Rojda Aydin 

 

ŞIRNEX - Esma Ayaz ke 23 serrî yo Zîndanê Cinîyan ê Şakranî yê Îzmîrî de tepişte ya, bi rayîrê telefonî ajansê ma rê mesajê 8ê Adare şawit. Esma, mesajê xo de vat: “Bi coşê wisarî 8ê Adare bi ruhê Clarayan, Rosayan, Sarayan, Besêyan, Semayan û heme cinîyan ê kurdan ê têkoşer pîroz kenê. Bêvengî cinîyan kişena û qîrînayîşê cinîyan azad keno.”

 

Bi minasebetê 8ê Adare Roja Cinîyan ê Dinya bajaranê Kurdistan û Tirkîya de xebate 8ê Adare ke ameyî destpêkerdiş bêmabên dewam kenê. Pêwa cinîyê ke teber de bi coş û kelecanêko pîl 8ê Adare pêşwazî kenê, tepişteyê cinî zî binê teda û zordariyan de a roje  pêşwazî kenê. Tepişteyê ke bi tedayan dir rî bi rî manenê, yew zî tepişteya bi nameyê Esma Ayaz ke 36 serrî yo ceza ci rê ameya dayîş û 23 serrî yo zî tepişte ya. Esma heta nika 8 rey ameya sirgunkerdiş û nika Zîndanê Cinîyan ê Şakranî yê Îzmîrî de yena tepiştiş. Esma bi rayîrê keyeyê xo serê nameyê tepişteyê cinîyan yê Şakranî mesajê 8ê Adare ajansê ma rê şawit.

 

‘Bêvengî cinîyan kişena û qîrayîşê cinî azad kena’

 

Esma, bi rayîrê telefonî mesajê 8ê Adare ke şawit wina vat: “Ma heme cinîyê ke hemverê sîstemê faşîstî rê xo ver danê û qet sere nêtewênenê bi dil û can silam kenê. 8ê Adare Roja Cinîyan ê Dinya pêro cinîyê ke wareyan vengê xo berz kenê, pîroz bo. Tarîx de cinî tim bîya hêzê rayberê têkoşînê azadîye. Demê tewr tarî de cinîyan bi têkoşînê xo rayîrê komelî roşn kerdê. Seba nê sebebî ke heme sîstemê faşîst hêrişê cinîyan kenê. Her roje bi desan cinî yenê qetilkerdiş û qetilkerdişê cinîyan, qetilkerdişê cuye û komelî yo.”

 

‘Sîstemo faşîst vengê cinîyan ra terseno’ 

 

Esma tewr peyên wina vat, " Heme sîstemê faşîstî veng  û qîrayîşê cinîyê xoverdayoxan ra tersenê. Hemverê heme ters û tedayan bi israr ma do zî vengê xo her û her berz bikerê. Ma serê nameyê heme embazanê cinîyan ê esîrgirewte heme têkoşêrê ke ewro meydanan de bi tililî û huyayîşê xo dêsê tersî rijnenê, bi zerrîyêka tewr germ silam kenê. Bi coşê wisarî ma 8ê Adare bi ruhê Clarayan, Rosayan, Sarayan, Besêyan, Semayan û heme cinîyê kurdî yê têkoşer pîroz kenê. Bêvengî cinî kişena û qîrayîşê cinî azad kena. Biciwîyo 8ê Adare. Cinî, ciwîyayîş, azadî. Silam û rêzê şoreşgerî heme cinîyanê kurdan rê.”