RIHA - Çalakîya 'Nobeta Edaletî' ya Keyeyê Şenyaşarî 361rojî yo dewam kena. Keyeyê Şenyaşarî ewro nê mesajî dayî: "Çalakîya ma tarîx de yena nustişî. Ê ke wazenê bibê şahidê na tarîxe, venga ma na ya ke, wa 9ê Adare de vernîyê edlîyeyî de bê." 

 

Merdim û pawitoxê Parlementerê AKPyî Îbrahîm Halîl Yildiz, 14ê Hezîrane ya serra 2018ine de Pirsûsî ya Rihayî de hêrişê dikanê keyeyê Şenyaşarî kerd. Hêrişî de mêrde û di lajê Emîne Şenyaşare ameyî qetilkerdiş û lajê aye Ferît Şenyaşar bi birîndarî xelesîya bî. Seba tepiştişê qatilan û  muhakemekerdena înan,  Emîne Şenyaşar û lajê xo Ferît Şenyaşarî 9ê Adare ya 2021î  de verê Edlîyeyê Rihayî de dest bi çalakîya  Nobeta Edaletî kerdbî. Nobeta keyeyî,  roja 361ine de zî dewam kerd. 

 

Çalakîye de Ferît Şenyaşarî qisey kerd û da zanayene ke, 9ê Adare de, roja çarşemeyî de do çalakîya înan serrêke xo temam bikero û wina dewam kerd: "Wexto çalakî dest pêkerd, ma tena di merdimî bî. La dewaya ma nika bedîlîyaya  bîya dewaya îstîmlakî. Heme kesî wayîr ro nobeta ma vejîyenê.  Roja 200înê  çalakîye de  ma  pawitoxan dir nobete girewtbî. Venga ma heme pawitoxê heqê merdiman rê yo ke, Tirkîya de qalê heqî, huqûqî û edaletî kenê   ke, wa 9ê Adare ya roja çarşemeyî de bêrê vernîyê Edlîyeyê Rihayî û ma dir Nobeta Edaletî bigîrê. Tena rojêke zî bo, ma wazenê ke na nobete her kesî dir bigîrê. Wa heme merdimî bêrê û vernîyê edlîyeyî de ronişê. Wa bivînê ma hela nê zehmetîyan senîn ancenê. Çalakîya ma tarîx de yena nuştişî. Ê ke wazenê bibê şahidê na tarîxe, venga ma na ya ke, 9ê Adare ya roja çarşemeyî de, vernîyê edlîyeyî de bê." 

 

‘Ma edalet wazenê’

 

Ferîtî  dîyar kerd ke, qetlîamo ke 14ê Hezîrane ya 2018ine ro înan ameyo kerdiş, bi rayîrê huqûqî ameyo domnayîş û wina vat: "Ma edalet wazenê. No waştiş, do rojêke seba her kesî hewce bikero. Waştişê ma seba her kesî ya û ganî heme kesî zî beşdarê nê waştişî bibê û vengê xo bikerê. Venga ma seba heme kesê wayîrê wijdanî yê. Mîyanê serrêke de ma tenî cayê xo de nêroniştê. Neheqîya ke ro ma ameya kerdiş, ma her kesî dir pare kerd. Sîstemêke huqûqî Rihayî de esto; destpêkerdişê nobete ra heta nika 6 reyî ameyê destbendkerdişî, 14 reyî Îfadeyê dadîya mi  girewtê û derheqê aye de cipersayîş ameyo destpêkerdiş. Dewaya ma dewayêka heqî ya. Heta waştişê ma nêrê qebûlkerdiş zî do têkoşîna ma bidoma." 

 

'Çalakîya ma serrêke xo temam kerd'

 

Dewam de zî Ferîtî dîyar kerd ke tena di waştişê înan estê û waştişê xo wina vat: "Cayê karî de çalakîya ke min û biranê xo kerd pawitişê meşrû bi. La pêwa nê zî birayê mi (Fadil Şenyaşar) 37 serrî û 9 mengî cezaya zîndanî ameye dayîş. Bi 4 serrî yo zî hucre de yeno tepiştiş. Eke muhakemeyêko adilane bibayîne, birayê mi nika zere de nêbi. Ma wazenê ke bêro veradayîş. La verê çimanê bi seyan karmendê cemawerî, Nexweşxaneyê Dewlete ya Pirsûsî de qirkerdişêk ame kerdiş. La 4 serrî yo qerarê nimitişî serê dosya ra nêameyo wedaritiş. No huqûqî nîyo û ma wazenê dewa bêro akerdiş. Roja çarşemî de do çalakîya ma serrêke xo temam bikero. Eke waştişê ma nêrê qebulkerdiş, do çalakîya ma dewam bikero. Ma tena cayê xo de nêroşenê, sewbîna ma do biwuşkî bidê berê selahîyetdaran ro. Ma do vernîya berê Dadgeha Qanûnê Bingehîn, HSK û dozgeran de edalet bigêrê. Waştişê ma yê heq, huqûq û edaletî heta peynî dewam bikero."

 

'Ez wazena kesê ke qirkerdiş kerdê bêrê tepiştiş'

 

Emîne Şenyaşar ke êdî seke sembolê kesê ke edalet gêrenê yena naskerdiş zî bi wesîleyê serrgera Nobeta Edaletî veng da heme kesan û vat: “Çimê mi rayîrê kesê ke do bêrê tîya de yê. Bi serdayîşê înan xeylêk kêfweş bena. Lajê mi hucreyê yew kesî de yo û ez wazena bêro veradayîş. Waştişê mi oyo ke kesê ke qirkerdiş kerdê bêrê tepiştiş. Waştişê min ê edaletî seba her kesî yo. Kam ci ca benê wa bibê, heme kesî wa cayê xo de paştdayîş bidê ma û seba ma dua bikerê. Tîya de zulm yeno kerdiş û kiştoxî teber de rehet gêrenê. Heta edalet bi ca bêro ez o tîya ra nêwurzî. Bi serrêke ma pey xo de verda û eke edalet bi ca nêro ez o serrêke bîn zî tîya bî. Problemê min ê weşîye estê la heta lajê mi nêro veradayîş, ez nêeşkena keyeyê xo de roşî. Eke edalet bi ca bêro do no edalet seba her kesî bo."