STENBOL - Zîndanê Cinîyan ê Şakranî de 30 tepişteyî bi behaneyê 'Qawişe çin a' qawişêke de yenê tepiştişî û coka ke ca çinî yo 6 tepişteyî erd de rakewenê. Merdima tepişteyan ra Zeynep Calihan a ke ajansê ma rê qisey kerd û vat, wa nê caardişî bêrê peynîkerdiş û venga hêsgirîye kerd. 

 

Tirkîya û mintiqa de rewşa tepişteyan û bi xusûsî zî rewşa tepişteyanê nêweşan her ke şino giran beno. Pêwa tehdayî ke ro tepişteyan  yenê kerdiş,  no wexto peyîn de tepişteyê ke zîndan de yê ciwîya xo bedilnenê zî humara înan zêdeyêr bîya. Pêwa hewldayîşê komeleyê heqê merdiman û  rayaumûmî zî selahîyetdar û Wezîrê Edaletî hemverê na rewşa  tepişteyan de bêveng manenê. 

 

Yew zîndanê ke ra binpaykerdişê heqan ci de zêdeyêrê zî Zîndanê Cinîyan ê Şakranî ya Îzmîrî ya ke 30 tepişteyî bi behaneyê 'Qawişe çin a' eynî qawişe de manenê û 6 tepişteyî zî coka ke ca çinî yo, erd de rakewenê. Dadîya Hatîce Calihan a ke zîndan de ya, Zeynep Calihan qiseyê ke kênaya aye telefon de ci rê kerdo ajansê ma rê pare kerd.

 

‘30 tepişteyî qawişêke de yê’

 

Hatîce Calihan ke rewşa zîndanî bi rayîrê telefonî bi dadîya xo Zeynep Calihan dir pare kerd, dîyar kerd ke înan rê ameyo vatiş ke do kulubeyêke telefonî bi dîmen qisey bikerê do înan rê bêro viraştiş û tepişteyê sîyasî zî nê qebûl nêkerdê. Zeynebe ard ziwan ke ê demê verî bi 3 mengan seba pêvînayîşê şîya zîndan, Hatîce ci ra vata, seba ke 30 tepişteyî kulubeyê telefonî nêwaştî qawîşêke de yenê tepiştiş û pêvînayîşê ke 11ê Adare de bi telefon kerdê zî diyar kerda ke rewşa 30 tepişteyan bi eynî hawa dewam keno.

 

‘Tepişteyî erd de rakewenê’

 

Goreyê zanayîşê ke Zeynebe kênaya xo ra girewta 3 mengan zêdeyêr o ke 30 tepişteyê sîyasî qawîşêk de yenê tepiştiş û seba ke ca çin o 6 tepişteyî zî erd de rakewenê. Zeynebe dîyar kerd ke wazenê bi nê caardişan tutanê înan bêzar bikerê û wina dewam kerd:  "Vernîya bi 2-3 mengan mi kênaya xo pêvînayîşê akerde de dî û o wext zî nê problemî bî. Demo ke ma 11ê menge de zî qisey kerd û vat ke rewşa înan baş nîya." Zeynebe dadîya xo rê neql kerdo ke înan seba  na rewşa tepişteyan muracatê sucî kerdê la tu cewab nêgirewtê.

 

‘Ganî şert û mercî bêrê başkerdiş’ 

 

Tewr peyîn Zeynebe qiseykerdişê xo de vat: "Vernîya ke  qawîşan bikerê yew tepişteyê ke cezaya înan nêqedîyaya û tahlîye bîyê estê. Dimayê ke tepişteyî tahlîye bîyê qawîşan de cigêrayîş ameyo kerdiş.” Zeynebe dewam de vat, beno ke pêvînayîşê bêro de  Hatîce nêeşko telefonê înan zî bikero û vat ke rewşa tepişteyan tehluke de ya.”