Sema Çaglak

 

SEMSÛR - Hemsereka HDPyî ya Semsûrî Zelîha Karinca, dîyar kerd ke ê do emsar 8ê Adare de giranîyê xebatanê xo bidê tax û dewan û wina vat: “Ma do bername û çalakîyê xo bi taybetî dîyarîyê sîyasetmedara kurde Aysel Tûglûk, Denîz Poyraz û Garîbe Gezer bikerê. Ma do 8ê Adare de bi veng û mesajê xo wareyan de bê."

 

Cinîyan emsar bi sloganê, “Dem demê azadîya cinîyan a" startê xebatanê xo yê 8ê Adare Roja Cinîyan ê Dinya Kerboranê yê Mêrdînî de da. Herême û bajaranê Tirkîya de cinîyan amadekarîyê xo yê 8ê Adare dewam kenê. Cinî do emsar bi veng û xemlê xo vejîyê wareyan û mesajanê xo bidê. Derheqê xebatanê cinîyan ê Semsûrî de Hemsereka Partiya Demokratîke ya Şaran ya Semsûrî Zelîha Karinca qisey kerd. 

 

‘Ma do giranîyê xebatanê xo bidê tax û dewan’

 

Zelîha dîyar kerd ke emsar seba 8ê Adare girîngî bidê xebatanê dewe û  taxan. Zelîha, vat: “Bi nêzdîbîyayîşê 8ê Adare coş û kelecanê cinîyan zî zêdeyêr beno. 8ê Adare roja têkoşînî ra wetayêr, roja bidestkerdişê deskewtişan o. Ma vînenê şîdetê cinîyan û qirkerdişê cinîyan bîyo tewr berz. Seba nê sebeban, ma vanê êdî 'Dem demê azadîya cinîyan o.' Ma do emsar giranîyê xebatanê xo bidê bernameyê tax û dewan û bi cinîyan dir bêrê têhet. Nêzdîyê mengêke yo  ma hewl danê bernameyê xebatanê xo viraznê. Ma do heta 8ê Adare bêmabên qeza û dewan de bê."

 

‘Ma do bibê vengê Aysel Tûgluk, Denîz Poyraz û Garîbe Gezer’

 

Zelîha dewam de wina vat: “8ê Adare roja kede ya. Seranserê dinya de cinîyêke seba cuye kede nêdaya çin a. Bi taybetî zî seba heqê xo û deskewtişê xo têkoşîn û berdelê pîlî dayê. Ma do bername û çalakîyê xo bi taybetî diyarî sîyasetmedara kurde Aysel Tûglûk, Denîz Poyraz û Garîbe Gezer bikerê. Ma do bi munaqeşe û bernameyê rengîn ma do erjê xo vejîyê. Xebatanê xo yê dewe û taxan de ma dî ke cinî tewr zêde feqîrî gerreyox ê. Seba ke bar û berpirsyarîyê cinîyan zêde yo, cinî nêeşkenê seba xo dem bivisnê. Sewbîna cinî beranberê keda xo nêgînê. Pêwa nê çîyan seba feqîrî û kedwerdişî cinî ameyoxê xo ra zî bi endîşeyîn ê."

 

‘Do cinî vengê xo biresnê her ca'

 

Zelîha, wina qal kerd: “Sey yeno zanayîş ke Semsûr, bajarêke tûtinî yo û qedexeyê derheqê tûtinî her tim rojeve de yê. Demo ke ma kom bibê timî babete serê titûnî yo. Seba ke Semsûr eynî demî de bajarêke paletî û karkeran o. Welatijî bajar de ramitişî kulturê tûtinî înan rê bêro qedxekerdiş do şert û mercê xeylêk erzan û zehmet de mecbûr bimanê ke vejîyê teberê bajarê xo bixebityê. Pêwa nê çîyan, hawirdorê bi pêrodayîş û tengezar zî bandorê negîtîf înan rê keno. Bêguman cinî wazenê waştişê înan ca de bi ca bêrê û goreyê nê babetan polîtîkayî bêrê averşîyayîş."