Marta Somek

 

STENBOL - Hemseraka Pêroyî ya OHDyî Îlknur Alcan dîyar kerd ke bi serrêke yo xebere Rayberê PKKyî Abdullah Ocalan û tepişteyê bîn yê Îmraliyî ra nîna girewtiş û hemverê tecrîdî kewtê tevger. Îlknure dîyar kerd ke seba caardişê aştîye ya komelî, ganî tecrîd wurzo.

 

Rayberê PKKyî Abdullah Ocalan 23 serrî yo zîndanê Tîpê F yê Asayîşê Berzî yê Îmraliyî de binê tecrîdî de yeno tepiştiş û serrêke yo xebere ci ra nîna girewtiş. Pêvînayîşê peyîn 25ê Adara 2021 de ame kerdiş. Dimayê xeberê derheqê Ocalanî de vejîyayî, rayaumumî kewte endîşe û nê ser de selahîyetdarî mecbûr mendî bikewê mîyanê tevger û birayê rêberê PKKyî Mehmet Ocalan bi telefon pêvînayîşêk kerd. Pêvînayîş tena 4 deqeyan dewam kerd.

 

Hewldayîşê avûkatan bênetîce mend

 

Avûkatanê Buroyê Huqûqî yê Asrinî seba pêvînayîş bi ca bêro û zanayîş ci ra bêro girewtiş, xeylêk hewl dayî. La pêwa heme hewldayîşê avûkatan cewab nêame dayîş. Reyna muracatê rêxistina komela sivîl, huqûq û heqî ame kerdiş. Buroyê Huqûqî yê Asrinî de tewr peyîn muracatê, ‘çalakîya lezgîn’ Raportorê Taybetî yê Îşkenceyî yê Neteweyê Yewbîyaye (NY) da.

 

Serrêke de avûkatan 147 û keyeyan zî 49 rey muracat kerd

 

Heto bîn ra Buroyê Huqûqî yê Asrinî 25ê Adara 2021 ra heta nika 147 rey muracatê Serdozgerîya Komare ya Bursayî kerd û ne cewabêke pozîtîf û ne zî negatîf ame dayîş. Reyna keyeyan zî 49 rey muracat kerd.

 

Pêvînayîşê peyîn de îqaz kerdibi

 

Rayberê PKKyî Abdullah Ocalan serrêke verê pêvînayîşê telefonî ke bi birayê xo Mehmet Ocalan dir kerd wina vat: "Seba nê çîyê ke yenê kerdiş hem ti, hem zî dewlete şaşîye kena. Sebebê nê no yo; Bi serrêke  bi tu hawayî pêvînayîş çin o. Nê çîyê ke yenê kerdiş, ne huqûqê dewlete de ne zî huqûq de ca gênê. Ameyîşê to şaş o û xeylêk tehluke yo. Dewlete zî zaf tehluke ya. No çîyêk rast nîyo. Eke pêvînayîşêk bibo ganî çarçewaya huqûqî de bo. Serrêke dima goreyê waştişê xo pêvînayîşêk bi telefonî nêbeno. No çîyo ke yeno kerdiş şaş o. Dewlete zaf şaş kay kena. Şima zî. No huqûqî nîyo. Gelo şima zanê ke şima se kenê? Ez wazena avûkatê mi bêrê tîya û pêvînayîş bikerê. No çîyêk huqûqî yo. Bi 22 serrî yo ez tîya ya. Gelo no problem ameyox de senîn bibo? Çira nînê tîya. Eke pêvînayîşêk bibo zî ganî avûkatê min zî bibê. Seba ke na rewşe hem sîyasî, hem zî huqûqî ya."

 

Newroze de yewin waştiş azadîya Ocalanî bi

 

Girîngîyê Rayberê PKKyî Abdullah Ocalanî seba Şarê Kurdî û şarê dinya Newroza emsarî de reyke bîn vejîya werte. Şarê Kurdî û dostê Kurdan 7 serre ra heta 70 serre her kes tewrê pîrozbayîyê Newroze bî û waştişê azadîya Abdullah Ocalanî kerd. Na babete de seknê xo dayî werte. Dimayê nê mesajî wareyê  Newroze de ameyî dayîş, yeno pawitiş ke selahîyetdarî rojê ameyox de çi bikerê.

