Şehrîban Aslan

 

AMED - Endama Meclîsî ya Cinîyanê Dîlokî Sûzan Ûzpak diyar kerd ke, Dîlok de dest bi hadrekerdişê 8ê Adare kerdê û wina vat: "Ma sey Meclîsê Cinîyanê HDPyî, sey her 8ê Adare do reyna bi veng, deyîran û govendanê xo meydanan de bê. Ma do bibê vengê Denîz Poyraze, Aysel Tugluke û Emîne Şenyaşare."

 

Tirkîya de û şaristanê mintiqayî de startê bernameyê 8ê Adare ya Roja Cinîyan ê Dinyayî ame dayîş. Cinîyan her şaristanî de planê xo kerdî û bi coşê 8ê Adare pabeyê û Dîlok zî yew nê şaristanan ra yo. Endama Meclîse ya Cinîyan ê HDPyî yê Dîlokî Sûzan Ûzpak da zanayene ke pêwa heme tehdayan do 8ê Adare bi coş pawebê.

 

'Tewr zafêr cinî û tutî bi tesîr bênê'

 

Sûzane dîyar kerd ke Dîlok vera sanayîyê xo şaristanê karkeran o û vat cayê ke feqîrî ci de nîno vînayîş zaf kemî yo û wina malûmat da: "Dîlok asasî de profîlê welatî yo. Cîyayîyê mabênê merdiman zaf zêdeyêr bîya; zengînî zafêrî zengîn bîyê, feqîrî zî zêdeyêr feqîr bîyê. Ganî ma cinî zî cîya bifikirê. Coka ke ê ke tewr zafêr krîzê ekonomî ra tesîr benê cinî û tutê. Wextê krîzê ekonomî de humare ya karkeranê tutan zêdeyêr bîye. Wexto ma sanayîya Dîlokî bidê verê çiman hûmare ya tutanê karkeran zaf zêdeyêr a. Reyna wextê krîzî de ê tewr zêdeyêr kar ra yenê vetişî cinî yê. Xeylêke cinîyê ke xebetênê, asayîşê înan çin o. Sewbîna cinî teber de xebetênê zî keye de bar reyna serê kiftanê înan de yo."

 

'Hetkarîya cinîyan nîna vînayîş'

 

Sûzane vat ke krîzê ekonomî esto, coka nêeşkenê welat îdare bikerê û wina beyan kerd: "Cinîyî keyeyê xo de seke karê viraştişê telikan, derzinayîşê solan, şikitişê gozan û findiqan kenê. Hamnanî wareyan de holikê cinîyan estê. Heme bi destqezencê tay hende xîret danê paştdayîşî bidê butçeyê keyeyî. Keye de zî seke ke bêçareyê  mêrdeyî rê xizmet bikerê, xebetênê. Pêwa nê, keda înan nîna vînayîş."

 

'Problemê pîlî multecîyê cinîyî ciwîyenê'

 

Sûzane, dewamîye de bale ante serê problemanê ke multecîyê cinî ciwîyenê û vat Dîlok şaristanêk multecîyan o û nê çîyî îzah kerdî: "Netîceyê polîtîkayê şaşîyan de problemêko tewr pîl multecîyê cinî ciwîyenê. Tirkîya babeta multecîyan de  çi heyf ke sinife de menda. Ma eşkenê vajê na rewşe tewr zêdeyêr Dîlokî de yena vînayîş. Cinîyê multecîyî karo ercan de û xerab de yenê xebetnayîş. Fuhûş ro cinîyan ferz kenê. Sey cinîya diyîn ci dir zewejênê. Emrê tutîtîye de zewejênê. Sewbîna tena nê zî sînorî nîyê. Nê problemî heme xo dir rijnayîşê psîkolojîkî zî anê. Vera ke polîtîkayê başî nînê ca, nê problemî pîl benê."

 

'Serê cinîyanê HDPyî de polîtîkaya tehdayî'

 

Sûzane bale ante serê polîtîkaya tehdayî ya hemverê cinîyanê HDPyî û nê çîyî qal kerdî: "Dosyayê ke embazê ma yê HDPyî ci ra ameyêne muhakemekerdiş bîbî. Seba 50 embazanê ma 6 serrî ra destpêkenê ke ceza ameyê birnayîş. Cezayê ke ameyê birnayîş tesadufî nîyê. Dîlokî de sewbîna şîdet û qirkerdişê serê cinîyan  babeta vatişî ya. Ganî serebûtê întîxarî û şîdetî hetê dewlete ra bêro cipersayîş. Dewlete bêçareya vernî ro nê bigîro. Duştê nê polîtîkayan de têkoşînêk xurt yê cinîyan esto. Çiqas ke ma vernîyê vindertişê Pêkerdişê Stenbolî nêgirewtib zî îqtîdarê ke ma ra terseno esto. Ma caardişê Platformê Cinîyan ê Demokratîke ya Dîlokî yê. Ma heme caameyê qewetê xo reng û cîyayîşê xo ra gênê."

 

'Ma do bi tewirêke xurt pawebîyayîş bikerê'

 

Sûzane wina peynî ci rê ard: "Ma do 8ê Adare Roja Cinîyan ê Dinyayî bi tewirêke xurt pawebîyayîş bikerê. Ma do 8ê Adare bi şuûrîya cinîye pawebîyayîş  bikerê. Ma xurtê, ma estê û ma tîya de yê. Ma sey Meclîsê Cinîyan ê HDPyî, sey her 8ê Adare do di nê 8ê Adare de zî bi veng, reng û govendanê xo meydanan de bê.  Ma do bibê vengê Denîz Poyraze, Aysel Tugluke û Emîne Şenyaşare. 6ê Adare de saete 11:00î de Plaza Çîçeke de do kongreya ma bibo. Ma 8ê Adare de saete 18:30î de sey Platforma Cinîyan a Demokratîke, Kirkayak de ma do bêrê têhet û rayîrşîyayîş bîyarê ca.  Ma heme cinî pabeyê rayîrşîyayîşîyê."