Rojda Aydin

 

ŞIRNEX - Botan de xebatî û çalakîyê 8ê Adare bi sloganê 'Wext wextê azadîya cinîyan o' dewam kena. Endamê Komîteyê Hadrekarê 8ê Adare û Hemsereka HDPyî ya Silopîyî Asûman Kulter bale ante serê xebatan û vat: "Bi rihê 8ê Adare do Newroz pêşwazî bikerê." 

 

Hereketê Cinîyan ê Azadan (TJA) û Meclîsê Cinîyan ê Partîya Demokratîke ya Şaran (HDP), seba munasebetê 8ê Adare bi sloganê  'Wext wextê azadîya cinîyan o' şaristanê Şirnex, Mêrdîn,  Colemêrg, Wanî û xeylêk şaristananê bînan de startê çalakîye dayî. Botan de zî xebatî û çalakîyê 8ê Adare vernîyê hewteyêke dest pêkerd û bi coşî û kelejanêke pîl dewam kena. 

 

Şirnex de start 1ê Adare de ame dayîş, 8ê Adare de zî do Meydanê Newrozî yê qezaya Silopî de mitîng bêro organîzekerdiş. Mitîng do mabênê saete 13:00 û 17:00î de bêro kerdiş û serekwekîla Koma HDPyî  Meral Daniş Beştaş û parlementera HDPyî yê Şirnexî Nûran Îmîr do tewrê mitîngî bibê. Sewbîna hunermende Xecê, Koma Vengê Cinîyê Azadî û Hedîye do beşdar bibê. 

 

Endamê Komîteya Hadrekarê 8ê Adare û hemsereka HDPyî yê Silopî Asûman Kulter, serê muhîmî ya roje û programê emserî de qisey kerd. 

 

‘Ma do keye bi keye xo biresnê cinîyan’

 

Asûmane, ard ziwan ke 8ê Adare seba înan wayîrê rojêke muhîm a û bi mana ya û vat: "Par seba pandemî ma pîrozîye nêkerdbî û ma xeylêk xembarbî. Vernîyê hewteyêke ma bi dest bi xebatê xo yê 8ê Adare kerd. Hemverê cinîyan de zilmêke esto û duştê nê zilmî de zî ganî ma xo organîze bikerê. Ganî ma wayîr ro erj û nasnameyê xo vejîyê. Her roje cinî yenê qetilkerdiş, rastê desteştişî  û  tehdayî yenê. No panc hezar serrî yo cinî binê nê zilmî de ciwîyenê. Ma wazenê xo û nasnameyê xo nas bikerê. Ganî cinî heqê xo bizanê. Vera nê yewî 8ê Adare her hetî ra seba ma xeylêk muhîm a.  Duştê qirkerdişî, hêrişî, desteştişî û tehdayî ma do emser zî meydanan de bê û vengê xo berz bikerê. Ma do kuçe bi kuçe, keye bi keye bigêrê û xo biresnê cinîyan." 

 

‘Bi ruhê Sêvê, Pakîze, Fatma û Asya Yuksele…”

 

Asûmane da zanayene ke, emsar bi sloganê 'Wext wextê azadîya cinîyan o' 8ê Adare do bipawê û wina behs kerd: "Botan de têkoşîn û xoverdayîşê cinî wayîrê cayêke yo muhîm o. Vera ke Botan de xeylêk cinî bîyê sembola xoverdayîşî. Coka nê yewî zî ma do bi rihê Sêvê, Pakîze, Fatma û Asya meydanan de bê û vengê xo berz bikerê. Înan ma rê mîrasêke verda û ganî ma zî wayîr ro nê mîrasî vejîyê. Ma do xoverdayîşê hemrayanê xo bidomnê. Coka nê yewî zî ma do bi nê ruhî meydanan de bê. Botan de cinî her tim wayîr ro erj, herrî û welatê xo vejîya yê. Ma do na ra pey de zî wayîr vejîyê."

 

‘Hemverê koleyî de ma do vengê xo berz bikerê’ 

 

Asûmane dîyar kerd ke, ê do heme wareyan û kuçeyan de xebatê xo yê 8ê Adare bêmabên bidomnê û wina peynîyê qiseyanê xo ard: "Wa cinî vejîyê meydanan û wayîrê nasnameyê xo vejîyê. Wa cinî hemverê koleyî û zilmî de vengê xo berz bikerê. Ma do bi rihê 8ê Adare Newroz bipawê. Tena nê 8ê Adare, heme rojî rojê cinîyan ê. Ma do bibê vengê cinîyan ê ke nêeşkenê vengê xo vejê. Ma do wayîrê nê têkoşînî vejîyê. Heta cinî azad nêbê do no têkoşîn zî dewam bikero. Wa roja 8ê Adare de heme cinîyê Botanî vejîyê meydanan û vengê xo berz bikerê. 8ê Adare de ma bi coşî û kelejanêke pîl vejîyê meydanan." 

 

Programê 8ê Adare wina yo: 

 

"*3 yê Adare de Xezexî de seba cinîyan ê tepişteyan program bêro organîzekerdiş. 

 

*4ê Adare de do Elke de fenera waştişî bifirnê, heme qezayan de do cinîyanê tepişteyan rê kart bêro şawitiş. 

 

*5ê Adare de Qilaban de do bi seyran pêvînayîşê cinîyan bêro organîzekerdiş. 

 

*6ê Adare de do Cizîrî de rayîrşîyayîşê cinîyan bêro organîzekerdiş. 

 

*7ê Adare de do serdayîşê esnafê cinîyan bêro ca. 

 

*8ê Adare de zî do mitîng bêro organîzekerdiş."