Sema Çaglak

 

AMED - Selva Ceylan ke bi serran o keyeyê xo de vilan ramena vana: "Resnayîşê vilan xeylêk zehmet o la keda ke merdim seba vilan dano, merdimî rincan nêkeno û merdim mest beno. Selwaya ke keyeyê xo de vilan ramena, vana ke eke îmkanê mi bibo wazena seba berardişê vilan sera awan bikerî."

 

Yeno zanayîş ke têkilîyê cinî û xoza destpêkê tarîxî xeylêk zêde yo û pîroz yeno vînayîş. Xozaya cinîyan rê wareyî kerda û cinî zî bi ked û hunera xo tarîxê merdimayî xemilnaya. Selva Ceylan zî nê cinîyan ra yewa ke Bîsmîlê Amedî de bi kede û berardişê xo wazena boya xoza bîyaro keyeyê xo. Selva bi serran o zereyê hewş û keyeyê xo de vilan ramena û pîl kena. Selva odayêke seba vilanê xo cîya kerda û bi kedêke pîl înan resnena.

 

‘Cayê cîya ra toxim û nebatan arêdana'

 

Selva dîyar kerd ke bale û eleqeyê aye hemverê vilan tutîya aye ra dest pêkerdo û ard ziwan ke seba vilan ked û wayîrvejîyayîşêke pîl lazim o û wina vat: "Her ke yeno vîrê mi vilê mi yê ke mi ramêtêne û resnayîne bî. Ez tu wext bê vilan nêmenda. Key ez şina verê embaza xo, yan zî bajarêke bîn, uca de nebatêke cîya û toximê cîya ana. Sewbîna vilroşan ra zî gêna. Sewbîna embazê mi, mi rê dîyar kenê. Demo ke ma seba baxçe zî ronenê, ez uca de zî vilan ramena. Resnayîşê vilan xeylêk zehmet o la keda seba înan merdim  mest kena. Ez tim herra înan vurnena. Ganî merdim vilan û  taybetmendîyê înan ra fam bikero. Ez şitilê înan kena vildankêke bîn û wina her tewir vilan zêde kena."

 

‘Seba vilan çîyê xozayî xebitnena'

 

Selva wina dewam kerd: “Eke ma înan bêwayîr verdê, ê do biçilmisê. Wexto ke toxim gêna, kena pîl. Toximê ke hema newe bîyê şitil la her roje xizmet ci rê kena. Sewbîna ez seba vilan gubre nêxebitnena. Seba herra înan çîyê xozayî xebitnena. Sey awa hakanê girnaye, awa kartolanê girnaye yan zî qalikê hakan, demê çay, qalikê kartol û pîyazan kena herra înan benê ziblê xozayî. Sewbîna ez pelenê înan şona ke toz nêgîrê."

 

‘Sebra mi bi vilan yena'

 

Selva tewr peyîn wina vat: “Xêrcê nê odayêke wareyêk bîn zî seba vilanê mi esta. Ez înan hewşe de dana ro, la seba ke serd zêde bi, mi înan wedarna embar. Dimayê ke hewa germ bibo ez o reyna vilanê xo vejî teber. Sebra mi bi înan yena. Ez verê çemî de kerra û şeytanokan zî kom kena û înan kena mîyanê herra vilanê xo. Beno ke heskerdişê min ê seba vilan, keye ra yeno. Pîyê mi zî sey mi vilan ra hes kerdêne. Derdorê mi gama ke heskerdişê min ê vilan vînenê, vanê xo rê serayêke virazne. Eke wareyêk mi bibîne, mi waştêne xo rê sera viraznî û uca de vilanê xo biramnî."