COLEMÊRG - Cinîyê HDPyî seba pîrozîya Newroze ya 21ê Adare ya roja dişemeyî Gever de bi şîarê  'Wext wextê serkewtişî yo' yena pîrozkerdiş veng kerd û wina vatî: "Bêrê ma dest bidê yewbînî û adirê Newroze gurr bikerê. Adiro ke ma fînenê ta, wa biba wesîleyê aştî, seyyewbînî û azadîye." 

 

Newroza 2022yîne ya emsar 72 merkezan de bi şîarê 'Wext wextê serkewtişî yo' yena pîrozkerdiş. Yew şaristanêke ra bi coşêke pîl Newroze ci de yena pîrozkerdiş Colemêrg a. Merkezê şaristanî de 20ê Adare de, Gever de zî 21ê Adare de Newroze do bêro pîrozkerdiş û bê mabên xebate dewam kena. Komîteya Newroze ya Geverî dewan û semtan de xebatê xo domnenê. Komîteya Newroze ya HDPyî vat Newroza emsarî wa biba wesîleyê aştî, seyyewbînî û azadîye. 

 

'Pêwa heme manîyîyan bi coşî derbas bena' 

 

Endama Meclîse ya Cinîyanê HDPyî yê Colemêrgî Halîme Sure dîyar kerd ke pêwa heme manîyî  û tehdayan xebatê xo bê mabên kenê. Helîme behs kerd ke pêwa heme manîyîyan do her cayî de Newroze bi coşî pîroz bikerê. Helîme wina malûmat da: "Prosesê îdarekarîya xosere ra heta nika ma her tim manîyîyan dir ameyî rî bi rî, la îradeyê şarê ma, ma reyde bî û vera nê ma înan ra hêz girewt. Pêwa ê tehdayan û manîyîyan şarî apey xo nêant û ma zî dest têkoşîna xo ra vera nêda. A serre ra pey Newroze her tim bi coşî derbas bî." 

 

'Pêwa manîyîyan hadrekarîyê Newroze' 

 

Halîme dewamîya qiseyanê xo de ramojnayîş kerd ke verî yê Xoverdayîşê Îdarekarîya Xosere her kuçeyî de adirê Newroze fînayê ta û di prosesê îdarekarîya xosere de her çî vurîya  û programê Newroze manîyîyan dir ameyî rî bi rî û wina derg kerd: "Tutîyîya xo ra ez şina Newroze. Verî bi rojanê vernîyê Newroze, meydanan de pîrozîyî dest pê kerdêne. La serranê dimayî de manîyîyê pîlî vetî. Pêwa heme manîyîyan xo apey nêantî. Bi mengan verîyê Newroze hadrekarîyî kerdêne. Her serre meydanê Newroze pirr benê û bi coşî Newroze yena pîrozkerdiş." 

 

'Bêrê ma tê dir adir gurr bikerê' 

 

Halîme peynîyê qiseyanê xo de bale ante serê rojevê sereyînî yê Newroza emsarî û nê çîyî ardî ziwan: "Zîndan û tecrîd do rojeva ma bo. Umîdê ma no yo ke  Newroze biba wesîleyê peynîbîyayîşê tecrîdî. Ma wazenê heme Şarê Geverî Newroze de meydan de bê. Bêrê ma dest bidê yewbînî û adir gurr bikerê. Wa adirê Newroze biba wesîleyê aştî, seyyewbînî û azadîye." 

 

'Ma her kesî dawetê Newroze kenê' 

 

Komîteya Newroze ra Yuksel Yilmaze zî nîyadîyayîşê xo yê derheqê Newroze de ardî ziwan û dîyar kerd ke, ê keye bi keye kuçe bi kuçe gêrayê û xo resnayê her hetî û wina ci de şî: "Ma xebatê xo bê mabên, bi coşêke pîl pîroz kerd. Ma bi coş, bi kelecan û bi kêfweşîyêke pîl, heme embazanê xo dir, dewe bi dewe, semt bi semtî gêrayî û xebatê xo rayîrberdî. Ma heme şarê xo dawetê Newroze kenê."