Yara Kendeş

 

KOBANÎ - Derheqê çalakîya nobetî ya keyeyî bi waştişê meyîtê tutanê xo bigîrê verê Berê Sêmalkeyî de dabî destpêkerdiş, endama Koordînasyonê Kongreyê Starî, Newroz Mislîm a ke tewirê çalakîya çadire bîya wina vat: "Cinîyê verê Berê Sêmalke de bi têkoşîna xo mesajêke dayî dinya." 

 

Menga Tebaxe de bi hêrişê hêzê PDKyî Xalifanî de 5 têkoşerê azadîye dinyaya xo bedilna bî û heta nika zî cenazeyê înan teslîmê keyeyê înan nêameyî kerdiş. Ê têkoşeran ra di kesî zî Rojawanê Kurdistanî ra yê û seba keyeyî cenazeyê tutanê xo bigîrê, 5ê Teşrîna Verîne de bi serekîya Meclîsa Keyeyê Şehîdan,  çalakîya çadirakerdişê verê Berê Sêmalke de amebî destpêkerdiş. Roja ke çalakîye dest pêkerda heta roja peynî sazgehî û dezgeyê Îdarekarîya Xosere, Rêxistina Kongreya Stare û Komele ya Sivîlî beşdarê çalakîye bîyê. Bi hezaran merdimî beşdarê çadira çalakîye bî û çalakîya çadire, roja 111ine de bi malûmatêke peynî bî. 

 

Derheqê na babete de endama Koordînasyona Kongreya Starî ya Mintiqaya Firatî, Newroz Mislim a ke tewirê çalakîya çadire bîya ajansê ma rê erjnayîş kerd. 

 

‘Cinî verê Berê Sêmalke de yê bi têkoşînê xo mesajêke dayî dinya’

 

Newroze destpêkerdişê qiseyê xo de bale ante serê têkoşînê dadîyan seba cenazeyê tutanê xo bigîrê û wina vat: "Îdarekarîya Başur cenazeyê keyeyan teslîmê înan nêkerd. Hemverê na serebûtî de dadîyan çalakîya nobete verê Berê Sêmalke de organîze kerd. Cinîyê Bakur û Rojhelatê Sûrîyeyî pêroyî tewirê na çalakîye bî. Na çarçewayî de cinîyan bi têkoşînê xo mesajêke dayî dinya. Na çalakî zî bi rayîrê resnayîşî ame teqîbkerdiş ke bi çi  metod û çend rojan dewam kerd." 

 

‘Vimdertişê dadîyan bî fînak’

 

Newroze, mîyanê qiseyanê xo de dîyar kerd ke a seke Kongreya Stare ya Mintiqayê Firatî beşdarê na çalakîye bîya wina qiseyê xo dewam kerd: "Ma seke Kongreya Stare ya Mintiqayê Firatî beşdarê na çalakîye bî û ma malûmatêke zî çalakîye de da. Ma zî seke cinî waşt bi tewirbîyayîşê xo ma vindertişê xo yê kaleka dadîyan de nîşan bidê. Ma waşt ma hetkarî bidê ê dadîyanê têkoşeran û xoverdaran û ma heme cinî yew ê. Na çalakî Bakur û Rojhelatê Sûrîyeyî de vîrazîya bî. Ma bi mesajê xo mojna ke şehîdê ma zî estê û na çalakîye ya dadîyanê nê şehîdan bî. Çi heyf ke bi na serebûte PDKyî dîyar kerd ke no hereketo ke kerdo teber sîyaset û rewşa esteyî yê serê nê herdî de yo. Na serebûte girêdayeyê merdimbîyayîşî ya. Dadîyan pêwa emrê xo yo pîl zî xover da û mesajêke dayî. Vindertişê dadîyan bî fînak."

 

‘Hêzê dadîyan bi tu rengî nîno şikinayîş’

 

Newroze peynîyê qiseyanê xo de dîyar kerd ke, beno  na serebûte virazîya û kezeba dadîyan zî vêşa la na serebûte hêzê înan sist nêkena û wina vat: "Hêzê dadîyan bi tu rengî nîno şikinayîş. Şehîdê ê dadîyan hêzê ka pîl e dayî dadîyan û rihê têkoşîne înan rê pîlîyêr kerd. Têkoşîna dadîyan resa sewîyeyê ke rewşa xo ya weşîyîye vîr ra bikerê. Ê dadîyî bi vindertişê xo her cinîye rê bîyî fînakî. Çalakîya verê Berê Sêmalke de mintiqayê  bînan de bi metodê tewir bi tewir dewam kena û tu reyî nêvindena. Na babete babetêka merdimî ya, pêroyê sînoran derbas kena. Lazim keno ke Hukmatê Başurî zî baş ro nê dadîyan biewno, bizano ke nê şehîdî seba welatî û şarê nê welatî têkoşîn kenê. Rûmetîya  mi nê dadîyan rê û cinîyanê aştîwazan rê zaf pîl a ke bi nê rengî têkoşînêke duştê rayîr û metodanê Hukmatê Başurî dayî kerdiş."