Rojda Aydin

 

ŞIRNEX - Kayeyê tepişteyan, derheqê rewşa tepişteyê nêweşan û binpaykerdişê heqê tepişteyan de qisey kerd û vat: "Vera ke ma Kurd ê zî zilm ro ma û tutanê ma kenê. Ma sey her reyî reyêke bîn venga serbestveradayîşê tepişteyan kenê û vanê peynî ro nê zilmî bîyarê."

 

Çalakîya 'Nobeta Edaletî' ya kayeyê tepişteyan ê Amed, Wan û Îzmîrî bê mabên domnena. Keyeyî bi çalakîyanê xo bale ancenê serê binpaykerdişê heqê merdiman û rewşa tepişteyan ê nêweşan. Nobetake mîyanê rayaumûmî de veng da, bi serdayîşan û pêvînayîşan domnena. Tepişteyê ke bi tehda û zordarîye dir rî bi rî manenê yew zî ê tepişteyan ra bi nameyê Esma Ayaza ke 36 serrî yo ceza ci rê ameya birnayîş, 23 serrî yo zî tepişte ya û nika Zîndanê Cinîyan ê Şakranê Îzmîrî de ya. Sewbîna tepişteyo bi nameyê Mehmet Ayazî zî 12 serrî û 6 mengî ceza ci rê ameya birnayîş û serr û nîm o ke Zîndanê Girewteyî yê Tîpê Tyî yê Bunyanê Qeyserî de tepişte yo. Dadîyanê tepişteyan ajansê ma rê qalê rewşa nêweşan kerd.

 

'Rewşa tepişteyan baş nîya'

 

Dadîya Esma Ayaz, Emîne Ayaz zilm û zordarîyê serê zîndanan de yeno kerdiş şermezar kerd û vat ke zîndano ke kênaya aye ci de manena binpaykerdişê heqan xeylêk zêdeyêr yenê ciwîyayîş.  Emîne dîyar kerd ke kênaya aye Esma bi telefonî behsê binpaykerdişê heqê tepişteyan kerdo. Emîne wina qiseyê xo derg kerdî: "Rewşa tepişteyan baş nîya. Merdimêke 36 serrî ceza ci rê bêro birnayîşî do no kes senîn baş bibo. Zilm her roje ke derbas beno zêdeyêr beno. Tutê ma ver ra fikr û famê xo hêsîr yenê tepiştiş. La ma do tu reyêk fek rayîrê înan ra veranêdê. Kênaya mi 11 serrî bî, keye ra vejîya şî û heta ewro zî mi ra dûrî ya. Vera ke tutê ma bi serranê mîyanê çar dêsan de yenê tepiştişî ma nêzanê senîn werd biwerê û rabikewê. Vera ke ewro  zîndanan de zilmêke pîl esto, ma qaxû de yê. Ê tutanê ma ra çi wazenê?"

 

'Zilm ro tepişteyan kenê'

 

Emîne,  dîyar kerd ke îdarekarê zîndanan û gardîyanî her reyêke erzenê serê qawişan û cigêrayîş kenê û wina qal kerd: "Heme tefûtalê înan vila kenê. Tefûtalê înan nêdanê înan. Key ke ez Kênaya xo reyde qisey kena behsê zilmê serê xo kena. Verê çimanê dinya de hemverê tutanê ma de zilm esto, la bêveng ê."

 

'6 serrî yo mi kênaya xo nêvînayo'

 

Emîne, bale ante serê nêweşîya kênaya xo: "Kênaya mi mîdeyê xo ra nêweş a û her tim sereyê aye dejeno. No 6 serrî zêdeyêrî yo mi kênaya xo nêvînawo. Vera îmkanê ma çinî yo û cayê aye dûrî yo ma nêeşkenê şêrê pêvînayîşî. Wexto zîndanê Şirnexî de bî mi aye vînayne. Dimayê ke sirgunê Zîndanê Şakranî ameya kerdiş, ez nêşîya pêvînayîş."

 

'Wa tepişteyê sîyasî veradê'

 

Emîne, peynîyê qiseyanê xo de venga serbestveradayîşê tepişteyê nêweşan kerd û vat: "Tutê ma dewaya bîyayîş û heqê xo kenê. Waştişê ma bi peynîbîyayîşê zilmî yo û serbestveradayîşê tepişteyanê sîyasî yê."

 

'Lajê mi nêweş o'

 

Dadîya Mehmet Ayazî, Sosin Ayaze zî behs kerd ke lajê aye wendekar bî û wexto mekteb ra vejîyayo hetê  polîsan ra ameyo destbendkerdiş û dima ra ameyo tepiştiş. Sosine dîyar kerd ke 12 serrî û 6 mengî ceza ci rê ameya birnayîş û wina dewam kerd: "Lajê mi bi tewirêke bê huqûqî ceza ci rê ame birnayîş. Lajê mi nêweş o û astimê ey esto. Vera nêweşîya xo ganî derman biwero. Wexto Zîndanê Şirnexî de bî o berd nêweşxane. Dimayê ê wextî ra heta ewro lajê mi qet nêberdo nêweşxane. Ganî her tim derman biwero, la derman nêdanê ci."