STENBOL - Huqûqnasan dîyar kerd ke raporo ke ATKyî derheqê sîyasetmedara Kurdan Aysel Tugluk de ke 'Eşkena zîndan de bimana' dayo caardişêke polîtîk o û goreyê etîkê huqûqî û tibî nîyo. Huqûqnasan sewbîna seba veradayîşê Aysele venga hewldanê mecbûrî ro Yewîyîya Baroyan kerd. 

 

Sazgehê Tîpê Edlî (ATK)yê girêdayeyê Wezaretê Edaletî ke, hewêna derheqê sîyasetmedara Kurdan Aysel Tugluk de raporo ke 'Eşkena zîndan de bimana' da. Pêwa teşhîsê nêweşîya demansî yo ke Aysele rê ameyo dayîş, rewşa aye nîno vînayîş. 

 

‘Seba Aysele çalakî’

 

Rewşa Aysele ke di şertê zîndanî de roj bi roje giran bena û zîndan de  dermankerdişê aye mimkun nîyo. Rêxistinê cinîyan, rojnamegerî, akademîsyenî,  roşinvîrî, pawitoxê heqî û hunermendan reaksîyon ramojnayî raporê ATKyî ke dayo û kampanyayê cîyayî dayî destpêkerdiş û veng kerd ke Aysele lezkî bêro veradayîş. 

 

Huqûqnasê ke ajansê ma rê qisey kerdî, dîyar kerdî ke raporê ATKyî qerarêke sîyasî yo û veng ATKyî rê kerd ke raporê adilane bidê û sewbîna venga hewldanê mecbûrî ro Yewîyîya Baroyan kerd. 

 

‘Îqtîdar tehda ATKyî keno’

 

Avûkate Gul Altay dîyar kerd ke, a bi serrana Aysel Tugluke nas kena û wina dewam kerd: "Raporê ATKyî yê ke derheqê Aysele û tepişteyanê bînan ê ke nêweşê ameyê dayîş, netîceyê tehdayê îqtîdarîye de yenê dayîş. Çi heyf ke huqûq nîno ca. Tepişteyê nêweşî nêeşkenê  zîndanan de bimanê û hewceyîyê înan bi dermankerdiş estê. Ganî pêwa keyeyê xo de bê. Sewbîna xeylêk tepişteyê nêweşî ê ke roja tehlîye benê, dinyaya xo bedilnenê, estê. Nê mergî zî asasîyê xo de nê polîtîkayî eşkera mojnenê ra. Nizdîbîyayîşê îqtîdarî, tehda ATKyî rê keno. Aysel Tugluke bi serran sîyaset kerd. Bi nasnameya cinî û huqûqnanasîye xeylêk wareyan de rolê çalakî girewt. Vera problemanê weşîye ciwîyena ganî lezkî bêro veradayîş." 

 

‘Vengdayîşê hîsgirî’

 

Avûkate Mehtap Yûrtlûk zî behs kerd ke sere de Wezareta Edaletî û heme sazgehê verpersî asayîşê ganê tepişteyê nêweşan ra verpers ê û wina ard ziwan: "Asayîşê ganê merdiman, heqo tewr sereyîn o ke heqê ciwîyayîşî yo. ATK ganî qerarê xoser û zanistî bido, raporo seke 'Eşkena tepişte bimana' dano û no bi rastîye ne wijdanî ya ne zî merdimî ya. Ez seba nêweşan venga hîsgirîye rayaumûmîye rê kena. Ganî her kes na babete de bi hîsgirîye hereket bikero." 

 

‘Ma ATKyî ra merhamet û wezîfeyê ci ra paweyê’

 

Avûkate Nûran Arslanere zî qiseyanê xo de bale ante serê rewşa Aysele û wina eşkera kerd: "Aysele cayê ke yê aye ke muhîm esto û eynî wextî de endama baroyê ma ya û meslegdara ma ya. Qeraro ameyo dayîş û raporo ke ameyo dayîş babeta munaqeşeya cidî ya: Him hetê huqûqî ra him zî hetê tibî ra. Waştiş ne ke bi caardişêke xusûsî bêro ca û ne ke guna pê bêro; ganî ATK ro rewşa Aysele biewno û qerar bido. Rewşa bîyaye de Aysele nêeşkena zîndan de bimana, nêeşkena pawitişê xo bikera, nêeşkena tena biciwîya. Ganî dermankerdişê ci baş bêro kerdiş ke tayêk bo zî vernî ro nêweşîya aye bêro girewtiş. Nê caardişê hemverê Aysele de, ne etîkê huqûqî de ne zî  yê tibî de estê." 

 

‘Seba Yewîyîya Baroyan vengdayîş’

 

Nûrane peynîyê qiseyanê xo de hetê veradayîşî û caardişê şertî û mercê ciwîya Aysele de veng kerd û wina vat: "Ma veng ro Yewîyîya Baroyî ke ma endamê ci yê, kenê ke tewirê rewşe bibê û hewldanê mecbûrî bikerê."