AMED - Hemrayê rojnamegere Nûjîyan Erhan seba 6in serggera qetilkerdişê aye hîsê xo pare kerdî û vatî: "Nûjîyane dimayê heqîqetî bî û seba rayîrê ma yê têkoşînî xo kerd roşnayî. Ma do serê rêça aye ya heqîqetî de bê." 

 

Nûjîyan Erhan wexto ke qezaya Xanesore ya serê şaristanê Şengalî de aye ke xebere teqîb kerdêne, 3yê Adare ya 2017ine de hetê hêzê Partîya Demokrate ya Kurdistanî (PDK) ra rastê hêrişî amî û birîndar bî. Dimayê 9 rojî têkoşînê ciwîyayîşî da, yanî verîyê 6 serran, şewa 22yî Adare ya 23yê Adare dir girêdayeya de dinyaya xo bedilna. Nûjîyan Erhan serra 2005î de, dest bi karê çapemenîye kerd. Ajansê Xeberan ê Jinî (JINHA) û rojnameya Şûjine ke bi qerarê KHKyî ameyî padayîş de muxabîrîye kerd. Sewbîna Nûjîyane Çira Tv de zî bernameyêke pêşkêş kerdêne. Nûjîyane ke her wareyî de xo resna cinîyan û bî vengê înan, tewr peynî de Şengal de  xebetîya. Seba duştê zilmê DAÎŞÎ de têkoşînê cinîyanê Êzîdîyan Dinya dir pare bikero, uca de ca girewt. 

 

Bi wesîleyê 6in serrgera qetilkerdişê Nûjîyan Erhan de ma hemrayê aye muxabîra JINNEWSî Sema Çaglak û muxabîra MAyî Ceylan Şahînlî ra roportaj girewt. 

 

'Wezîfeyê cinîyan ê rojnamegeran pîl o' 

Sema dîyar kerd ke wexto Nûjîyan Erhan yena vatiş, têkoşînê cinîyan ê rojnamegeran di hişê merdimî de ganî beno. Sema vat Nûjîyane têkoşînê xo de her tim bî şorişwanê heqîqetî û wina dewam kerd: "Nûjîyane nê cigêrayîşê xo yê heqîqetî de, eynî wextî de bî vengê cinîye û tewr peynî zî seba bibo vengê cinîyan ê Êzîdîyan şî Şengal. Nûjîyane û hemrayê xo qetlîam û fermanê serê Şengalî de ameyî kerdiş, ramojnayêne Dinya. Ma tîya de zî bander benê ke cinîyê rojnamegerî wayîrê wezîfeyêke pîl û muhîmî yê. Nika zî bi seyan cinî serê rêça Gûrbetelî Ersoz û  Nûjîyan Erhane de têkoşîna heqîqetî danê." 

 

'Ma do fek nuştuşî ra vera nêdê' 

 

Sema vîr fîna ke wareyê çapemenîye yew wareyêke tewr muhîme ya têkoşînî ya û wina vat: "Nê asasî de zî cinîyê rojnamegerî nuştişê heqîqetî ra apey game nêerzenê. Coka her tim rastê hêrişan û tehdîdan yenê. Eke ma serranê 90î bifînê vîr, xeylêk rojnamegerî ameyî qetilkerdiş, remnayîş, tepiştiş û rastê îşkenceyî û tehdîdan ameyî. Sebebê no yo sereyîn zî îfşakerdişê heqîqetî bî. Coka çiqas ke hêrişî zêdeyêr bibê zî têkoşîn zî hende pîl beno. Şarê Kurdî bi serran o rastê hêrişan yenê û nê hêrişan ra zî reyna rojnamegerî para xo gênê. Nê semedî zî ma qelema înan a muxabîrîye dor gênê û seba nuştişê heqîqetî têkoşenê. Ma do nuştuşê heqîqetî ra fek vera nêdê." 

 

'Ma yewbînî ra quwet gênê' 

Ceylane zî dîyar kerd ke cinîyî her wareyî de têkoşîn kenê û wina vat: "Her ke têkoşîn û serewedaritişê cinîyan pîl beno, hêrişê duştê înan de zî înan dir zêdeyêr beno. Eke ma bi xusûsî serê Kurdistanî de qisey bikerê, ganî ma qalê hêrişê serê nasnameyê Kurdan de yeno kerdiş zî bikerê. Yan zî nê cinî di mîyanê nê şeran de seke mertalî yenê xebetnayîş. Cinîyî timûtim di hedefê na şuûrîya pederşahî de yê. Wazenê înan bipelçiqnê û wareyê înan teng bikerê. Cinîyan tu reyêke apey game nêeşta. Ma bi xo zî benê şahidê nê. Wareyê  ke ma ci de xeberan virazenê ma quwet yewbînî ra gênê." 

 

'Nûjîyane seba rayîrê ma bî roşnayî' 

 

Ceylane da zanayene ke wareyê çapemenîye perçeyêka pîle ya têkoşînî ya û wina dewam kerd: "No perçe zî mîraso ke pîl ê têkoşînî yo. Ma wayîr ro ê mîrasî vejênê û têkoşînêk înan dayo bi heme ezayê ganê xo hîs kenê. Nûjîyane zî hem hemraye û hem zî hemzayenda ma ya ke rayîrê ma roşin kena. Ma zî hewl danê ke polîtîkayê ke wazenê heqîqetî meydan ra wedarê îfşa bikerê. Coka ma zî hedefê înan de yê. Qetilkerdişê Nûjîyane yew nê fînakan ra ya. Nûjîyane hem duştê şuûrê pederşahî de hem zî duştê şuûrê îqtîdarî de têkoşîn kerd. Ma zî seke cinîya Kurde ya rojnamegere, ma do serê rêça înan de seba nuştişê heqîqetî têkoşîne bikerê.”