Rojda Aydin  

 

ŞIRNEX - Cinîyê Botanijî do 8ê Adare de Meydanê Newrozî yê Silopiyî de kom bibê. Cinîyan dîyar kerd ke do bi rihê Binevş, Bêrîvan, Asya, Fatma, Sêvê û Pakîze vejîyê meydanan û azadî biqîrê. 

 

Çalakîyê 8ê Adare Botan de bêmabên dewam kenê. Cinîyê  Botanijî amadekarîyê xo yê seba mîtîngê Silopî dewam kenê. Cinîyê ke ajansê ma rê qisey kerdî dîyar kerdî xoverdayîşê Binevş Egal, Bêrîvan Cizîre, Asya, Fatma, Sêvê û Pakîzeye meydanan de cayê xo bigîrê. Qiseykerdişê xo de vengdayîşê tewrbîyayîşê cinîyan ame kerdiş.

 

'Ma do 8ê Adare de Meydanê Newrozî de bê'

 

Sereka Komîteya Amadekarî ya 8ê Adare û Hemseraka Partîya Demokratîke ya Şaran (HDP) ya Şirnexî Sabuha Akdag, dîyar kerd ke 8ê Adare seba cinîyê Botanî û dinya wayîrê rojêke girîng o û vat: "Hemverê şîdet, tacîz, tecawuz û polîtîkayê ke serê cinîyan de yenê kerdiş, ma do 8ê Adare de cewabêke xurt bidê sîstemê camêrdî. Wexto ke merdim vano Botan bi xoverdayîşê Sêvê, Pakîze, Fatma, Asya û Bêrîvane yeno naskerdiş. Seba nê ma bi rihê cinîyê xoverdayoxan 8ê Adare pêşwazî kenê. Ma wazenê cinîyê Botanî 8ê Adare de biherikyê meydanê ma yê Silopî. Ma do 8ê Adare de Meydanê Newrozî de bê. Ma do bi sloganê, ‘Dem demê azadiya cinîyan o' mitîngê xo bikerê û 8ê Adare pêşwazî bikerê. Serekwekîla Koma Partîya Demokratîke ya Şaran (HDP) Meral Daniş Beştaş û parlamentera ma ya herême Nûran Îmîr do tewrê pîrozbayî bibê. Ma wazenê cinîyê Botanîjî hemverê hêrişan biherikyê meydanan."

 

‘Roj roja pîlkerdişê serewedaritişî yo'

 

Aktîvîsta Tevgerê Cinîyan ê Azadan (TJA) Guler Tunç zî wina vat: "Ma bi coş û kelecanêke pîl ver bi 8ê Adare şinê. Ma sey cinîyê Botanî zî verê xo danê 8ê Adare û vejênê meydanan. Silopi de hîrê cinîyê xoverdayoxî ameyî qetilkerdiş. Ma wazenê nê cinîyan 8ê Adare de bîyarê xo vîr. Ma sey TJA bi rihê serewedaritişî têgêrenê û ma do  biherikê meydanan. Ma veng danê cinîyan ke 8ê Adare de vejîyê wareyê mîtîngî yê Silopî. Demo ke ma qalê serewedaritişî kenê Botan yeno vîrê merdimî. Seba ke serranê 90î de bi rayberîya cinîyan û Bêrîvane bi rihê serewedaritişî Newroz ame pîrozkerdiş. Emsar zî bi rihê serewedaritişê serranê 90î û bi rihê Bêrîvan, Sêvê, Pakîze, Fatma, Asya û Berjîne biherikyê meydananç Hemverê tecrîdê ke ewro serê cinîyan de yeno kerdiş vera taciz û tecawuzî, asîmîlasyonî ma do meydanan de bê. Roj roja pîlkerdişê serewedaritiş û xoverdayîşî ya."

 

'Ganî ma serewedatiş bikerê'

 

Welatijo bi nameyê Siyabend Burumtekîn zî dîyar kerd ke demo 8ê Adare nêzdî beno, rihê înan ê xoverdayîşî zî newe beno û vat: "Tena 8ê Adare ney, cinî her roje hemverê hêrişan xo ver danê û mîyanê têkoşînî de yê. Temamê dinya de qirkerdişê cinîyan dewam keno. Qirkerdişê herêma ma û Tirkîya zî zêde yo. Seba nê ma do vera her tewir hêrişê cinîyan wareyan de bê. Embazê ma yê tepişteyî bi nameyê xokiştişî yenê qetilkerdiş. Ganî ma aya bibê û bêveng nêmanê. Ma do bi ruhêko xoverdayox tewrê mîtîngê 8ê Adare bê. Baro tewr giran serê milê cinîyan de yo û ganî ma serewedaritiş bikerê."

 

‘Do mesajê zelalî bêrê dayîş'

 

Endama Meclîsê Şaredarîya Silopiyî Garîbe Bîlîr zî wina qal kerd: "Bi nêzdîbîyayîşê 8ê Adare dir cinî hemverê zulmî û sîstemê serdest sere wedarneno. Demo ke ma vanê Botan xoverdayîş û têkoşînê cinîyê kurdî yeno vîrê ma. 8ê Adare seba ma cinîyan têkoşîn o. Ma do xoverdayîşê Sêvê, Pakîze û Fatma dewam bikerê û wayîrê înan bivejîyê. Ganî her wext têkoşînê ma dewam bikero. Sîstemê camêrdî wazeno ke bîyayîşê cinî çin bikero. Ma cinî sere nêtewênenê, ma hemverê sîstemo ke wazeno cinîyan bikero kole sere wedarnenê û ma do nê sîstemî birijnê. Cinîyê Botanijî do 8ê Adare de mesajê xo bi hawayêke zelal bidê. Ma veng danê pêro cinîyan ke vejîyê meydanan."

 

'Cinî do biherikyê meydanan'

 

Endama Meclîsê Şaredarîya Silopiyî Sabriye Yagan zî wina vat: “Ganî ma hêrişan ra vajê bes o. Seba nê ma veng danê pêro cinîyan ke 8ê Adare de biherikyê meydanan û vengê xo berz bikerê. Ganî ma vengê xo berz bikerê ke biresê azadîya xo. A roje seba ma girîng a. Ganî ma wayîrê nasname û erjê xo vejîyê. No semed ra ganî heme cinî wurzê serê lingan û biherikyê meydanan. Wa cinî tu wext bêveng nêmanê û peynîya nê sîstemê lêşin ê camêrdan bîyarê. Roj roja xoverdayîş û azadîya cinîyan a."