Sema Çaglak-Şîrîn Çinar

 

AMED - Vurîye Tekîn, seba debara xo bikero Pîranê Amedî de nanê tewqe pewjena û roşena. Vurîye ke 4 serrî yo nê karî kena wina vana: "Zîhnîyetê camêrdan werte de yo la ganî cinî zî bizano û qîmet bido xo û her tewir têkoşîn bikero."

 

Cinîyê ke her wareyê cuye de  ca gênê, tesîrê xo nê wareyî de kenê. Pêwa zor û zehmetîyê karî, hemverê fehmê camêrdan zî xo ver danê. Seba nê sebebî cinî bi her hawayî têkoşîn kena. Cinîyê ke bi her hawayî têkoşîn kenê hêz û bawerî dana cinîyanê derûdorê xo zî. Yew zî nînan ra Vurîye Tekîn a. Vurîye Pîranê Amedî de debara xo bi pêwtişê nanê tewqe kena. 4 serrî yo nê karî kena. Vuriye ajansê ma rê qalê xo kerd.

 

‘4 serrî yo nanê tewqe pewcena'

 

Vurîye dîyar kerd ke ê vernîya qeyûmî parqê şaredarîye de xebityaya la dimayê ke qeyûm tayînî şaredarî ameya kerdiş uca ra vejîyaya û bi pereyê ke xo rê arêdabî pê dikanê nanê tewqe akerda. Vurîye wina vat: “Mêrdeyê mi nika bêkar o û tena hamnanî karê hingdarî keno. Sewbîna lajê mi zî bê kar ê. Coka mi zî waşt ke ez karêke bikerî û bi no hawa debara keyeyê xo bikerî. 4 serrî verê mi qerar da ke ez nanê tewqe viraznî. Karê ke kena çi heyf zehmetîyê ci estê. Ez bi nê karî tena eşkena debara xo yê rojane bikerî. No karêke yo ke ez pere arê bidî nîyo."

 

Tesîrê krîzê ekonomî

 

Vurîye wina vat: "Mi verê tewr zêde nanê tewqe rotêne la êdî seba krîzê ekonomî zêde nêeşkana biroşî. Seba karê ke ez kena, ez zêde ceyran dana şixulnayîş. Menga verê ceyranê min ê seba nane tewqe 240 TL ame. Ez tena 10-15 rojî amebîya tîya, hende ceyran zêde ame. Mi nê ra çîyêk fam nêkerd."

 

'Zîhnîyetê zilaman werte de yo'

 

Vurîye dewam de wina vat: “Ez serê siba rew aya bîya û dest bi karê xo kena. Karê xo ra zaf hes kena. Gama ke karê xo qedênena, şina keye û çimê mi pey ra nêmaneno. Gama ke keda bi destê to bo, cinî tewr zêde wazena bixebityo. Seba ke merdim wextê xo dana û ci dir eleqedar bena. Zîhnîyetê camêrdan werte de yo. Bi çend vatişê xo, eşkenê heme keda cinî veng vejê. Coka ez nê het ra xeylêk kewena munaqeşeyan. Cinîyê ke xoser xebityenê, mînetê camêrdan nêkenê. Mîyanê komelî de hişmendîyêk şaş esto ke yeno vatiş ke camêrdî cinîyan ra serdesttir ê. La cinî hende kede dana senîn camêrdî hende serdesttir benê. Cinî komel awan kena. Fikr û hişmendîyê komelî cinî awan kena."

 

‘Wa cinî xo nas bikerê û qîmet bidê xo'

 

Vurîye, tewr peyîn wina vat: “Vengdayîşê mi cinîyan oyo ke wa cinî vernî de xo nas bikero û qîmetê xo bizano. Cinî xeylêk bi qîmet û erj a. Tu gane cinî ra qîmetdar nîyo. Ez bi şexsî nêvena, ez pêroyî de fikiryena cinî cuye awan kena. Komelî rê aya ke form dana cinî ya, a ke perwer de dana cinî ya. Ma heme cinîyan rê bi minet ê. Wa cinî qîmetê xo bizanê û xo mûxtacê tu kesan nêkena. Wa cinî nêverdê ke camêrd hukmê xo serê înan de bikerê."