AMED - Amed de pêwa heme astengîyan pîrozbayîyê Newroze dewam kenê. Siyasetmedar Ahmet Turk xîtabê sed hezaran kesî kerd û vat: "Dem demê yewbîyayîşê ma yo. Êdî ganî ma kurdî bêrê têhet û ma sîwanêke hempar awan bikerê.” 

 

Amed de pêwa heme astengî, hêriş û provokasyonan zî pîrozbayîyê Newroze dewam kena. Bi sed hezaran kesî waştişê azadiya Rayberê PKKyî Abdullah Ocalanî kenê.

 

Dimayê ke Hozan Kazo deyîran vat, Hemşaredarê Mêrdînî Ahmet Turk ke vera ci qeyûm tayîn bi, xîtabî bi sed hezaran kesî kerd.

 

Siyasetmedar Ahmet Turk şarî silam kerd û Newroza şarî pîroz kerd û vat: "Ez rêz û heskerdişê xo pêşkêşî Ameda rengîn kena. Ez bi germbîyayîşê adirê Newroze şima silam kena. Cinî, ciwanî azadiya şarê Kurdistanî serê lingan de yê û xo ver danê. Ma seba ameyoxê kurdan her roje serê lingan de yê. Ma spasîya şarê xo kenê û xoverdayîşê înan silam û pîroz kenê. Newroze xoverdayîşê şarê ma ya.

 

Yê ke wazenê vengê şarê kurdî qut bikerê, xo xapînayê. Vengê şarê kurdî her roja ke şina dinya rê vila bena. Serê siyasetmedarê kurdan de zilmêk pîl esto. Bi hezaran siyasetmedarê kurdî zindanan de yê. Beno ke zindanan de bê lê ruhê înan Newroza Amedî de yo.

  

Ewro serê şarê ma de tecrîd yeno kerdiş. Birêz Ocalan bi serran o binê tecrîdêk giran de yo. Nêverdenê avûkat û keyeyê ci şêro pêvînayîş. Şarê kurdî nê siyasetê pûç kerdê. Bi serran o embaza mi Aysel Tugluk nêweş a û nîna veradayîş. Rewşa ci xidar a û reyna zî zindan de yeno verdayîş. Çîyêk serê ehlaqê merdimî de nêmendo. Ganî bûro veradayîş la zulm yeno kerdiş.

 

Êdî dinyayêke vurnaye esta. Êdî ma dinyayêke sîstemê newe awan benê de derbas benê. A rast ganî ma dersê şerê Rûsya û Ûkraynayî vejîyê. Pêwa ke bi desan serrî yo serê Kurdistanî û siyasetmedarê ci de hêriş û tedayê giran estê zî la siyasetmedarî ci yewbînan nêkenê. Ma Amed ra veng danê; êdî dem demê ameyîşê têhetî yo. Êdî dem demê awankerdişê sîwanêke hempar a. Eke şima wina tevger bikerê do tarîx û şarê kurdî şima efû nêkero.