Rojda Aydin

 

ŞIRNEX - Adiro ewilî yê Newroze, Elkî de bi coşêke pîl  ame wekerdiş. Pîrozîya Newroze de cinîyê Elkî bale ante serê yewîyîya Kurdan û vatî: "Wa Kurdî neyarîya yewbînan nêkerê. Wa Newroze biba wesîleyê yewîyîya Kurdan."

 

Adiro ewilî ke Newroza Elkî de serê sînorê Mintiqayê Federalê Kurdistanî yo bi sloganê 'Wext wextê serkewtişî yo' ame wekerdiş. Newroza ke quntarê Koyê Katoyî de ame pîrozkerdiş, mesajê muhîm ê ke yewîyîye ameyî dayîş. Cinî bi cilê xo yê toreyî pêwa vayo serd de, derdora adirî de govende girewtî. Cinîyê ke şaristan û qezayan de cîya cîya ameyî şarê Elkî dir civat kerd û bi coşêke pîl Newroze xo pîroz kerdî."

 

Cinîyê ke Elkî de ciwîyenê hîs û fehmê xo ajansê ma rê ardî ziwan

 

'Wa neyarîye nêkerê'

 

Perîhan Temel, destkerdişê qiseyanê xo de wina kelecanê xo yê Newroze ard ziwan: "Wexto ke Newroze yena ez xeylêke keyfweş bena. Seba ma manaya Newroze cîyaya. Dimayê 8 serrî Elkî de Newroze yena pîrozkerdiş. Adirê Newroze bi coşêke pîl berz beno. Elkî ke serê sînorî de yo û heto bîn de PDK esto û hêrişê şarê xo keno. Ez venga Mesût Barzanî kena ke wa neyarîye Kurdan rê nêkero. Ganî Kurdî bibê yew û yewîyîya xo awan bikerê. Eke yewîye awan bibo, do na gonî vindero. Ma do bi berzkerdişê adirê Newroze yê serê sînorî de yewîyîya xo awan bikerê."

 

'Ma do her tim venga yewîyîye bikerê'

 

Hemaîl Cîn, dîyar kerd ke Newroze yena manaya azadî, aştî û seyyewbînîye û qal kerd: "Ma Kurdî bi serrano waştişê azadî û aştîye kenê. Ma her tim meydanê Newroze de waştişê xo anê ziwan. Ma nêwazenê Kurdî bêrê kiştiş. Neyarê Kurdan zêde yê û nika zî Barzanî neyarîya şarê xo keno. Barzanî bi xo zî Kurd o û ewro neyarîya Kurdan keno. Ma wazenê yewîyîya xo awan bikerê. Ma nêwazenê dadîyê Tirkî, Kurdî, Erebî û Çerkezî bibermê. Ma umîd kenê ke no Newroze bibo wesîleyê yewîyîya Kurdan. Her kes meydanan de ganî venga yewîyîye bikero. Ma umîd kenê ke na Newroze bibo wesîleyê azadî û aştîye."

 

'Wa fek neyarîye ra veradê'

 

Zeynep Temele dîyar kerd ke Newroze yena manaya serewedaritişî û wina nîyadîyayîşê xo ardî ziwan: "Ma bi coşêke pîl Newroze xo pîroz kanê. Ma tîya de bi coşêke pîl  adirê Newroze berz kerd. Newroza ma ê Kurdistanî ya. Newroze, Newroza ma Kurdan a. Her serre bi ameyîşê wisarî dir kelecanêke pîl keweno zerrîya ma û ma vengê xo yê serewedaritişî berz kenê. Ewro her cayî de Kurdî yenê qetilkerdiş. Başur de zî Kurdî yenê kiştiş. Barzanî neyarîya şarê xo keno. Ma wazenê wa fek na neyarîye ra û îxanetî ra verado. Çirê paştdayîşê Erdoxanî keno? Barzanî zî Kurd o. Na Newroza emsarî de ma wazenê azadî û aştî bêro ca û yewîyî awan bibo. Ma do bi Newroze îtîfaqê xo awan bikerê."

 

'Wa tepişteyî bêrê veradayîş'

 

Helîme Dûrsûn zî Newroza Şarê Kurdî pîroz kerd û dergî da qiseyanê xo: "Barzanî ewro neyarîya Kurdan keno û paştdayîşê neyarê Kurdan keno. La eke wina dewam bikero peynîya ey zî xiraba. O senîn eşkeno merdimanê xo bikişo? Ma Barzanî ra waştişê yewîyî û aştîye kenê. Kiştiş çareserî nîyo. Peynîya  her şerî çareserîyêke esta. Vera nê yewî zî ma wazenê wa wextêk lez de yewîyî bêro awankerdiş. Barzanî wa destê xo bido destê Kurdan. Berzanî serê rayîrê şaşî de yo û wa na rayîrî ra agêro. Ma na Newroze de zî venga yewîyîye kerd. Ma wazenê tepişteyî heme bêrê veradayîş û rewşa tepişteyanê nêweşan giran a. Wa berê zîndanan abibê û heme azad bê. Eke Şarê Kurdî  wurzo serê payan ke do azadî û yewîyî zî bêro ca."

 

'Wa adirê Newroze gurr û berz bibo'

 

Halîme Temel, bale ante serê pîrozîya Newroze: "Elkî de zî tewr peynîyê serra 2014î de adirê Newroze amebî wekerdiş û 8 serrî pey ra adirê Newroze hewêna ame wekerdiş. Ma bi wekerdişê adiro yewin o ke ma bi Newroza tîya, xeylêk kêfweş bî. Ma wazenê adirê Newroze her cayê bîn de zî gurr û berz bibo. Duştê heme manîyan de ma tewirê pîrozîya Newroze benê. Barzanî zî bîyo embazê AKP-MHPyî. No çîyo ke keno rast nîyo û çirê nê çîyan ro şarê xo keno? Venga ma Barzanî rê na ya ke fek na neyarîye ra wa verado û verê şarê xo de bo. Wa paştdayîşê wayan û biranê xo bikero! Ma wazenê îtîfaq û yewîyîya Kurdan awan bibo. Ma wazenê bi zerrêka weş e Newroza xo pîroz bikerê. Ma dadîyî weşîye û zerrîweşîye wazenê. Ma Kurdî bibê yew û Newroza xo bi yewîyîye pîroz bikerê. Newroze xoverdayîş o û xoverdayîşê Kurdan a."

 

'Ma na Newroze de waştişê yewîyîye kerd'

 

Qazê Cîn, yew cinîya bîne ya ke Elkî  ra ya venga yewîyîya Kurdan kerd û wina qisey kerd: "Bi serrano ma Kurdî venga yewîyîye kenê, la belê waştişê ma nîno ca. Ma wazenê Kurdî bibê yew û hemverê neyaran de hêzê xo bikerê yew. Wa Barzanî zî fek na neyarîye ra verado! Ma azadî û aştîye wazenê. Barzanî seba menfeatê xo neyarîya Kurdan keno. Ganî fek na neyarîye ra verado. Ma do tu reyêk fek waştişê xo yê  yewîyîye ra vera nêdê. Eke yewîye awan  bibayne ke do problemê Kurdan hel bibayne û azadî biameyne ca. Na Newroze de zî ma waştişê yewîyîye kerd. Heta yewîyî bêro ca ma do waştişê xo dubare bikerê."