Sema Çaglak

 

MERKEZÊ XEBERAN - Cinîyan seba 8ê Adare mesajê têkoşîn û xoverdayîşî dayî û dîyar kerdî ke, do cinîyî 8ê Adare de heme meydanan bi reng û coşê xo bixemilnê. 

 

Emsar startê xebata 8ê Adare ya Roja Cinîyanê Dinya, mintiqaya Kerboranê Mêrdînî de bi sloganê 'Wext wextê azadîya cinîyan o' ame dayîş. Dadîyê Aştîye seba 8ê Adare waştişê aştî û edaletî kerdî û veng ro cinîyan kerdî ke 8ê Adare de vejîyê wareyan û têkoşîn pîl bikerê. 

 

Dadîya Aştîye ya Mêrdînî Muazzez Kaymaze vat: "Ez di şexsê Garîbe Gezer de, 8ê Adare ro heme cinîyanê Kurdistanî pîroz kena. Cinîyî her tim serê payan de yê nika zî bi coş û rengê xo do heta 8ê Adare wareyan bixemilnê. Cinî ciwîyayîş a û do cinîyî azadîye bîyarê." 

 

Dadîyanê Aştîye ya Mêrdînî ra Mizgîn Aslan ard ziwan ke ciwîyayîş bi reng û xemlê cinîye weş o. Mizgîne wina qiseyê xo dewam kerd: "Têkoşîn û xoverdayîş cinîyan dir bi mana yo. Ez seba cinîyan û ciwanan başîye wazena û êdî wa aştîyêke mende bêro ke çimanê dadîyan ra hêsirî nêvarê." 

 

Endama Meclîse ya Dadîyanê Aştîye ya Mêrdînî Sureyya Yilmaz zî 8ê Adare ro heme cinîyanê Dinyayî piroz kerd û vat: "Ma şexsê Garîbe Gezer û Denîz Poyraze de 8ê Adare sere ra ro cinîyanê mintiqayî ro heme cinîyan pîroz kenê. Ma do bi reng û vengê xo wareyan de, 8ê Adare pîroz bikerê." 

 

'Ma aştîye wazenê' 

 

Dadîyêka Aştîye ya Mêrdînî zî vat ke 8ê Adare ro heme cinîyanê kezebveşayan pîroz bo û wina dewam kerd: "Na roja delale û pîroze seba heme cinîyanê aştîwazan pîroz bo. Ma vanê êdî wa no zilm xelas bibo. Astî bêro ca û tepişteyî serbest bêrê veradayîş. Wa kiştiş û merg nêvirazîyo. Ma dadîyê aştîye yê û ma her tim hemverê kiştişî de yê. Ma edalet wazenê." 

 

Dadîya Aştîye ya Mêrdînî Hewa Zabûr zî dîyar kerd ke, ê do seba edaletî û duştê şerî meydanan de bê, têkoşîn û xoverdayîşê cinîyan silam kerd. 

 

'Bindestî rê bes o' 

 

Dadîya Aştîye ya Amedî Munevver Ozunlî ard ziwan ke, êdî bindestîyê cinîyan rê bes o û bi nê vatişan dewam kerd: "Wa cinî azad bibê û her cayê Dinya yî de vengê xo berz bikerê. Wa êdî cinîyî xo nênimnê. Wa cinî heme têreyde bivejîyê meydanan û na bindestîye ra vajê êdî bes o. Ez koleyîye nêwazena! Bes êdî nê zilmî rê û na koleyîye rê! Ma do Serekê xo azad bikerê û aştîye bîyarê nê welatî." 

 

'Do cinîyî emsar zî 8ê Adare bi coşî derbas bikerê' 

 

Endama Meclîse ya Dadîyê Aştîye ya Rihayî ye Eyşan Cane zî vat: "Ma aştîye û hizûr wazenê. Wa êdî na cografya de gonî nêro rijnayîş. Emsar zî ma do 8ê Adare de bi coşî û weşîye derbas bikerê, seke rîhan û vilikan boy bidê." 

 

Dadîya Aştîye ya Rihayî Hedle Ogûr zî vat ke, ê wazenê heme cinîyî wayîr ro 8ê Adare vejîyê û wina dewam kerd: "Ganî ma cinîyî yew bi yew zereyê keyeyê xo ra vejîyê û 8ê Adare de bi reng û xemlê xo meydanan de bê. Vengdayîşê mi yo pîl  no yo ke, cinî keyeyê xo ra vejîyê." 

 

'Ma do vengê xo biresnê heme kesan' 

 

Tewr peynî zî aktivîsta TJAyî ya Êlihî Şukran Çelebî qisey kerd û dîyar kerd ke, ganî 8ê Adare de heme cinîyî bi yewîyîye û bi organîzebîyayîşî xo awan bikerê. Şukrane, wina qisey kerd: "8ê Adare de ganî ma heme têreyde organîzebîyayîşê xo awan bikerê. Her çar hetê mintiqayî de û Tirkîya de tehdayî ro cinîyan yenê kerdiş û cinîyî yenê qetilkerdiş. Xeylêke nê cinîyan ra hetê babî, bira yan zî mêrdeyêke înan dir zewejîyayê ra yenê qetilkerdiş. Êdî wa cinîyî nê ra vajê bes û xo duştê înan de organîze bikerê. Ma do emsar 8ê Adare de vengê xo biresnê her kesî û 8ê Adare seba azadîya heme cinîyanê Dinya yî rê pêşwazî bikerê."