RIHA - Çalakîya Emîne û Ferît Şenyaşarî verê Edlîyeyê Rihayî de domnena. Ferît Şenyaşar nobete de bale ante serê bêedaletîyî û wina vat: "Ma heqdar ê û dewaya ma bî dewayêka komele." 

 

Merdim û pawitoxê Parlementerê AKPyî Îbrahîm Halîl Yildiz di 14ê Hezîrane ya serra 2018ine de hêrişê dikanê keyeyê Şenyaşarî yê Pirsûsî kerd. Hêriş de mêrdeyê dadîya Emîne Şenyaşar û di lajê aye ameyî qetilkerdiş. Lajê aye Ferît Şenyaşar zî qirkerdişî ra bi birîndarî xelesîya bî. Seba tepiştiş û muhakemekerdena qatilan û veradayîşê Fadil Şenyaşarî, Emîne Şenyaşare û lajê xo Ferît Şenyaşar 9ê Adare ya 2021î de verê Edlîyeyê Rihayî de dest bi çalakîya Nobeta Edaletî kerdî. Çalakîya keyeyî di roja 371î de dewam kena. Emîne Şenyaşare vera problemanê weşîyîya xo nêeşka tewîrê nobete bibo. La Ferît Şenyaşar ame verê berê edlîyeyî û no pankart akerd: "Mêrde û di lajê mi nêweşxane de ameyî qetilkerdiş la tena merdimêke zî nêame tepiştiş. Serê fermanê serdestan ra, no 4 serrî yo lajê mi di hucreyê yewkesî de yeno vindarnayîş. Ez wazena lajê mi wextêke tewr kilm de bêro veradayîş." 

 

'Ma mafdar ê û dewaya ma bîya dewayêka komele' 

 

Çalakîye de Ferîtî teslaqê kitabêk ke hîkayeya keyeyî qal keno û yeno pawitiş ke do wextêke kilm de bêro çapkerdiş, wend. Welatijê ke edlîye ra vejîyayî zî şî serdayîşê nobete. Ferîtî dima ra zî qalê nobete kerd û wina vat: "No bî 371 rojî yo ke ma bi waştişê edaletî tîya de yê. Bi wesîleyê yewin serewextê nobetî, xeylêke pawitoxê heqê merdiman û rêxistinê huqûqî ameyî serdayîşê ma û paştdayîşî dayî ma. Dima ra zî Serekê Yewîyîya  Baroyê Tirkîyayî (TTB) R. Erînç Sagkan ame serdana ma. Soz da ma ke do hetê huqûqî ra hetkar bibo. Dimayê pêvînayîşî ma zî waşt ke bi serdozgerî dir pêvînayîş bikero û derheqê dewa de qisey bikero. La serdozgerî reyna seba xo bahaneyêk dîbi û rema. Sagkan, 7 saetan paweyê serdozgerî mend. Seba ke serdozgerî nê çî zanayîne, a roje nêame edlîye. Ma heqdar ê û dewaya ma bî dewayêke komelî. Bi milyonan kesî taqîb kenê. Seba nêçareserkerdişê nê serebûtî, yew parlamenterê AKPyî rîyê xo de nîveno ke şêro mîyanê şarê Riha. Waştişê ma oyo ke demêk tewr tay kilm de peynîya nê bêedaletî û bêhuqûqî bîyarê."

 

'Serdozgerî zî benê hemkarê nê qirkerdişî'

 

Dewam de Ferîtî dîyar kerd ke Nêweşxaneyê Dewlete yê Pirsûsî qirkerdişêk ame kerdiş û vat: "Kesê ke nê qirkerdişî kerdî do rojêke bêrê muhakemekerdiş. Serdozgerê ke qerarê nimitişî serê dewa dewam keno do bi kesê nê qirkerdişî kerd dir do bêro muhakemekerdiş. Ê, suc kenê. Ê zî benê hemkarê nê qirkerdişî."