Nîşmiye Guler- Marta Somek

 

STENBOL - Nesrîn Akgul, dimayê 14 serran serbest ameye veradayene. Nesrîne dîyar kerd ke zîndanan de xoverdayîşêko pîl esto û vat: "Ez o têkoşînê xo cayê ke mendo dewam bikerî."

 

Nesrîn Akgul ke Zîndanê Padaye yê  Tîpê Fyê Hûmara 1in ê Kandirayî de tepişte bî, dimayê ke Dadgeha Berzî di rey qerarê dadgeha herêmî betal kerd, seba tepiştişê demê dergî Nesrîne vizêrî serbest ameye veradayîş. Keye û embazê ci verê zîndanî de kom bî û bi coşêke pîl Nesrîne pêşwazî kerdî. Nesrîne roportajo yewin ajansê ma rê kerd.

 

Nesrîne bi coş û kelecanêk ma rê wina qal kerd: "Seba mi hîsêk cîya yo. Ez qet pabe nêbîya ke bêra veradayene. Nika hişê mi verê embazan de mend. Zere de xeylêk tepişteyê nêweşî estê. Kesê ke 30 serrî yo tepişteyê estê û nînê veradayîş. Aysel Tugluk esta. Seba mi xeylêk zehmet o ke mi embazanê xo zere de verda. Labelê seba her ware wareyê têkoşînî yo. Zere de embazê ma xo ver danê û ganî ma wayîrê xoverdayîşê înan vejîyê."

 

‘Zîndanan de xoverdayîşêk esto'

 

Nesrîne, wina bale ant serê zîndanî û vat: "Zîndanî nê welatî de birînêke bêderman ê. Zîndanan de tecrîdêk pîl esto. Kandira zî parçeyêk no yo. Ganî her kes wayîrê zîndanan vejîyo. Sewbîna tena keyeyê tepişteyan ney, ganî pêro şar wayîrê zîndanan vejîyo. Seba zîndanan de xoverdayîşêk esto. Seba cuyêke bi rûmet xoverdayîşêk esto. Ganî her kes goş bido vengê înan. Sewbîna seba mi zî her ware wareyêko xoverdayîşî yo. Ez o teber de zî bibî parçeyêk têkoşînî. Beno ke hîn problemê adaptasyonî biciwîyî labelê seba mi do têkoşîno ke mendo dewam bikero."

 

'Ganî Aysel Tugluk bêra veradayene'

 

Nesrîne bale ant serê rewşa Aysele û vat: "Aysel Tugluk, tepişteyêka nêweş a. Bi serran o xo ver dana. Aysele her wext wareyan de bî. Her wext paştdayîşê ma kerdêne la çi heyf ewro nêeşkena xo bîyaro ziwan, nêeşkena biewno xo ra. Şahidîyê nê çî mi rê xeylêk zehmet o. Seba ke ma vîyarteyê ci baş zanê. Ganî seba aye çi bibo ma bikerê. Ganî Aysele serbest bêro veradayîş. Seba ke roj bi roje nêweşîya aye giran bena. Çîyo ke zere de bêro kerdiş bi sînor o. Ma tena eşkenê paştdayîşê madî û manewî bikerê. Aysele reyke bîn  bi raporê ATKyî dir zere de ameye verdayîş. Derheqê babete de ganî komel bikewo mîyanê hewldayîşî. Seba ma çîyo tewr girîng zî serbestveradayîşê tepişteyê nêweşan o. Aysel Tugluk zî nê kesan ra yew a."

 

Nesrîne, dîyar kerd ke zîndanan de tecrîdêko giran esto û vat: "Zîndanan de têkilîyê tepişteyan yewbînan ra yeno visnayîş, tepişteyênêweşî nînê tedawîkerdiş û her het ra problemî estê. Xora nê problemî bi hawayêke yenê rojeve. Tepişteyî, hewl danê ke bi seknêke bi rûmet serê linganê xo de bimanê. Ez silamanê xo her kesî rê şawena. Têkoşînê azadîye her ca d edewam keno."

 

Nesrîn Akgul 

 

Nesrîne Wan de serra 2008ine de ameye destbendkerdiş û cezaya muebetî ci rê ameye dayene. Xeylêk rey ameye sirgunkerdiş. Tewr peyîn zî zîndanê Kandirayî de bî. Nesrîne, demo ke Zîndanê Bakirkoyî de bî, tewrê grevê vêşanîye ke bi rayberîya Leyla Guven de ame destpêkerdiş bî. 30ê nîsana 2019ine de zî çalakîya xo evt sewîyeya tewr cor û dest bi rojeyê mergî kerd. Dimayê mesajê Rayberê PKKyî Abdullah Ocalanî peynîya çalakîya xo arde.