Melîke Aydin

 

ÎZMÎR - Cinîyan reaksîyon vera raporê ATKyî ke derheqê sîyasetmedara kurde Aysel Tugluke de vatî, ‘eşkena tepişte bimano' dayî û dîyar kerdî ke qerarê sîyasî yo û sîyasetê nefretî yeno kerdiş. Cinîyan dîyar kerd ke ganî divê seba tepişteyê nêweşî û Aysele her kes bikewo mîyanê tevgerî.

 

Sazgehê Tipê Edlî (ATK) reyke bîn derheqê sîyasetmedara kurde Aysel Tugluk Zîndanê Tîpê F yê Hûmara Yewî Kandirayî de manena û teşhîsê demansê ci rê ameyo dayîş, raporê ‘eşkena zîndan de bimana’ da. Pêwa ke derheqê nêweşî de rapor û dayeyê Tibî estê zî Aysele nîna tehliyekerdiş û reaksîyonê cinîyan do vera nê dewam bikero. 

 

‘ATK qerarê sîyasî dano’

 

Hemsereka Komeleya Huqûqnasê seba Azadîye (OHD) ya Îzmîrî Şukran Ozturk bale ant serê raporê ATKyî û vat: “Hem seba Aysele hem seba tepişteyê bînî nêweşîyê înan bi hawayêke zelal eşkeno bêro vînayîş û bêro vatiş. Seba tepişteyê di destê înan çin ê, felc ê zî raporê eşkenê bimanê danê. Pêwa ke problemê nêweşîya tepişteyan zaf eşkera werte de ya, raporê ATKyî yê eşkenê zîndan de bimanê zî problemêko cidî yo. Bêguman nê qerarî sîyasî yê. Ganî etîk û sondê hîpokratan merdim bîyaro vîrê doktoran."

 

‘Ganî berê rayaumumî ya mîyanneteweyî’

 

Şukrane dewam de wina vat: "Heqê cuye, heqê azadîya tepişteyê nêweşan yeno binpaykerdiş. Ganî na babete de sazgehê komelê sivîl, baro û sazgehê bîn bikewê mîyanê tevger û na babete berê rayaumumî ya mîyanneteweyî.”

 

‘Gelo wazenê zîndanan de bikişê?'

 

Fatma Surme çalakîya ‘Nobeda Edeletî’ seba tepişteyê nêweşan ameya destpêkerdiş de ca gêna wina vat: "Tepişteyî binê tecrîdêk giran de yê. Aysel Tugluk bi qasê ke avûkatanê xo nas nêkena nêweş a. Ganî bêro veradayîş. Wa tepişteyê nêweşan êdî vera bidê. Înan ra çi wazenê. Wazenê înan bikişê gelo? Kezeba dayîkan veşena. Ma nêwazenê cenazeyî zîndanan ra vejîyê."

 

‘Nê polîtîkayê nefretî yê’

 

Vervatoxa Meclîsê Cinîyan ê HDKyî Newroz Çelîk zî wina vat: “Ê zî zanê ke Aysele nêweş a. La nêvanê. No polîtîkayê nefretî yo. Ma şermezar kenê. Bahaneyê qerarê bêhuqûqîyê merdiman awan nêkerdê. Ca nêdayê pawitişan, ca dayê sûcdariyan. La sûcdarî zî heme kayê înan ê. Yê raporê ‘eşkenê tepişte bimanê dayî' bî sebebê xeylêk canî. Ma wazenê ganî Aysele bêro veradayîş."

 

‘Seba tepişteyê nêweşan edalet’

 

Hemsereka HDPyî ya Konakî Azîze Çelebî dîyar kerd ke ê seba Aysele edalet wazenê û wina qedêna: "Ma nêwazenê Aysel Tugluk tepişte bimnao. Semedo ke nêweş a. Tirkîya de edalet çin o. Ma seba pêro tepişteyê nêweşan edalet wazenê."