COLEMÊRG - Diyar Ak ke Gever de demê qedexeyê tebervejîyayîş ke  79 rojî dewam kerdêne de ame qetilkerdiş, gumanbarê ey hema nêameyê vînayîş. Dadîya Dîyarî Mehsîma Akin wina vat: “Ez wazena dosyaya lajê mi reyna bêro akerdiş. Yê ke lajê mi qetil kerdî wa cezaya xo biancê.

 

Mabêne 2015-2016ine de tarîxê cîya yê Sûrê Amedî, Nisêbînê Mêrdînî û Cizîr û Sîlopîyê Şirnexî û sewbîna Geverê Colemêrgî de îdarekarîyê xoser ameyî îlankerdiş. Yew cayê ke pêrodayîşê xidarî ameyî ciwîyayîş, Gever bi. Gever de 13ê Tebaxa 2015ine de îdarekarîyê xoser ame îlankerdiş. Dimayê nê Yewîneyê Pawitişê Sivîl (YPS) 1ê Sibata 2016ine de awankerdişê xo îlan kerd. Dimayê nê qedexeyê tebervejîyayîşî ame îlankerdiş û her ke şi demê ci derg kerdî. Qeza de bi pêroyî 5 rey qedexe ame îlankerdiş û oyo tewr derg mabêne 13ê Adare û 29ê Gulana 2016ine de ame kerdiş û 90î ra zêdeyêr kesî dinyaya xo bedilna. Mîyanê kesê ke dinyaya xo bedilnayî, xeylê xo tutî bî.

 

Goreyê raporê ‘Tutê ke pêrodayîşan ra tesîr bîyê ê Çeleyê 2016ine, 26ê Temmuze heta peynîya 2015ine tewr tay 58 tutî pêrodayîşan de dinyaya xo bedilnayî. Nê tutan ra yew zî Dîyar Akino 15 serre yo.

 

Dîyar demê xoverdayîşî de seba derman bigîro vejîya teber û pêrodayîşan de seba xo binimno şi qata hîrêne ê awanî û uca de bi hîrê guleyan ame qetilkerdiş û awanî ra kewt. Dîyarî ke wedaritî nêweşxaneyê Dewlete ya Geverî dinyaya xo bedilna. Keyeyê ci 7 serrî yo seba gumanbar bêro vînayîş têkoşîn keno. Dadîya ci Mehsîma Akin dîyar kerd ke ganî qatilê lajê aye bêrê vînayîş.

 

Mehsîma dewam de vat, lajê ci seba pîyê xo rê derman bigîro vejîyayo teber û o wext vengê çekan eşnaweno û terseno. Mehsîma wina dewam kerd: "Seba nê xo şino nimneno û o wext yeno qetilkerdiş. Demo ke ma xebere girewt ma heme şî nêweşxane. O wext doktorî bi Dîyarî dir eleqeder bîne. Çend saete derbas bî vatî ke dinyaya xo bedilnayo. Ma dewa akerd. O wext ma ra vatî, ‘Êyê ke guleyan serê ma de birijnê, ma do vilan bierzê.' Dîyar tut bi. Wa homa nê zulmî qebûl nêkero."

 

'7 serrî ney 70 serrî zî derbas bo ez nêkena xo vîr ra' 

 

Mehsîma dewam de wina vat: “Pêwa ke 7 serrî derbas bi, dejê mi sey roja ewil o. Ez ewnîyena çara Dîyarî vînena. Lajê min o pîl tutê ey virazyayî, ma nameyê ci kerd Dîyar. Wexto ke ewnîyena ci ra Dîyarî xo vînena. Dejê zerrîya mi hema taze yo. Her siba ez vana qey newe Dîyarê mi şehîd kewto. Heta ez biciwî ez heqê xo gêrena. Ez tu wext lajê xo xo vîr ra nêkena. 7 serrî ney, 70 serrî zî derbas bibo ez xo vîr ra nêkena."

 

Wa dosya reyna abibo

 

Mehsîma vat, seba dosya newe ra abibo, şîya dozgerî û polîsan ci ra vato, ‘Hewldayîşê to veng o ma se kesê sey Dîyarî kiştê' û qiseykerdişê xo wina qedêna: "Ez wazena dosyaya lajê mi newe ra abibo. Wa kiştoxî cezaya xo biancê."