“Do cinî bi weşikbîyayîşê xo hêz û bawerîya xo azadîya xo bi dest bikerê, do bi têkoşîn û xoverdayîşê xo nameyê xo na seserre de binusê do êdî bibê sembolê azadîya dinya.”

 

Qeder Kar

 

Adare, menga xoverdayîş, têkoşîn û serewedaritişê şaran a. Wexto ke ma vanê adare keyfxweşî, heskerdişê merdiman ê hemverê xoza yeno vîrê merdimî. Seba nê menga adare bi her şiklê xo yê weşik mîyanê şarê Kurdî de yena heskerdiş û cayêk xo yê xususî esta. Destpêkê adare ra heta peynîya adare heme pirrî xoverdayîş û têkoşîn a. Destpêkê adare rihê cinîyê xoverdayox ke 8ê Adare de kewenê meydanan û vengê xo dinya de vila kenê, sewîyeya tewr cor de yê. Wexto ke ma qalê adare kenê destpêkê roja cinîyan ê dinya 8ê Adare yeno vîrê merdiman, cinî bi her şiklî na roje bi reng û vengê xo xemilnenê. 

 

Tewr giring zî oyp ke cinî na roje bi cil û belgê xo yê kurdewarî xemilnenê. Kulturê kurdan kulturêke kan o, ziwanê înan cil û belgê înan nêşibyenê tu netewan. Ma vat ke 8ê Adarê roja cinîyan ê dinya de her netewêke bi şiklê xp yê cîya na roje pîroz kenê. Cinîyê kurdî na roje bi xususî bi cilanê xo yê kurdewarî pîroz kenê. Cîyayîya cinîyan ê kurdan mîyanê dinya de oyo ke bi rihê têkoşîn û xoverdayîşê xo yê a roje pîroz kenê. Seba ke cinîya tewr serewedarite û hemverê îqtîdarî têkoşîn kerdê cinîyê kurdî yê. Seke ke Rayberî vato, a ke şer kena, azad bena û a ke azad bena yena heskerdiş. Seba nê cinîya kurde her wext ameya heskerdiş û nimûne ameya girewtiş û eke merdim biewno înan ra merdim mîyanê xemil û rewşa înan de Kurdistana azad û cinîya azad vîneno. Senîn ke Kurdistan bi weşikîya xo, koyanê xo, deşt, herre û çemanê xo yeno naskerdiş û ma cinîyê kurdî zî weşikîya înan sey bedewbîyayîşê Kurdistanî vînenê.

 

Dadîyê ke bi serran multecîtî, zehmetî û heme dej antî,  dadîyê Wargehê Mexmûrî bi heme zor û zehmetiyan bi dejê ke antê xo pawitê xoverdayîş û têkoşînê hemverê zilm û nêheqî. Cinîyê ke tewr zêde fek kulturê xo, bîyayîşê xo û îradeyê xo ra vera nêda cinîyê Mexmûrî ke merdim cuye û xoverdayîşê înan temaşe keno, hêz înan ra gêno. Beno ke welat ra dûr kewtî la welat her tim mîyanê xo de ciwîyayî. Şarê wargehî û dadîyê wargehî ne bi hesrete rojêke do welat serê herra xo de biciwîyê û azadkerdişê welatê xo cuyenê. Oyo ke ma rê tewr zêde danê hîskerdiş dadî û tutê wargehî yê beno ke tutê welatê xo qet nêdîyê la bi heskerdiş û nasnayîşê welatê xo pîl benê û ver bi ameyoxî de şinê ke înan serê lingan de gêno û xoverdayîşê înan pîl keno no yo.

 

Rihê înan yê tewr pîl ke mîyanê her şert û mercan de înan resneno qilê serkewtişî, bi zerrîya germîyê xo, hêz û bawerî yê xo heme komelan rê benê nimûne. Wexto ke ma qalê serkewtişî kenê dadîyê kurdî taybetî hetê cil û belgê xo yê kurdewaride serkewtişêke pîl bi dest kerdê, seba ke dadîyê tewr zêde bi kulturê xo rê girêdayê û kulturê xo vînî nêkerdê dadîyê kurd ê. Mîyanê her roşanêke de her şahîyêke de bi cilê xo yê  kurdî xemla xo xemilyayî, wexto ke merdim ewnîyeno înan ra mîyanê xemil û rewşa înan de weşîkîyêk bê hempa vîneno. Bi her metodî bi merdimî danê hîskerdişê ke cîyayîyêke înan her kesi esto. Do cinî bi weşikbîyayîşê xo hêz û bawerîya xo azadîya xo bi dest bikerê, do bi têkoşîn û xoverdayîşê xo nameyê xo nê seserrî de binusê êdî do bibê sembolê azadîya dinya.