Gulîstan Dursun

 

STENBOL - Emîne Şener û kênaya aye ke dadîya aştîye ya Bedîa Gokkuz bi serran o pêwa heme teda û qedexeyan Stenbol de tewrê pîrozkerdişê Newroze benê û ê rojan wina qal kenê: "Ma hemverê zulmî sere wedarna. Ma çimê xo akerd û ma ferqê her çî de yê. Çi beno wa bibo ma adirê Newroze tavist. Demo ke ê wextî qedexe kerdêne, kelecanê ma tewr zêde bîne."

 

Newroza ke seba hîn şaran sey  ameyîşê wisarî yena pîrozkerdiş zî seba şarê Kurd bî nameyê ganebîyayîşî. Bi taybetî dimayê vejîyayîşê têkoşînê azadîya Kurdî yanî 50 serrî verê Newroze  seba Şarê Kurdî resa amancê xo yê esasç Şarê Kurdî ke Newroze reyna manayîn kerd, bi adirê ke tavist, seba xoverdayîşî game eşt. Cinî, ciwan, tut, kal û pîran her ca de 21ê Adare de verê xo dayî meydanan. Bi cil û belgê xo yê kurdî govende kerdî û vatî, 'ma estê, ma tîya yê û ver bi azadî şinê.' Bi taybetî zî Rayberê PKKyî Abdullah Ocalan bîyo sembola Newroze.

 

Bi serran o cepheyê vernî de yê

 

Pêwa heme qedexeyan Stenbol ke metropolê Tirkîya yo, 43 serrî yo bêmabên Newroze yena pîrozkerdiş. Emsar do bi sloganê, ‘Dem demê serkewtişî yo' şar şêro Newroze û emsar do Meydanê Yenîkapi de Newroze bêro pîrozkerdiş. Vernîya Newroza ke do 20ê Adarê de bêro pîrozkerdiş,  Emîne Şener û kênaya aye ke dadîya Aştîye ya Bedîa Gokkuz derheqê Newroze de qisey kerd.

 

‘Dewlete her tim pozîsyonê hêrişî de bî’

 

Emîne Şener dîyar kerd aye bîya şahidê darbeyê 12ê êlula 1980 û seba tedayî Amed ra koçê Stenbolî kerdê û vat: "Her tim teda, zilm bi. Rojêke verike mi de kênaya mi, ma mîyanê pêrodayîşî de mendî. Ciwanan verê çimanê mi de kiştî. Dewlete her tim hêrişê Şarê Kurdî kerdêne. Hema zî wina ya. Ma zulm ra remayî. Ma koçê Stenbolî kerd. Pêwa ma ameyî bajarê girdî ma fek kulturê xo ra vera nêda. Tîya zî cuya ma asan nêbî. Wexto ke ma şîne serê hênî, vatêne şima terorîst ê, vatêne Kurdê bi boçike. Ciwanê ma her çî zanayêne. Mi bi lajê xo dir têkoşîn nas kerd. Rojêke mi mêrdeyê xo ra vat, 'tutê ma se kenê' ey zî vat, 'Ma ti nêzana? Ma binê zulmî de yê.' Semedê çîyê ke ameyîne ciwîyayîş, ciwanê ma wuştî serê lingan."

Dişminîyê hemverê rengan

 

Emîne dewam de wina vat: “Rojêke mi fistanêke; kesk sûr û zerd dabi xo ra. Mi baş manaya ci zî nêzanayîne. Yew ame vat, ez qurbana nê renganê fîstanê to bî. Ez şaş menda. Mi fam nêkerd. A mebêne de kesêke bîn hêrişê ma kerd. Sebebê ci zî rengê fistanê mi bî. Ma hemverê zulmî bêveng nêmendî. Ma her çî ferq kerd. Belê ma serê herra xo de esîr bî. Partîya ma ma zulmî ra xelas kerd. Wayîrê ziwanî vejîya. Ez tu wext têkoşînê xo ra poşman nîya."

 

Pêwa qedexeyan şî Newroze

 

Dadîya Aştîye Bedîa Gokkuz ke serrêke dimayê darbeyê 12ê êlule bi keyeyî dir koçê Stenbolî kena û ala têkoşinî gêna wina qal kerd: "Ma nêeşkayîne şêrê nêweşxane. Her tim zilm bi. Bi zilmê înan dir ma xo nas kerd û ma fam kerd ke seba ke ma Kurdê ma nê zulmî ciwîyenê. Hemverê nê zilmî ma wareyan de xo ver da. 1992 de yewin rey tewrê Newroza Stenbolî ya girseyî bîya. Heta serra 1992yîne salonan de ameyîne pîrozkerdiş. Bêguman hîn ters bi. La ma bi rengê xo ma xo xemilna û bi sloganê, ‘Biciwîyo serek Apo’, ‘Biciwîyo Newroze’ şî wareyê Meydanê Kartalî. Adir amebi tavistiş. Ma komêke 50-100 kesî bî. Polîsan vernîya ma girewt û mêrde û vistewrê mi derb kerdî û destbend kerdî."

 

‘Ma seba Serekî wareyan de bê' 

 

Bedîa wina qedêna: “Ma do bi waştişê azadîya serekî û heme tepişteyanê Kurdan wareyan de bê. Wa şer biqedîyo, aştî bêro. Dem demê serkewtişî yo. Ma bi sloganan şinê Newroze. Ma do serbikewê û azad bê. Newroze tena roşanê Şarê  Kurd nîya. Pêro şarê ke binê tedayan de yê ganî tewrê Newroze bibê. Bêrê ma dest bidê yewbînan û wayîrê azadî û aştîye vejîyê."