Oznur Deger

 

ANQARA - Ayla Akat Ata mesajê xo yê Newroze de wina vat: "Ma do bi deyîran û govendan biresê yewbînan. Her tavistişê adirê Newroze de ma do verê şima de bê. Ma hêvîya xo girs kenê û seba ke peynîya her zimistanî de wisarêk esto."

 

Newroza 2022yîne bi sloganê, "Dem demê serkewtişî yo" yena pîrozkerdiş. Newroze rê 2 rojî mend û xeylêk bajaran de amadekarîyê pîrozbayî peynî bî. Sewbîna xeylêk cayan de zî pîrozbayî dest pêkerd. Pêwa pîrozbayîyê teberî, zîndanan de zî Newroze yena pîrozkerdiş. Aktîvîsta Tevgerê Cinîyan ê Azadan û parlamentera verê ya Partîya Demokratîke ya Şaran (HDP) ya Êlihî, Ayla Akat Ata ke Zîndanê Cinîyan ê Sincanî de tepişte yaajansê ma rê qalê girîngîyê Newroze kerd.

 

'Roşanê xoverdayîşî'

 

Ayla, dîyar kerd ke Newroze yena manaya "Roşanê xoverdayîşî" û wina vat: "Mahabad ra heta Hewlêr, Hewlêr ra heta Qamişlo, Qamişlo ra heta Amed adirê Newroze yeno tavistiş. Ez kesê ke verê adirî de govende kenê, silam kena. Sewbîna şarê Mezopotamyaye, azerî, îranî, efxanî û Komara Asyaya Mîyanên Newroze sey 'Serê serre', ‘Roşanê wisarî' û ‘Roja newe' yena pîrozkerdiş." 

 

'Seba Kurdan roşanêke neteweyî yo'

 

Ayla vat, rêçê Newroze serdemê Antîk de yenê vînayîş û wina dewam kerd: "Seba şarê Mezopotamyaye Newroze 'Newebîyayîşê xoza' û 'Ameyîşê  wisarî' yena zanayene. Seba Şarê  Kurdî zî Newroze sey roşanêke neteweyî ya. Kurdî sey, 'Roşanê  xoverdayîşî' terîf kenê. No çî yeno ke çira wina ameya tehrîfkerdiş. Newroze roja serewedaritişê hemverê zulmkaran a."

 

'Serranê 90î de bedelek mezin hat dayîn'

 

Ayla Akat Ata, wina dewam kerd: "Her roja ke derbas bena, şert û mercî vuryenê, la Kawayê ke hemverê Dehaqan vejîyenê, qehremanî nusenê. A roje Newroz a. Sewbîna serê 90an de seba pîrozbayîyê azad têkoşînêk û bedelêk ame dayîş. Mazlûm Dogan, bi seyan kesê ke Cizîr û Nisêbîn de dinyaya xo bedilnayî, Zekîye Alkan, Rahşan Demîrel, nê çî bi temamê xoverdayîşî nîşan dano. No serewedaritiş o."

 

'Biciwîyo Newroze!'

 

Ayla Akat tewr peyîn wina vat: "Ez serra 2016ine ra heta ewro 3 rey ameya tepiştiş. Bi Newroza 2022yîne do bibo 4 Newroze ke ez zîndan de pêşwazî bikerî. Zîndan cayê ke xoverdayîş peynî bibo nîyo, tena ca vuryayo. Ma zî sey kesê ke teber de bi coş û heyecanêke pîl Newroze pêşwazî bikerê. Seba pandemî nêverdenê ke ma vejîyê wareyê hempar. Ma do koguşê xo de Newroze pîroz bikerê. Ma do bi deyîran û govendan biresnê yewbînan. Her tavistişê adirê Newroze de ma do verê şima de bê. Ma hêvîya xo pîl kenê û seba ke  peynîya her zimistanî de wisarêke esto. Biciwîyo 21ê Adare! Biciwîyo Newroze."