Rojda Aydin

 

ŞIRNEX - Hacetê Hemserekê Meclîsê Şaran ê Cizîrî Mehmet Tûnç ke bodrumê Cizîrî de amebi qetilkerdiş, dimayê 6 serran dima teslîmê keyeyê ci kerdî. Dayika ci Esmer Tûnç, reaksîyon vera rewşe da û wina vat: “Demo ke eşyayê Mehmetê mi ardî, seke cenazeyê ci ardî. Dejê zerrîya mi reyke bîn newe bi. Sewbîna lajê mi Mehmet û Orhan na menge de ameyî qetilkerdiş. Hacetê ci zî na menge de ameyî teslîmkerdiş, tesaduf nîyo.”

 

Qezaya Cizîrî ya Şirnexî de mabêne serran ê 2015-2016ine de, qedexeyê tebervejîyayîşê kuçeyan de 177 bodruman de û bi pêroyî nêzdîyê 300 kesî amebî qetilkerdiş. Yew nê kesê ke ameyî qetilkerdiş Hemsereka Meclîsê Şaranê Cizîrî Mehmet Tûnç bi. Ser de qedexeyê tebervejîyayîşê kuçeyan de 6 serrî derbas bi, dima ra polîsan 18ê Sibate de “kompîtir, qasayê kompîtirî û hîn îmajê compîtirî” teslîmê keyeyê ci kerdî.

 

Sewbîna qedexeyê tebervejîyayîşê kuçeyan de kesê ke ame qetilkerdiş Agît Akilo 16 serrî bi. Swêterêk, pantorêk û kemberêk yê perçekerde û veşnaye bi pêwa 52 lîre û 75 qirûş pereyê ci 11ê Çeleyî de teslîmê dayika ci Guler Akil kerdibi.

 

Dayîka Mehmer Tûnç, Esmer Tûnç û mêrdeyê ci Zeynep Tûnç, çîyê ke ameyî ciwîyayîş qebûl nêkerdî û vatî reyke bîn birînê înan ameyo newekerdiş.

 

‘Dimayê 6 serran hacetê Mehmet ardî’

 

Esmer Tûnç, dîyar kerd ke polîsan vernîya di rojî verê eşyayê Mehmet Tûnç teslîmê înan kerd û wina vat: “Mehmet û birayê ci Orhan qetil kerdî û destûr nêdayî ma birînê xo derman bikerê. Hukmat her tim birînê zerrîya ma newe keno. Demê şerî de vernîya ke keyeyê ma biveşê, nê eşyayê ci keyeyê vetê û dima ra adir eştî keyeyê ma û veşnayî. O wext heme çîyê ma veşnayî û bi tena dest dabî serê hacetê Mehmetî. O wext tu çîyêke ma nêmend, heme veşnayî. Serê qirkerdişî de 6 serrî derbas bi, la hema newe hacetê lajê mi ardî. Bi 6 serrî yo hacetê lajê mi destê înan de bî. Hema newe hacetê ey ardî. Demê hacetê Mehmet ardî, sey ke cenazeya Mehmetê mi ardî. Hacetê Mehmet ardî verê mi û vatî, ‘Hacetê Mehmet Tunçî yê.’ Mi înan ra vat, înan rê se bikerî. Mi ra vatî, ferman wina ameyo nuştiş û vatî, sereyê şima sax bo. Vernîya hîrê mengî zî zarfêk ame keye û vatî, 50 mîlyar deynê Mehmet esto. Vernîya serrêke seba ke mi vato Mehmet şehidê Kurdistanî yo, derheqê mi de cipersayîş akerdî. Her rey birînê zerrîya ma newe kenê. Dimayê 6 serran ewro hacetê lajê mi ardî û reyke bîn birînê zerrîya mi newe kerdî. Demo ke mi nê eşyayê Mehmetî dî, seke cenazeya ci ardî.”

 

‘No tesaduf nîyo’ 

 

Esmere wina vat: “Gelo ê kerr ê, çira ma nêeşnawenê. Çira hemverê ma hende zilm û zordarî rê bêveng manenê. Ma vanê êdî bes o. Bes o birînê zerrîya ma  kûr kenê. Çira nê zilmî ma dayikan rê kenê. Demo hacetê Mehmetî vînena birînê zerrîya mi tewr kûr beno. Ez o tu wext nê rojan xo vîr ra nêkena. Heta ke ma sax bê birînê ma sax benê. Birînê ma kûr ê, dermanê ci çin o. Tutê ma bi zanebîyayîş ameyî qetilkerdiş, la no qîmê înan nêkeno. Menga Sibate mengêke sîya yo. 7ê Sibate de Mehmet, 13ê Sibate de Orhan ame qetilkerdiş û 15ê Sibate de zî Serek teslîmê Tirkîya ame akerdiş. Na menge de hacetê Mehmetî mi ardî, la no tesadûf nîyo. Waştî birînê zerrîya ma gane bikerê. Serrgera menga înan de nê ameyî kerdiş tesaduf nîyê.”

 

‘Destûr nêdanê ma dejê zerrîya xo sax bikerê’

 

Cinîya Mehmet Tûnç, Zeynep Tûnç zî seba dimayê 6 serrî hacetê mêrdeyê ci ardê înan rê reaksîyon ramojna û vat: “Ez balqone de bîya. Dayî berê ma ro û polîsan poşetêk da. Vatî, Zeynep Tunç ti ya, mi vat, belê. Vatî, ma hîn hacetê Mehmet Tunç ard. Demo wina vatî dest û lingê mi ricifyayî û nêzana bi mi sebi. Mi înan ra vat, 6 serrî vîyart şima hema newe hacetan anê. Demo ke nê hacetan ardî birînê zerrîya ma kûr kerdî. Xora ma înan qet nêkenê xo vîr ra. Her rey bi çîyêk birînê zerrîya ma newe kenê. Heqê înan çin o birînanê ma newe bikerê. Ma hewl danê ke birînê xo sax bikerê, la ê kûrtir kenê. La ê se kenê wa bikerê ma do dimayê şehîdê xo bî. La demê nê hacetî ardî ma xeylêk xemgîn bî. Dimayê çend serrî dima hin cilan teslîmê keyeyan kenê. La hîn cenazeyî teslîmê keyeyê înan nêameyo kerdiş. Eke nê cilê înan bê, cenazeyê înan ça de yo. Dewlete destûr nêdana ma dejê zerrîya xo sax bikerê.”