Rojda Aydin

 

ŞIRNEX - Cinîyê Cizîrî û êyê ke Hezexî de yê, seba tewirbîyayîşê pîrozîya Newroze ya 21ê Adare de bêro organîzekerdiş vengdayîş kerdî û vatî: "Bêrê ma bi rihê serranê 90î verê xo bidê meydanan. Wayîr ro mîrasê xoverdayîşî vejîyê û adirê azadîye geş bikerê. 

 

Emsar do Newroze 72 merkezan de bi sloganê  'Wext wextê serkewtişî yo'  bêro pîrozkerdiş. Newroza emsar a ke do bi waştişê wedaritişê tecrîdê serê Rayberê PKKyî Abdullah Ocalanî û awankerdişê yewîyîye bêro pîrozkerdiş, her cayî de vengdayîşî yenê kerdiş û her meydan de adirê Newroze geş bena.  Botan de zî xebatê Newroze bêmabên domnenê. 21ê Adare de Botan de qezayê Cizîrî û Hezexî de mitîngê fînalî do bêrê organîzekerdiş. 

 

Mitîngo ke Cizîrî de Meydanê Newroze ya kaleka TOKÎyan de ya, do saete di mabênê 11:00 û 17:00î de bêro pîrozkerdiş. Hemsereka Partîya Mintiqayî ya Demokratîke(DBP) Keskîn Bayindir û Parlementera Partîya Demokratîke ya Şaran(HDP) Nûran Îmîr do sey qiseykerdoxî tewir bîbê. Sewbîna Hunermendî Pinar Aydinlar,  Lawje Şerzad, Şîyar Berwarî û Nesîm Arsû do vejîyê serê sahneyî. 

 

Hezexî de zî mitîngo ke Meydanê Newroze de bêro organîzekerdiş, qiseykerdox Parlementerê HDPyî yê Şirnexî Huseyîn Kaçmaz û hunermendî zî Hîvron û Koma Jînawaz do tewir bibê. 

 

Cinîyê Cizîrî û Hezexî seba mitîngê 21ê Adare  vengdayîşî kerdî û vatî bi rihê serranê 90î verê xo bidê meydanan. 

 

'Newroza Cizîrî zerrîya Botanî ya' 

 

Hemsereke ya HDPyî ya Cizîrî Zîlan Ecevît, ard ziwan ke, ê do bi rihê Newroze ya 90î emsar verê xo bidê Meydanê Newroze û vat: "Newroze seba Cizîrî û Botanî tena roşan nîya, sewbîna xoverdayîş û têkoşîne ya. Ma zî sey Cizîrî Newroza emsarî de azadî û serkewtiş wazenê. Seserra 21ine, do biba seserra cinîyanê Kurdan û Şarê Kurdî. Ma do bi rihê 8ê Adare verê xo bidê Meydanê Newroze. Ma do bi rihê 8ê Adare adirê Newroze geş bikerê. Şarê Cizîrî seba Newroze hadreyê. Hewt serrî ra heta hewtay serrî, heme bi rihê têkoşîne verê xo danê Meydanê Newroze ya Cizîrî. Newroza 2022yîne serkewtişê Şarê Kurdî ya, şikinayîşê tecrîdî ya. Coka nê yewî ma şarê Botanî dawetê Newroza Cizîrî kenê. Newroza Cizîrî zerrîya Botanî ya." 

 

'Ma ganî wayîr ro mîrasê înan vejîyê' 

 

Gulîstan Hezer zî Newroze ro heme Şarê Botanî pîroz kerd û ê wazenê na Newroze biba Newroza seserre û wina dewam kerd: "Ma wazenê weşî,  azadî  û aştî bi na Newroze bêrê ca. Na Newroze seba ma xeylêk muhîm a. Ma xeylêke bedelê  giranî dayî seba ke bêrê na roje. Xeylêk tepişteyî zîndanan de seba Newroze ganê xo feda kerdî. Mazlûm Dogan, Kemal Pîr, Vîyane û xeylêke merdimê birûmetê bînî seba Newroze ganê xo feda kerdî. Coka zî ganî ma wayîr ro mîrasê înan vejîyê. Ma wazenê heme kesî verê xo bidê Meydanê Newroze. Ma bi Newroze bibê vengê tepişteyan û tecrîdî bişiknê. Tutan ra bigîro heta kalan û pîran ma wazenê heme verê xo bidê Meydanê Newroze. Wa berê zîndanan bêrê akerdişî û ma tecrîdî bişiknê." 

