Hîkmet Tunç

 

WAN - Wan de mitîngê 8ê Adare de coşê cinîyan ke qet nêvindert, serê azadîya Rayberê PKKyî Abdullah Ocalanî de vindertî. Cinîyan vatî: "Ma do bi rihê xoverdayîşê 8ê Adare, bi cil û belgê xo yê Kurdî û bi tilîlîyanê xo meydanê 21ê Adare de bê." 

 

Wan de mitîngê 8ê Adare ya Roja Cinîyan ê Dinya de Parka Aştîyî ya Mûsa Anterî de kerdiş û bi seyan cinîyî bi cil û belgê neteweyî, bi sloganî û flamayî cayê xo girewtî. Mitîngo ke qet coşî ci ra kemî nêbî û kelecan xeylêk pîl bî de, cinîyan bale ante serê tecrîdo giran o ke serê Rayberê PKKyî Abdullah Ocalanî de yo, şîdeto ke serê cinîyan de yo, rewşa tepişteyan ê nêweşan û krîzê ekonomîye. 

 

Cinîyan dîyar kerd ke 8ê Adare seba înan wayîrê manayêka pîl a û vatî do bi eynî kelecanî şêrê 21ê Adare. 

 

Zeynep Abî: Ganî êdî tu cinîyêk nêro qetilkerdiş. Cinîyê tepişteyî ganî lezkî bêrê veradayîş. Wa berê zîndanan bêrê akerdiş. Sere ra Abdullah Ocalan û heme tepişteyê sîyasî ganî bêrê veradayîş. 

 

‘Ê ke paştdayîşê şerî kenê, şermezar kenê’

 

Bahar Abî: Bi têkoşîne ma eşkenê ser o bikewê. Ma şer nêwazenê. Ganî lezkî aştî bêro ca. Ez sewbîna merdimê ke paştdayîş danê şer şermezar kena. Wa  serekê ma lezkî bêro veradayîş. Wa berê zîndanan bêrê akerdiş. 

 

‘Serekê ma cinî azad kerd’

 

Şehrîstan Saribûlak: Serekê, ma cinî azad kerdî. La ê hewl danê ke cinîyan reyna bigîrê binê tehdayî. Wa cinîyan serbest veradê. Êdî bes o. Ma zilm nêwazenê. 

 

‘Do cinîyî dinya bibedilnê’

 

Zehra Yîgît: Ma do cinîyê ciwanî rojanê ameyoxan awan bikerê. Cinî eşkenê goreyê zerra xo cilan xo ra bikerê. Eşkenê vatişanê xo vajê. Hêzê cinîyan ê ke dinya bibedelnê esto. Ez 20 serrî ya. Ez bawer kena ke hêzê ma yê dinyayî bibedelîyo esto. 

 

‘Ma bi hêzê xo bawer ê’

 

Melek Ocakçî:Seba azadîye çi destê mi ra bêro ez o bikerî. Ma nêtersenê û bêveng nêmanenê. Ma cinîyî xeylêke xurt ê, hêzê ma yo ke bibedelîyo esto. Ma bi hêzê xo yo xoser bawer ê. 

 

‘Ma bi hêzê 8ê Adare ra ameyo girewtiş, şinê 21ê Adare’

 

Hanim Dînç: Wa tepişteyê sîyasî bêrê veradayîş. Ma wazenê serekê xo dir ciwîyayîşêke azad biciwîyê. Bi hêzo ke ma 8ê Adare ra girewto, ma do şêrê 21ê Adare. 

 

‘Fitratê ma de xoverdayîş esto’

 

Havîn Varhan: Ma tever de vînenê, şîdetê polîsan û tehdayê dewlete. Şîdeto tewr pîl no yo. Cinîyan ra tersenê. Vera ke zanenê, fitratê ma de xoverdayîş esto. Ê çiqas tehdayan bikerê wa bikerê ma do xover bidê. Ma veng ro heme cinîyanê ciwanan kenê. Wa her cayî de duştê şîdetî de sere wedarê. 

 

‘Ma do 21 Adare de meydanan de bê’

 

Evîn Oklû: Ma newe nêkewenê meydanan. Ma her tim meydanan de bî. Ma do bi qerarbîyayîşê 8ê Adare şêrê 21ê Adare. Ma do cil û belgê xo, bi tilîlîyanê xo meydanê 21ê Adare bixemelnê. 

 

‘Heta cinî azad nêbo komele zî azad nêbeno’

 

Nezahat Gur: Wa cinî azad bê. Wa têreyde têkoşîn bikerê. Wa veng û serewedaritişê înan bibo. Ma şîdetê serê cinîye qebûl nêkenê. Wa cinîyî meydanan de bê. Ma qetilkerdişê cinîyan qebûl nêkenê. Heta cinîyî azad nêbê komele zî azad nêbeno.

 

‘Wa bibê yew û azad bê’ 

 

Şîrîn Gur: Cinî û Kurdî wurzêwe serê payan do azad bibê. Ma do her wareyî de vengê xo berz bikerê. Ma do di Newroz de vengê xo seba azadîye vejê. 

 

‘Wa tecrîd wedarîyo’

 

Feleknas Tîmûr: Rayberê PKKyî Abdullah Ocalan ancax bi têkoşîna ma eşkeno azad bibo. Wa tecrîdê  serê Abdullah Ocalanî wedarîyo. Ma cinîyî di 21ê Adare de do vengê xo berz bikerê.