Oznur Deger

 

ANQARA - Dadîya Gulistan Doku, Bedrîye Doku ke seba aqubetê kênaya xo pers bikero şî Anqara û uca de şîdetî dir rî bi rî mende wina vat: "Verê wezaretî de ma erd ra kaş kerdî û bi zor esparê wesayîtî kerdî. O wext engişta mi mîyanê derabeyan de mende û sîya bî. Saetêke zêdeyêr polîsan wesayît de heqaret ma rê kerdî. Ma ra vatî, 'meqîrê huş bê'. La ma tena kênaya xo wazenê."

 

Wendekara Unîversîteya Mûnzûrî Gulistan Doku ke Dêrsim de ameye vînîkerdiş, 5ê Çeleyê 2020 de xebere ci ra nîna girewtiş. Dadîya Gulistane Bedrîye, pîyê aye Halit û waya aye Aygul Doku seba aqubetê Gulistane pers bikerê, 22yê Sibate de şî Anqara. Keyeyî Anqara de pêvînayîş kerd. Sewbîna meclîs de beşdarê kombîyayîşê koma partîyê sîyasî bî. Keye ke bi Komîsyonê Heqê Merdiman ê Meclîsî de pêvînayîş kerd, wazeno ke bi Wezîrê Dade Bekir Bozdagî dir zî pêvînayîş bikero. Labelê hema cewab nê waştişî rê nêameyo dayîş. Keyeyî 23yê Sibate de verê wezaretî de çalakî kerd labelê polîsan hêriş kerd. 

 

Dadî û pîyê Gulistane amancê xo yê ameyîşê Anqara qal kerdî û qalê şîdetê polîsan kerdî.

 

Doktor rapor nêdayo!

 

Bedrîye dîyar kerd ke ê do bi pêro partîyan dir pêvînayîş bikerê û vat: "Verê wezaretî de bi zor waştî ke ma esparê wesayîtî bikerê, demo ke ma nêwaşt ma espar bibê, înan ma kaş kerd. O wext engişta mi mîyanê derabeyan de mend ûsîya bî. 2 polîsê cinî bi kiftê mi 2 polîsan zî bi linganê mi girewtî. Demo ke ma esparê wesayît kerdî, vatî tîya qamera çin ê, şima do bieşkê se bikerê. Ma zî vat, qamera çin ê, o wext ma bikişê! Saetêke zêdeyêr polîsan wesayit de heqaret ma rê kerdî. Ma ra vatî, 'meqîrê huş bê'. Ma nêzana do ma berê ça. La ma ten akênaya xo wazenê."

 

'Ma qatil nîyê ma kênaya xo gêrenê'

 

Bedrîye dewam de wina vat: "Polîsan verê vatî, ma do şima verê wezaretî de ronê la ma verê otele de dayî ro. Reyna polîsan ma kerd binê ablûqa. Ma qatil nîyê, ma koênaya xo gêrenê! Kênaya mi wendekara unîversîte bî. Çi bi kênaya mi bi? Qet nêbo ma estanê aye bivînê. Wa mezelêke aye bibo ke ez ser de dua bikerî. Sîlehê ma çin o. Hukmê ma do kamî rê derbas bibo? Heme îmkanî destê şima de yê. Ma tena kênaya xo wazenê."

 

Dozgerî: Çîyêk ma bikerê çin o

 

Bedrîye dîyar kerd ke înan Dêrsimî de 40 rojî binê vewre de Nobeta Edaletî girewtê û 40 rojî waştê ke bi Wezîrê Dade dir pêvînayîş bikerê.  Bedrîye dîyar kerd ke înan bi Serdozgerê Dêrsimî dir pêvînayîş kerdê la serdozgerî vat ke çîyêk ma bikerê çin o.

 

'Ez nan û hêsiranê xo pîya wena'

 

Bedrîye vat, înan bi partiyê HDP, CHP, MHP û ÎYÎ Parti dir pêvînayîş kerdo û vat: "MHP vat rayê AKPyî ma ra zêdeyêr ê, eke ê vajê e, ma do komîsyonêk cigêrayîşî awan bikerê. ÎYÎ Partî zî pozîtîf pêşwazî kerd. CHPyî zî vat wa merdimî nêmirê. Dimayê partiyan ma waşt ke ma bi Wezîrê Dade dir pêvînayîş bikerê. Dimayê pêvînayîşî ma do agêrê memleketê xo. Ma do bivatêne çi bi kênaya ma ame. Xêrcê nê ma eşkenê se bikerê? Heqê min o ke ez bizanî bi kênaya mi se bîyo. Kezeba mi veşena. Ez nan û hêsiranê xo pîya wena. Mi bi rotişê hak, penîr kênaya xo da wendiş. Mi nêwend. Mi vat, wa kênayê mi biwanê û ez xebityeya. Heta ma bi Wezîrê Dade dir pêvînayîş nêkerê, ma do Anqara ra nêşêrê. Ma şinê ça polîsî dimayê ma de yê ma nê ra xeylêk aciz ê."

 

'Seke qatil ma bê wina nêzdî benê'

 

Pîyê Gulistane Halit Doku dîyar kerd ke seba dîyayîşê Gulistane çi destê înan ra bêro do bikerê û vat: "Polîsan da ma ro, wexto ke ma nêweşxane doktoran vat, çîyêk şim açin o. Labelê seba dejê ganê xo ma nêeşkayî rakoyê. Polîsan nêverda ma otele ra vejîyê. Ma waşt ke ma şêrê Wezaretê Dade la destûr nêdayî. Seke qatil mabê wina nêzdî bî. Heta ke ma bi Wezîrê Dade dir pêvînayîş nêkerê ma tîya ra nêşinê. Ma bimirê zî, xo biveşnê zî ma tîya ra nêşinê. Ganî ma bi Wezîrê Dade dir pêvînayîş bikerê. Parlamenterî vanê ke eke bêro waştiş, sey Dêrsimî kênaya şima bêro vînayîş. Demo ke mêşine ma kewtêne çêrnayîş, leşkeran veng dayîne keya û vatêne şêrê mêşine xo bîyarê. Cayêk wina de kênaya mi vînî bî. Qey suc o ma kênaya xo gêrenê. Ma kênaya xo teslîmê dewlete kerd. Ma bizanayîne cayê aye asayîş nîyo, ma do nêşawitêne. Ma wazenê bi Wezîrê Dade dir qisey bikerê. Ganî hayeyê dewlete kênaya mi rê bibo. Kênaya mi wargeh de mendêne û her ca de selahîyetdarê dewlete bibî. Amed ra heta tîya seba ke ma wezîrê dir pêvînayîş bikerê ma ameyî. Çira nêverdenê pêvînayîş bêro kerdiş? Yan do verdê ma bi wezîrî dir pêvînayîş bikerê yan zî ma do xo biveşnê. Ma tena kêna xo û edalet wazenê. Eke ciwîyena ma kênaya xo, eke nêciwîyena zî ma esteyê kênaya xo wazenê."