Melîke Aydin 

 

ÎZMÎR - Cinîyê ke Îzmîr de ciwîyenê, reaksîyonê xo hemverê 11 cinîyê ke Amed de ameyî tepiştiş ardî ziwan û vatî: "Hêrişê hemverê cinîyê kurdî, yeno manaya hêrişê hemverê têkoşînê heme cinîyan. Pêwa heme teda û destbendkerdişan têkoşînê cinîyan nîno astengkerdiş."

 

16-17ê adare de Amed de sereştişê keyeyan de 25 cinî ameyî destbendkerdiş û 11 cinî ameyî tepiştiş. Reaksîyonê hemverê tepiştişê cinîyan dewam keno. Mîyan de cinîyê endamê Partîya Demokratîke ya Şaran (HDP) û Komeleya Cinîyan a Rosa û aktîvîstê Tevgerê Cinîyan ê Azadan (TJA) zî bî. Cinîyê Îzmîrî derheqê tepiştişê cinîyan de ajansê ma rê qisey kerdî.

 

'Kurdistan de polîtîkayê şerî yê taybetî' 

 

Vervatoxa Meclîsê Cinîyan ê Kongreya Demokratîke ya Şaran (HDK) Newroz Çetîn bale ant serê polîtîkayê taybet yê hemverê Kurdistanî û vat: "Kurdistan de cinî, ciwanî yê sey Gulistan Doku û Îpek Er, benê hedefê polîtîkayê taybet yê dewleta camêrd. Cinîyê ke heme kodê serdestîyê camêrdan û netew dewlete teşhîr kerd, xo ver da, çareserî awan kerd û hemverê serdestîyê camêrdan têkoşîn kerdî, vengê xo her ware de berz kerdî, îmza eştî xebatê girîng. Cinî sîyasetê herêmî ra bigîrê heta yê pêroyî beşdarbîyayîşêk xurt bi ca ardî û sazgehan de hemserekî û temsîlkarîyê têduşt bidest kerdî."

 

'Hêrişê heme cinîyan kenê' 

 

Newroze tewr peyîn wina vat: "Babeta cinîyan de têkoşînê yewbîyaye esto û no çî seba cinîyan serkewtişo tew girîng o. Rojevê sey 25ê Teşrîna peyêne û 8ê Adare destkewtişê cinîyan îfade kenê. Rastî de her destkewtişê cinî, yeno manaya kewtişê camêrd û hemkaranê ci. Seba nê zî hêrişê cinîyanê kurdan kenê û hêrişê hemverê cinîyê kurdî hêrişê hemverê heme cinîyan û hêrişê hemverê têkoşînê cinîyan de yeno kerdiş."

 

'Ma do verê wayanê xo de bê'

 

Paştdayîşê Mor Cansu Ekmen zî wina vat: "8ê Adare de xeylêk bajarî de cinîyan bi çalakiyê xo no zaf baş  nîşan dayo. Pêwa heme teda û destbendkerdişê têkoşînê cinîyan nêeşkeno bêro astengkerdiş. Ma do tu wext waştiş û heqê xo vera nêdê. Bajarê pîlî yê sey Îzmîr û Stenbolî de teda dewam kena la cinî seknê xo yê bi qerar dewam kenê û ma nê  8ê Adare de vîna. La cayê ke têkoşînê cinîyê kurdî bibo, wayê ma tewr zêde tedayan vînenê. Ma do her tim verê wayanê xo de bê.”

 

‘Ma vînî nêkenê'

 

Meclîsê Cinîyan ê Partîya Keskan û Sol Gelecek ê Îzmîrî Nevîn Aytekîn wina vat: “Kiştox û tecawuzkar serbest ê. Huqûq çin o, Pêkerdişê Stenbolî wayîr vejênê. Heqê nefeqeyê ma destê ma ra gênê. Nîmeyê şewe de bi hawayêke bêhuqûqî 11 cinî yenê destbendkerdiş. Destbendkerdiş û tepiştiş hema dewam keno. Hemverê tepiştişî de ma do têkoşînê xo dewam bikerê. Cinî ciwîyayîş azadî."