Medya Uren- Şîrîn Çinar

 

AMED - Ciwanê kurdî seba Roşanê Newroze pêşwazî bikerê xo bi cil û belgê kurdî xemilnenê. Esnafê ke cilê kurdî roşenê, coşê ciwanan pare kerdî û vatî goreyê serrê bînî emsar coşêke cîya esto. Goreyê serranê bînan zêdeyêr girewtişê cilanê kurdî virazêno.  

 

Roşanê newebîyayîşî, Newroze rê tay mend. Kelecanê şarî, bi taybetî coşê şarê Amedî her ke şino zî zêde beno. Seba bi rengê Newroze xo bixemilnê zî dest bi girewtişê cil û belgê kurdî kenê. Derheqê amadekariyan de zî ma terzîyan û esnafê Amedî yê cilê Kurdî roşenê pers kerd. Esnafan coşê şarî û bi taybetî yê ciwanan pare kerdî û vatî, ma bi deştişê cilan nêresenê.

 

‘Emsar coşêke tewr weş esta’

 

Esnafa bi nameyê Ayhan Kaşa ke cilê kurdî seba cinî û camêrdan zî derzena û roşena derheqê amadekariyê Newroze de nê vatişî kerd: "Goreyê serrê bîn emsar coşêke tewr weş esta. Ma hende hêvî nêkerdêne. Na coşe zî hem ameyîşê Newroze vîrê mi de verdeno û hem zî keyfê ma esnafan weş kerd. Yeno zanayîş seba şubeyê koronoyî û krîzê ekonomî ma prosesê zehmetî ra derbas benê. Coka no çend rojî yo seba ciwanan cilî destê mi de nêmend. Ciwanî êdî seba cilanê botanî yenê, rexmê nêmendê bi israr wazenê. Ma zî wazenê her kesî bi rengê weşik bixemilnê." Ayhane tewr peyîn zî vat, ma Newroza emsar ke hêvî kenê ke bi coşêke pîl bi ca bêra pîroz kenê."

 

‘Cilê botanî destê ma de nêmendî’

 

Şukran Derlî Dolgu zî coşê girewtişê cilan wina pare kerd: "Seke şima zî vînenê dikanê ma pirr ê. Ma nê girseyî hêvî nêkerdêne. Cinî, tutî, ciwan û camêrdî seba  cilê kurdî bigîrê kewtê dore. Bi taybetî zî cilê botanî wazenê. Cinî bi botanî û camêrdî zî bi Colemêrgî û botanî cil wazenê. Ma nê cilan ra nêresenê. Bawer a emsar seba şîyayîşê Newroze coşêke cîya esto. Goreyê ke ma vînenê zî do wareyê Newroze xeylêk rengîn bixemilyo."

 

‘Her serre şîne tewr xirab bîne’

 

Roza Dalli zî wina vat: "Verê Newroze bi coşêke pîl ameyîne pîrozkerdiş. No zî seba cil û belgê kurdî bîne sebebê ameyîşêk pîl. Coka her serrêka şina rewşe baş nêbena. Bi taybetî zî çend serrê peyîn de seba şubeyê  koronoyî û krîzê ekonomî qet rotiş nêbîne. Emsar goreyê serrê bîn başêr o."

 

‘Ma bi kelecan ê’

 

Sebîhe Çakara ke cilan girewtêne wina vat: "Demêk derg o ma paweyê na roje yê. Newroza Amedî xeylêk bi coş û bi girseyî derbas bena. Ma cilê xo girewtê û ma paweyê Newroze yê. Ma do bi govend, tilîliyan û rengê xo wareyan de bê.”