 

OHD vera tecrîdê Îmraliyî kewt mîyanê tevgerî

 

Hemseraka Pêroyî ya Komeleya Huqûqnasê seba Azadîye (OHD) Îlknur Alcan ajansê ma rê derheqê tecrîdê giran yê serê Abdullah Ocalanî de û hewldayîşê înan yê na babete de erjnayîş kerd.

 

OHDyî 8ê Adare de waştişê bi Rayberê PKKyî Abdullah Ocalan û tepişteyê bînî yê Îmraliyî dir pêvînayîş bikerê muracatê wezaretê edaletî. Muracatê ame kerdiş de bale antî serê  tecrîd û îzolasyonê serê Abdullah Ocalanî û tepişteyanê bînan.

 

‘Ma wazenê bi Birêz Ocalanî dir pêvînayîş bikerê'

 

Îlknure dîyar kerd ke sey OHDyî derheqê tecrîdê serê Rayberê PKKyî de yeno kerdiş de xeylêk hewl dayê û vat: "Yew nê szgehan ra zî ma yê. Ma netîceyê nê serewedaritişî de di hemserekê OHDyî 8ê Adare de muracatê Wezareta Edaletî kerd û ma waşt ke ma bi Birêz Ocalanî dir pêvînayîş bikerê. Seba avûkatanê Buroyê Asrinî zî bi muvekîlê xo dir pêvînayîş bikerê, ma muracat kerd."

 

Seba Îmraliyî hewldayîş

 

Îlknure dewam de wina vat: “Tewr peyîn çend mengî verê bi îmzaya 768 meslegdaranê xo dir bi amancê avûkatê Buroyê Huqûqî yê Asrin bi muvekîlê xo dir pêvînayîş bikerê, ma eşkerayîyêke weşan kerd. Vernîya nê de zî derheqê, ‘Heqê hêvîye' de ma muracatê Komîteyê Wezîran ê Konseyê Ewropa (AKBK) kerd û ma vat, rejîmo tepişteyê muebetî rê ameyo birnayîş, bi ca yeno hemverê heqê merdiman o."

 

‘Tecrîd sîstematîk bîyo’

 

Îlknure wina vat: “Komeleya Heqê Merdiman (ÎHD) Weqfê Heqê Merdiman ê Tirkîya (TÎHV), Weqfê Cigêrayîşê Huqûqî yê Komelî (TOHAV) û OHDyî muracatê AKBKyî kerd. Muracatê ma esas girewtî û heta êlula 2022 dem dayî Tirkîya û na babete de zî seba xebatî bêrê kerdiş dem da. Goreyê ma tecrîd giran û sîstematîk o, hemverê heqê merdiman o û îşkenceyî yo. Merkezê Heqê Merdiman ê Ewropayî (DMME) na babete de eynî qerarî de yo.  Tecrîdê Îmraliyî yeno kerdiş zî sîstematîk o. Hem Birêz Ocalan hem tepişteyê bînî zî bi no hawa nêeşkenê pêvînayîş bikerê. Heta nika tena di rey pêvînayîşê telefonî kerd. Bi serran o bi bahaneyê cîya yenê  astengkerdiş.”

 

‘Ganî tecrîd bêro wedaritiş’

 

Îlknure bale ant serê binpaykerdişan û vat: “Tirkîya de kam ci zîndan de binpaykerdişê heqê giran bêrê kerdiş, vernê de Îmraliyî de ceribnayî û dima ra heme zîndanan de vila beno. Seba ma serê muvekîlê xo dîyo. Ganî tecrîd bêro wedaritiş."

 

Seba Îmraliyî do muracatê Baroyan zî bêro kerdiş

 

Îlknure tewr peyîn wina vat: “Goreyê cewabê wezaretê edaletî do avûkatê bînî û şubeyê bîn yê OHDyî zî muracat bikerê. Eke cewabî negatîf bê do avûkatî esasê şube û herêman de muracat bikerê. Pêşnîyazê şubeyê ma estê. Do şubeyê ma zî muracat bikerê."