ÎZMÎR - Abdurrahman Yildirim ke 17 serreyê xo de ameyo tepiştiş, bi 26 serrî yo tepişte yo. Dadîya ci Vesîle Yildirim dîyar kerd ke do seba lajê xo tewrê Nobeta Edaletî bibo û veng da heme merdimê tepişteyan û welatijê wayîrê wijdanî kerd ke paştdayîş bidê çalakîya înan.

 

Nobeta Edaletî ya Baroyê Îzmîrî bi amancê tahliyekerdişê tepişteyê nêweşî dabî destpêkerdiş mengêke pey xo de verda. Yew kesa ke paştdayîş dana nobede, dadîya tepişteyê nêweşî Abdurrahman Yildirim, Vesîle Yildirim a.  Vesîle vengdayîşê hîsgêrî kerd ke heme welatijî û merdimê tepişteyan paştdayîş bidê çalakî.

 

Vesîle dîyar kerd ke lajê ci nika zîndanê Tîpê T yê Hûmara 3in yê Şakranî de yo û seba parçeyê şarapnelî sereyê ci de esto, bi 26 serrî bi rîskê merdişî dir rî bi rî yo û vat: "Dêrsim de birîndar ame tepiştiş û berdî Elbîstan. Di mengî îşkence ci rê kerdî. Demo ke ame tepiştiş, tutêko 17 serre bi. Demê ez şîya vînayîşê ey serê û çimê ci heme werimnaye bi. Tutê ma tena heqê xo waştî. Vatî nasnameyê ma bibo. Çîyê ke bîn nêwaştî. Wa êdî tutanê ma vejê."

 

‘Hişê ey şino'

 

Vesîle vat, lajê ci 26 serrî yo tepişte yo û zîndananê Konya, Bolu û Anqara de mendo û wina vat: "Demo ke Elbîstan de bi, 4 hebî parçeyê mayîne sereyê ci de mend. Di heban vejenê, yê bînî manenê. Yew ci ra zaf nêzdîyê mezgî yo. Lajê mi  zaf nêweş o. Reyna zerrîya ci qelibyena û hişê ey şino. 26 serrî yo têkoşînê cuye dano. Ganî pêro tepişteyê nêweşî bêrê veradayîş."

 

'Dermankerdiş nîmcet verdayî'

 

Vesîle vat, 10 serrî verê wexto ke lajê ci benê Anqara qezaya trafîkî derbas kenê û mengêke lajê ci koma de maneno û wina qal kerd: "Raporê ey estbi la ma nêzanê se bi. Uca de vatêne nîno dermankerdiş. Dermankerdiş nîmced mend. Yanî zulmêk pîl serê ma de esto."

 

‘Nobeta edaletî seba tutanê ma ya'

 

Vesîle dewam de wina vat: “Ma seba tutanê xo uca de yê. Ma wazenê aştî bêro û tutê ma bêrê veradayîş. Wa yew ciwanêke nêmiro. Seba nê ma hewl danê. Wa tutê ma êdî nêmirê. Wa bêrê veradayîş. La nêweşî bi kêfî nînê veradayîş."

 

‘Ganî her kes paştdayîş bido’

 

Vesîle tewr peyîn wina vat: "Ganî keyeyê heme tepişteyan tewr zêde paştdayîş bidê nobeta edeletî. Çalakî do ancax wina netîce bida. Ma wazenê heme merdimê tepişteyan bêrê. Heme kesê ke kezeba înan veşaya ganî bêrê paştdayîş bidê çalakî."