Rojda Aydin

 

ŞIRNEX - Sîyasetmedarê cinî derheqê weşîya sîyasetmedare Aysel Tûglûk de qisey kerd û vengdayîşê serbestveradayîşê ci kerd. Bêrîvan Kutlu, dîyar kerd ke mekanîzmayê huqûqê mîyanneteweyî lazim o seba Aysele gamêke bierzo. Guler Tunç zî dîyar kerd ke qerarê ATKyî zî sîyasî yo.

 

Zîndanê herême û Tirkîya de rewşa tepişteyê nêweşan her ke şino giran beno. Aysel Tugluk zî yew nê tepişteyan ra ya. Pêwa teşhîsê nêweşîya demansî ameya dayîş zî Sazgehê Tipê Edlî (ATK) derheqê ci de  raporê "Eşkena zîndan de bimana" da. Rewşa Aysele roj bi roje giran bena. Qerarê ATKyî hetê cinîyan ra ame şermezarkerdiş û cinîyan waştişê veradayîşî kerd.

 

Hemşaredara Cizîre ya Şirnexî ya ke vera ci qeyûm amebi tayînkerdiş Bêrîvan Kutlu û aktîvîsta Tevgerê Cinîyan ê Azadan (TJA) ya Guler Tunç zî derheqê Aysel Tûglûk de qisey kerd û vengdayîşê veradayîşî kerd.

 

‘Wazenê ma gane gane bikişê’

 

Bêrîvane dîyar kerd ke rewşa Aysel Tûglûk înan xeylêk dejneno û wina vat: “Kesêke na rewşe de kam beno wa bibo merdim nêeşkeno rapor bido û vajo, ‘eşkena zîndan de bimana.’ Nêzdîbîyayîşê hemverê cinî û sîyasetmedarê kurdî sewîyeya wehşetî nîşan da. Ma nê wehşetî şermezar kenê. Bi mengan avûkat û doktor seba rewşa Aysel Tûglûk vegdayîşê ‘kesêke na rewşe de yê nêeşkenê zîndanî de bimana’ kenê. Kesêke normalbî zî seba şert û mercê zîndanî de nêeşkenê bimanê. Aysele hem hetê fîzîkî û hem zî hetê psîkolojî de rewşa bîye bi tesîr bena. Helwestê hemverê Aysele nîno qebûlkerdiş. Îqtîdarê ewro wazeno ke her wareyî de cinîya kurd û sîyasetmedarê kurdî bikişê. La dîyar o ke îqtîdar û sîyasetê Tirkîya çiqasî merdimayî dûr mendo.”

 

‘ATK qerarêk sîyasî da’

 

Guler Tunç dewam de vat: “Seba nêweşiya xo, vîrê xo vînî kerda. No bi aşman o serê medyaya dijîtale de derheqê rewşa Aysele de bangawazî yeno kerdiş. ATKyî derheqê, ‘Eşkena zîndan de bimana’ da. Hukmatê Dewleta Tirkî, seba ke Aysel Tûglûk kurd a û cinî ya qerarêko bi nê rengî û sîyasî da. ATKyî zî qerarêk sîyasî da.” 

 

‘Bi merdiş dir rî bi rî verdenê’

 

Gulere bale ant serê tedayan û vat: “Sey tevgerê cinî û sîyasetmedarî ma her çiqasî bangawazî û çalakîyan bikerê zî çi heyf na cografya de kesê ke nêweş û tepişteyî demê ke kurd bê tu nêeşkenê bidê ciwîyayîş. Bêedalet û bê huqûqî resayo tewr cor û nê çî zî dewam keno. Nimûneyê ke vîrê ma de ca girewto yew zî Garîbe Gezer a. Garîbe Gezer seba ke bi desteştişî dir rî bi rî mend û bi hawayêke bi guman dinyaya xo bedilna. Hukmat û îdarekarê zîndanan, tepişteyan merdişî dir rî bi rî manenê û qetil kenê.”

 

‘Ma do seba Aysele têkoşîn bikerê’

 

Gulere tewr peyîn wina vat: “Ma sey sîyasetmedar û tevgerê cinîyê kurdî vengdayîş kenê ke ganî Aysele bêro veradayîş. Sewbîna ganî heme tepişteyê nêweşî bêrê veradayîş. Reyan seba veradayîşê înan zî ganî ma vejîyê wareyan û wazenê xo bîyarê ziwan. Cinîyê kurdî seba ke wayîrê nasnameyêk ke yê bi neyartî dir rî bi rî manenê. Şexsê Aysele de wazenê ke cinîyê kurdî bê boye verdê û bikişê. Vîrê Aysele vîrê ma yo. Ma seba Aysel Tûglûk, Garîbe Gezer, Ayten Beçet û cinîyê ke demê peyîn de zîndanan de ameyî qetilkerdiş, xo ver bidê.”