AMED - Îdarekara HDPyî ya Amedî Remzîye Daşlik derheqê hêrişê hemverê HDPyî de û dewayê tepiştişî de erjnayîş kerd û vat: "Senîn ke nêeşkenê vernî ro ameyîşê wusarî bigîrê do nêeşkê vernîya rojanê ameyoxê şarêke zî bigîrê. Ma do hinî zêdeyêr meydanan de bê û wayîr ro parlamenteranê xo vejîyê." 

 

Hêrişê hemverê HDPyî her ke şino zêdeyêr beno û parlamenter û xebatkarê ci hedef yenê girewtiş. Sewbîna 17ê  Hezîrane ya  2021î de verguman Onûr Gencerî hêrişê hemverê HDPyî yê Îzmîrî kerd û xebatkara partîye Denîz Poyraze qetil kerd. Sewbîna nê rojanê vîyarteyî de Stenbol, Riha,  Amed û Yuregîrî ya Adanayî de  awanîyê HDPyî rastê hêrişan ameyî. Pêwa heme qeydê kamerayan, merdimêke nêame destbendkerdiş. 

 

Îdarekara HDPyê Amedî  Remzîye Daşlik derheqê hêrişan de qisey kerd û vat ziwanê hukmatî hêrişan pêt keno. 

 

‘Her cayê ke Kurdî ci de yê hêriş kenê’

 

Remzîye behs kerd ke hêrişê hemverê HDPyî vera nizdîyîya îqtîdarî yenê ca û nê çîyî behs kerdî: "Vergumanî zî bêceza yenê verdayîş, vera nê cesaret gênê. Her roje partîya ma hedef yena girewtiş. Wazenê HDPyî  terorîze bikerê. No zî cesaret dano hinîyan. Her cayê ke Kurdî estê hêriş domnenê. Hemverê heme endamê HDPyî û xebatkarê ci de hêrişî estê.  Na bêtehemulîya hemverê Kurdan a." 

 

‘Hêzê tarîyî dimayê hêrişan de estê’

 

Remzîye bale ante serê qetilkerdişê Denîz Poyraze û na babete de zî wina erjnayîş kerd: "Vergumanî hêriş ardo ca, ame pawitişî. Ne ro sebebê hêrişî, ne ro problemanê psîkolojîkî yê vergumanî ewnayî û waştî serebûte binimnê û serê ci padê. La ma parekerdişê serê çapemenîya komele yê vergumanan ewnenê, vînenê ke dimayê înan de hêzê xorînî estê. Peynîyê hêrişê hemverê Kurdan de hêzê tarîyî estê." 

 

‘Wazenê binimnê’

 

Remzîye dîyar kerd ke pêwa hêrişê hemverê HDPyî de hêrişêke hemverê cinîyan de zî babeta vatişî ya û hemverê nasnameya cinî û xoverdayîşê ci hêrişêke babeta vatişî ya. Remzîye nê çîyî eşkera kerdî: "Bi padayîşê HDPyî nêeşkenê meseleya Kurdan helbikerê. Çîyê yenê kerdiş  parekerdişê demokrasîya Tirkîye ya. Amancê hewldayîşê padayîşê HDPyî yeno mana ya ke vengê heme hetan bibirnê. HDP partîya cinî, ciwan û heme kulturî û bawerîyan a. Coka nê hêrişê hemverê HDPyî her ke şino zafêr beno. La padayîş çarevînayîş nîyo. Vera ke heta nika ma vînayo, padayîşê HDPyî helkerdişê krîzan nîyo. Ewro HDP bêro padayîşî, do cayê ci de partîyêna bêro akerdiş."

 

‘Ma do wayîrê parlamenteranê xo vejîyê’ 

 

Remzîye sewbîna bale ante serê rewşa parlementera HDPyî ya Amedî Semra Guzel a ke destnêdayîşê aye ame wedaritiş û wina peynîya ci ard: "Ma tepiştişê Orhan Doganî û Hatîp Dîcleyî de vîna, wedaritişê destnêdayîşê Semra Guzel yeno mana ya nênaskerdişê şar î.  Eynî wextî de wedaritişê destnêdayîşê Semra Guzele yeno mana ya ke do destnêdayîşê heme embazê parlementeran wedarê. Ma nê hêrişan şermezar kenê. Senîn ke ameyîşê wusarî nêeşkenê manî bikerê, do rojê ameyoxê şarî zî nêeşkê manî bikerê. Ma do hinî zêdeyêr xurt meydanan de bê û ma do wayîr ro parlamenteranê xo vejîyê."