STENBOL - Cinîyê ke tewrê Newroza Stenbolî ke Yenîkapiyî de bî, dîyar kerdî seba azadîya Rayberê PKKyî Abdullah Ocalanî wareyan de bîyê û vat: "Şarê kurdî kîşte serekî de yê."

 

Newroza Stenbolî ya 2022yîne bi rayberîya Kongreya Demokratîke ya Şaran (HDK) bi sloganê, ‘Dem demê serkewtişî yo' Meydanê Yenîkapiyî ame pîrozkerdiş. Bi sehezaran kesê ke tewrê Newroze bî waştişê înan ê hempar azadî û pêvînayîşê bi Rayberê PKKyî Abdullah Ocalan dir bi. Pêwa heme astengîyanê polîsan beşêke pîl ê şarî kewt meydanê Yenîkapiyî û mesajêke xurt ê hempar dayî.

 

‘Seba Birêz Ocalanî meydanan pirr kerd'

 

Cinîya bi nameyê Sureyya Çelîk ke tewrê Newroze bî wina vat: "Ma seba Birêz Ocalanî û azadîya şarê kurdî û tepişteyan ware pirr kerd.  Ma aştî, azadî û têduştî wazenê. Ganî na gonî êdî vindernê. Bi serrêke keye û avûkatî nêeşkenê bi serekî dir pêvînayîş bikerê. Seba aştî, azadî û vindarnayîşê na gonî ganî pêvînayîş bêrê kerdiş. Yê koyan zî, polîs û cenderme zî tutê ma yê. Ma dayîk ê. Ma nêwazenê tu tutêke bimiro."

 

‘Ma serekê xo wazenê'

 

Cinîya bi nameyê Şukruye Ozturk zî Newroza şarê kurdî pîroz kerd û wina vat: “Ganî pêvînayîş avûkatan dir bêro kerdiş. Ma wazenê serek û Selahattîn Demîrtaş bêrê veradayîş. Ganî êdî şarê kurdî zî bibê yew. Êdî bes o. Do şar heta ça bi pakêtêke maqarna pîzeyê xo mird bikero. Wa şarê ma hişê xo bido sereyê xo û wayîrê yewbînan vejîyo. Ma serekê xo wazenê."

 

‘Şarê kurdî kîşte serekî de yo'

 

Cinîyaa bi nameyê Fehîme Konî zî wina vat: “Her ke ma vanê aştî, ê vanê şer. Ma şer nêwazenê. Wa ey xo rê şer bikerê. Ganî pêvînayîş bi serekî dir bêrê kerdiş. Şarê kurdî verê serekî de yo. Wa Erdogan û heme dinya bizano ke heta serek azad nêbo, şarê kurdî azad nêbeno. Ewro şarê kurdî pêwa heme serd û vewre û varanî de serê lingan de bî. Seba serekê xo seba şarê xo azadî waştî. 7 serre ra heta 70 serre meydanan de bî. Heta serek azad nêbo ma do keye de nênişnê ro."

 

‘Ma seba aştîye ware pirr kerd'

 

Zekîye Îlmek zî wina erjna: “Ma seba aştî, têduştî û merdimayî wareyê Newroze pirr kerd, êdî wa no şer peynî bibo, wa tutê ma bêrê veradayîş. Aştî her çî bi mana kena. Wa aştî bêro. Merdimî vêşanê, wa êdî bieşkê pîzeyê xo mird bikerê. Şar veşanî ra mireno. Êdî merdimî nêeşkenê rûn bigîrê. Nê heme seba şerî bi ca yenê. Êdî bes o. Keyeyê ma xira kerdî. Ma talan kerdî. Ma koçber bî. Heqê înan çin o nê bikerê."

 

‘Newroze xoverdayîş a'

 

Cinîya bi nameyê Fîkriye Turgut zî wina qal kerd: “Newroze serewedaritiş a, xoverdayîş a, kurd û Kurdistan a. Şarê kurdî seba heqê xo kuçeyan de bî. Gelo no zulm û teda heta ça dewam bikero? Biciwîyo şarê kurd û Kurdistanî. Ma amade yê ke xo nê rayîrî de feda bikerê. Na Newroze seba Abdullah Ocalan û şarê kurdî amî kerdiş."

 

‘Nika demê azadî û aştîye yo'

 

Hemseraka HDPyî ya Kuçukçekmeceyî Gulsum Ozturk zî Newroza heme şaran pîroz kerd û vat: "Vengê Newroze berz bi, do tesîr serê weçînayîşê 2023ine zî bikero. Kes nêeşkeno vajo, ‘HDP çin bîyo.' Girseyê ke herikya wareyê Yenîkapiyî hetê polîsan ra ame astengkerdiş. La pêwa her çî şar vejîya meydanan. Seba ke şarê kurdî ra tersenê, tedayan kenê.  Kurd, elewî, armenî û suryanî estê. Çi beno wa bibo do yewbîyayîş virazyo. Ma do wina şêrê meclîs.”

 

‘Bê azadîya Abdullah Ocalan cuye aver nêşina'

 

Gulsume bale ant serê tecrîdî û vat: “Ma tu wext serekê xo xo vîr ra nêkenê. Ma xo ver danê. Bê azadîya Birêz Ocalanî cuye aver nêşina. Cuya ma girêdayê yewbînan a. Wa her kes nê bizano. Ma silamanê xo Rayber Apo rê şawenê.  Heta dilopêke gonîya ma bimano, ma do seba serekî bixebityê û ma do nê  sindoqe de nîşan bidê."