RIHA - Nobeta Edaletî ya Emîne û Ferît Şenyaşar ke verê berê Edliyeyê Rihayî de dewam kena, roja 364ine de ya. Emîne ke waştişê edaletî kena wina vat: “Serrêke yo ma seba her kesî edalet wazenê.”

 

Emîne Şenyaşar ke mêrde û di lajê ci 14ê Hezîrana 2018 de qezaya Pirsûsî ya Rihayî de hetê avûkat û merdimê Parlamenterê AKPyî Îbrahîm Halîl Yildiz ra ameyî qetilkerdiş, pêwa lajê xo Ferît Şenyaşar ke eynî hêrişî de birîndar bi, vernîya Edliyeyê Rihayî de çalakîya xo dewam kena. Çalakî 9ê Adara 2021î dest pêkerdibî.

 

Emîne Şenyaşar vat, "Serrêke yo ma seba her kesî edalet wazenê. Serrêke bîn zî dewam bikero, ez o tîya de bî. Heta ke lajê mi bêro veradayîş ez o tîya de bî. Lajê mi zîndan de yo, ma tîya yê. Kiştoxî zî bi serbestî gêrenê. No çi edalet o? Na çi dewlet a? Veng dana her kesî ke 9ê Adare de bêrê tîya û waştişê edaletî bikerê.”