewam keno ke waştişê ma yo sereyîn zî peynîkerdişê tecrîdî yo. Coka ke krîzo Tirkîya de yo  yew dimayê yewî yeno û zêdeyêr beno. No krîz têkilîya xo bi problemanê Kurdî, şero yeno kerdiş û tecrîdî dir esto. Lazimo ke seba helkerdişî, berê Îmralî bêro akerdiş. Coka ma vînenê xeylêk merdimî polîtîkayê neyarîya Kurdan danê rayîrşîyayîş. Nêwazenê no problem hel bibo. Coka tu cayê dinya de xeylêke hende humara ey zêde û bê nasname çinî yo. Ma zî seke her kesî ro heqê xo gêrenê. Ma zî ziwanê xo, kulturê xo wazenê." 

 

'Wa bibo wesîleyê azadîya rayberî' 

 

Aslihan Çîftçî zî rojbîyayîşê Birêz Abdullah Ocalanî pîroz kerd û no vengdayîş kerd: "Birêz Abdullah Ocalan seba Şarê Kurdî û seba cinîye erjêke pîl o ke ma sere ra azadîya ey wazenê. No 23 serrî yo bê mabên yeno tecrîdkerdiş û nê çend serrê peynî de zî çi heyf ke bi tu tewirêke malûmat ci ra nîno girewtiş. Ma rewşa ey ra bişikê û ma wazenê lezkî keyeyê xo dir û avûkatanê xo dir pêvînayîş bikero. Azadîya Rayberîye do seba heme şaran bibo rayîrê çareserîye. Newroze de zî Şarê Kurdî no waştişê xo ard ziwan.  Coka ma wazenê 4ê Nîsane de zî şar bi eynî waştişan vejîyê meydanan. Ganî ma seba aştî û azadîya Rayberîye reyêk bîn wurzê serê payan. Lazimo zî cinîyî tewr vernî de seba nê têkoşîne bikerê. Yanê ma emsar bi coşêke pîl 4ê Nîsane pîroz bikerê." 

 

'Ganî tecrîd bêro peynîkerdiş' 

 

Çigdem Karakeçîlî bale ante serê tecrîdî û wina qusey kerd: "Prosesoke  23 serrî yo  Birêz Abdullah Ocalan Girawa Îmralî de yeno tecrîdkerdiş esto. Her ke şî tecrîd ame girankerdiş. Coka girawêke de û bi tenî verdayîş, bi sereyê xo îşkence yo. Ma zerarê tecrîdî vînenê. Sistkerdişê tecrîdî dir serra 2013î de prosesê aştî dest pêkerd. Pêvînayîşêke Birêz Abdullah Ocalanî dir ameyê kerdiş senîn ke benê çareserî, bîyê sembolêke prosesê aştîyî. Tirkîya de cezayê îdamî ameyî wedaritiş, coka bi rayîr û metodê xo yê tecrîdî dir tepişteyan terkê mergî kenê. Eke Tirkîya xo ra vajo ez demokrat a, lazimo ke sere ra problemê ke ma rêz kerdê hel bikero. Heta ke tecrîd bibo, binpaykerdişê heqan bibê û hêrişî serê Kurdan de dewam bikerê, na dewlete nêbena dewletêka demokrate. Lazimo lezkî pêvînayîş bêrê ca û tecrîd bêro peynîkerdiş.  Verpersî û mesajê lazimî Newroze de hetê şarî ra ameyî neqlkerdiş. Ma heme bandêr bîyî ke lazimîya şaran bi aştîyêka mende esta û bi ê bawerîyanê xo vejîyayî meydanan. Wa no tecrîdo ke serê Birêz Abdullah Ocalan  û heme tepişteyanê sîyasîyan de yo bêro wedaritiş. Şar vêşanê edaletî û demokrasîye yo. La zîndanan ra meyîtî vejênê. Ma xusûsî zî wazenê şert û mercê tepişteyê nêweşan bêrê başkerdiş." 

 

'Ma do maydanan de bê' 

 

Çîgdeme wina peynîyê qiseyanê xo ardî: "Ma umîd kenê ke no 4ê Nîsane bibo wesîleyê aştî û azadîyêka mende seba heme şaran.  Vera ke ma bawer ê, o ke aştî bîyaro do Birêz Abdullah Ocalan bo. Fikr û fehmê ey dir do Rojhelato Mîyanîn cîfêke bigîro, ke ma no tewir di prosesê aştîye de zî vîna. Ma 8ê Adare û Newroze de waştişê xo ardî ziwan. Ma do 4ê Nîsane de zî bi eynî waştişan meydanan de bê."