 

'Ma do bi rihê 8ê Adare verê xo bidê Newroze' 

 

Hemsereka Şaredarîya Hezexî ke cayê aye de qeyûm ameyo tayînkerdiş Songul Erden zî vat, Newroze saba Şarê Botanî xeylêk muhîm o û waşt ke Şarê Botanî Meydanê Newroze de hemverê zilmî de vengê xo berz bikerê û nê çîyî ardî ziwan: "Ma senîn bi rihê 8ê Adare vejîyayî meydanan û meydan xemelna, ma do bi eynî rihî verê xo bidê Meydanê Newroze zî. Ma umîd kenê ke Newroza emsarî biba azadîya Rayberê Şarê Kurdî Abdullah Ocalanî. Neyar wazeno bi hêrişan xo tesîr serê şarê ma de awan bikero û vernîyê Newroze pado. Labelê senîn ke serranê 90î de xover da, do emsar zî bi eynî rihî xover bidê. Meydanê Newroze do biba meydanê xoverdayîşî û serewedaritişî. Ma do bi rihê serranê 90î verê xo bidê meydanan.  Ma do wayîrê nê mîrasî vejîyê. Waştişê ma no yo ke ma tecrîdî bişiknê, tepişteyê ke zîndanan de yê azad bikerê û  yewîyîye awan bikerê. Ma do bi rihê Newroze tecrîd bişiknê.  Venga ma Şarê Hezexî rê, ê ke bêrê verê xo bidê Meydanê Newroze û ma yewîyîya xo awan bikerê." 

 

'Bi Newroze tecrîd bişiknê' 

 

Endama Meclîse ya Dadîyanê Aştîye ya Hezexî Xecê Kaya zî dîyar kerd ke nasnameyê Kurdan bi serran o nîno naskerdiş û yeno çinîkerdiş û wina qal kerd: "Ma wazenê Newroza emsarî dir nasnameyê xo bifînê destê xo û ma vajê ma tîya de yê. Vera ke ma Kurd ê, nê hêrişî serê ma de yenê kerdiş. Coka zî ganî Şarê Botanî vejîyê meydanan û vajê ma estê. Ma do bi rihê 90î verê xo bidê Newroze. Xeylêk ciwanê ma seba Newroze ganê xo feda kerdî. Ma zî wazenê ma wayîr ro nê mîrasî vejîyê. Wa Şarê Hezexî 21ê Adare de bêrayê keyeyanê xo padê û bêrê verê xo bidê Meydanê Newroze. Xusûsî zî ganî cinîyî wayîr ro Serekî vejîyê. Coka ke ewro ma cinîyî bi xêrê Serekî xo naskenê. Ma do zî bi Newroze tecrîd bişiknê." 

 

'Bi hezaran Kawayî hemverê zilmî de xover dayê û danê' 

 

Kiymet Acare zî vat, Newroze seba Kurdan Roşana û  serewedaritişa û  wina ci de şî: "Verîyê seserran Dehaqî mezgê merdiman werd û zilm ro şarî kerd. La belê Kawayo Asinkar hemverê nê zilmî de sere wedarit. Ewro bi hezaran Kawayî hemverê zilmî de sere wedarit ê. Mezlûm Doganî zîndan de bi hîrê qirşê kîwrîtî bedenê xo da verê adirî û adir gurr kerd. Ma do heta peynî wayîr ro mîrasê înan vejîyê.  Ganî şarê ma verê xo bido meydanan û adirê Newroze gurr bikero. Vizêrî zî Dehaq bîbî, ewro zî reyna bi eynî Dehaqî gonîya Kurdan misnenê. La belê bi hezaran Kawayî hemverê zilmî de xover dayo û danê. Ma ewro hemverê Dehaqêke bîn de sere wedarito û ma do tu reyî sereçewtîye nêkerê. Bêrê ma têreyde Meydananê Newroze de hemverê zilmî de  vengê xo berz bikerê. Ma tecrîd bişiknê û yewîyîya xo awan bikerê." 

 

'Newroze xoverdayîş a û xoverdayîşê ciwîye ya' 

 

Endama Meclîse ya Cinîyanê HDPyî Elfesya Nase zî ramojnayîş kerd ke, ê do Newroza emsarî de duştê zilmê serê tepişteyan de, tecrîdo girankerde û seba awankerdişê yewîyîye do mesajêke xurt bidê û wina nîyadîyayîşê xo ardî ziwan: "No wextêke derg o tecrîdêk giran serê Serekî de yeno kerdiş. Coka nê yewî babeta sereyîne seba ma tecrîd o. Sewbîna hetê Başurî de PDK hêrişê Kurdan keno û neyarîya şarê xo keno. Ma wazenê PDK fek nê hêrişan ra verado û dest bido wayan û biranê xo. Ma wazenê bi Newroza emsarî dir yewîyî, azadî û seyyewbînî  awan bibo. Eke yewîyî awan bibo ke do problemê Kurdan zî hel bibê.  Ganî ma Kurdî bibê yew û tecrîdî bişiknê. Ma wazenê bi rihê Mezlûm Doganî, Zekîyeye, Rewşene û xeylêk kesê  bînî verê xo danê meydanan. No bi serrano hemverê cinîyan de hêrişêke esto. Ma bi nê rihî peynîya nê hêrişan bîyarê. Ma embazê xo Denîz Poyraze, Kemal Kûrkûtî, Garîbe Gezere di Newroza emsarî de bîyarê vîr. Ma do wayîr ro mîrasê şehîdan vejîyê. Ma, hewt serrî ra heta hewtay serrî şarê xo dawetê Newroza Hezexî kenê. Newroze xoverdayîş a, xoverdayîşê ciwîye ya."