Derya Ren

 

AMED - Semîre Dîrekçî ya ke lîsteyê tepişteyan ê nêweşê giranan de ca gêna, ganî lezkî bêro tehlîyekerdiş. Avûkata ci Adîle Salman vat rewşa aye her ke şina giran bena û 25 serrî yo tepişteya, nê prosesî de 8 reyî emelîyat bîya. Adîle vat vera şertê  zîndanî dir rewşa aye roj bi roje giran bena.

 

Goreyê doneyê ÎHDyî  hezar û şeşsey û panc tepişteyê nêweş ê giranî estê û ganî bêrê tehlîyekerdiş. La bi raporê ATKyî tehlîyekerdişê tepişteyan yeno manîkerdiş. Keyeyê tepişteyan duştê nînan de Amed,  Wan û Stenbol de çalakîya 'Nobeta Edaletî' dayo destpêkerdiş û 4ê Çeleyî ra zî Anqara de ame destpêkerdiş. Keyeyan, dosyayêka 11 rîpelan ra û 6 sernameyan ra ameya ca, teqdîmê partîyanê sîyasî û STKyî kerd. Dosya de lîsteya ke 38 tepişteyê nêweşî yê ke ganî lezkî bêrê veradayîşî estîbî. Yew ê tepişteyanê nêweşanê giranan ra Semîre Dîrekçî ya.

 

Avûkata Semîre, Adîle Salman derheqê babete de qisey kerd.

 

'Rewşa tepişteyan giran bena'

 

Adîle da zanayene ke, tepişteyî babeta xoresnayîşê xizmetê weşîye û sewqkerdişî de problemê cidî ciwîyenê û sewbîna bi keyfî  kelepçeyî yenê ferzkerdiş, dermankerdiş kelepçeyî dir  ferz kenê, dimayê ke nêweşxaneyan ra agêrenê seba 14 rojî fînenê karantîna û sewbîna bi keyfî karantînayî yenê dergkerdiş. Adîle wina behs kerd: "Odayê karantînayî pakî nîyê. Tepişteyî coka ê nêwazenê şêrê nêweşxaneyan û dermankerdişê xo taloq kenê. Vera şertê  nêhîjyenî rewşa tepişteyan giran bena. Tepişteyê nêweşî problemanê cipersayîşî yê şexsî û tedbîrê pawitişî ciwîyenê. Vera werdena xirabe, bêvîtamînbîyayîş û lîşinîyî heme tepişteyî probleman ciwîyenê. Çiman de problemî, vindîkerdişê sîstemê xopawitişî, nêweşîyê janî û rijnayîşê porî, gonîbîyayîş, birînî û şikitişê nenûkan ciwîyenê."

 

'Werdo ke baş nîyo danê'

 

Adîle eşkera kerd ke aşîyê grîbî, hepatît Byî, tetanosî qet nînê kerdiş û tepişteyê vejeteryanî zî îmkanê înan ê werd tercîh bikerê çinî yê û vera kemanîya vîtamînan nêweşîyî vejîyenê meydan.

 

Adîle bale ante serê rewşa Semîre Dîrekçî ya 25 serrî ya tepişteya û vat: "Semîre 20 serrî yê xo de yena tepiştişî û nêweşîya aye zîndan de vejîyena meydan. 25 serrî de 8 reyî amelîyat bîya. Nê  2 serranê dimayî de hîrê reyî roqelayê aye ro yewbînan gêrayê û xetemîyayê. Sewbîna nêweşîya tansîyonê berzî, xerepnayîşê  rîtmê zerrî,  mîgren, guatir û alerjî/ şaplore  zî estê. Rehmê aye de kîst esto. Fitiqê gerdanî esto. Hekîman vato 28 rojan ra reyêke ganî derzenî bêro kerdiş. