Medya Uren

 

ÊLIH - Kesayetê Raberê PKKyî Abdullah Ocalanî de serê heme tepişteyê sîyasî û şarê kurdî de tecrîdo girankerde yeno kerdiş. Cinî hemverê tecrîdî de bi reaksîyon ê û vanê: "Şikinayîşê tecrîdî zî qîm nêkeno, ma azadîya Birêz Abdullah Ocalanî wazenê. Seba nê zî ganî ma sere wedarnê.”

 

23 serrî yo tecrîdo girankerde serê Rayberê PKKyî Abdullah Ocalanî de yeno kerdiş dewam keno û tecrîdo bîyaye serê heme tepişteyê siyasî û şarê kurdî de sey metodêk yeno kerdiş. Cinîyê sîyasetmedarî yê bi nameyê Sebahat Înal Acar, Berjîn Altan û dayîka tepişteyî Hîdayet Oy zî derheqê tecrîdî de reaksîyonê xo ramojnayî û vatî, êdî lazimî bi azadîya Rêberî esta.

 

‘Tecrîd zilm û zilmkarî yo’

 

Vervatoxa Masaya Îslamî ya HDPyî Sebahat Înal Acar tecrîd bi nê rengî şîrove kerd: "Tecrîd yeno manaya qirkerdişê miletê kurdî. Nê ra giranêr çîyêk çin o. Nê hewldayîşê tecrîd û hêrişê sey do bi amancê çinkerdişê ma de yenê kerdiş. Kurd, tirk û şarê ke tîya de ciwîyenê,  temamê xo tecrîd ra bi bandor benê û para xo gênê. Tecrîd zilm o û yê ke kenê zî zilimkar ê. Bê guman yê ke nê zilmî kenê zî wayîrê wijdanî nîyê û ne zî wayîrê bawerîyêke yê. Ne îslamiyet de ne zî dînêke de nê kerdişî çin ê û nînê qebûlkerdiş."

 

‘Ganî kurdî aya bê’

 

Sebahate dewam de wina vat: "Teberê Rojhelatê Mîyanên de lazim o ma şarê kurdî aya bê. Ganî bi vatişê zirar nêreseno mi, ma xo nêxapênê. Nika yê ke  tu eleqeyê înan bi sîyasetî dir çin o zî reyna tecrîdî ra tesîr benê. Ewro yê ke seba nasnameyê kurdewarî têkoşîn kerdê zîndanan de yê û mîyanê tecrîd û îşkenceyî de xo ver danê. Sere de Birêz Abdullah Ocalan û heme tepişteyê sîyasî îradeyê ma yê û ganî ma wayîrê îradeyê xo vejîyê. Ma êdî welîya sîya serê xo ra bierzê û aya bibê. Dem demê serewedaritişî yo. Ma wurzê û zindanan veng bikerê. Dewaya ma dewayêka heqdar a.”

 

‘Do azadîya ci aştîya şaran bo’ 

 

Hemsereka HDPyî ya qezaya Hezoyê girêdayê bajarê Êlihî Berjîn Altan zî wina vat: "Ma rewşa Rêberî ra bi guman ê. Ne avûkatî ne zî keye eşkeno pêvînayîş bikero. Binpaykerdişê heqan ê pîlî yenê ciwîyayîş. Na  rewşe nîna qebûlkerdiş û lazim o peynî bîyarê. Tecrîd her ke şino tesîr serê heme cuya ma de keno. Şer, krîz û kaosê bîyaye zî ci dir tewr zêde benê û yewbînan ra dûr nîyê. Seba nê zî ma vanê şikinayîşê tecrîdî zî qîm nêkeno. Ganî ma azadîya Birêz Abdullah Ocalanî biwazê û seba nê zî bikewê mîyanê hewildayîşî. Senîn ke tecrîd beno sebebê krîzê pîlî, do azadîya Rayberê zî bibo sebebê aştîyêk mende.”

 

‘Ma azadîya Rayberî wazenê’ 

 

Dadîya tepişteyan û Dadîya Aştîye Hîdayet Oy zî wina vat: "Ma sere de azadîya Rayberî û heme tepişteyê sîyasîyan wazenê. Bi taybetî zî xeylêk tepişteyê sîyasî  bi nêweşîyê giran kewtê, ganî lezabez bêrê veradayîş. Waştişê ma tena edalet o. Wa tecrîdê serê Rayberî wedarnê ke do bibo sebebê aştîyêk mende. Bi vatişêk ey do nê adirî bitefêno. Ma pey dewaya tutanê xo de yê û waştişê înan ra anêgêrenê. Wa êdî şer, penabertî û feqîrî nêvirazyo.”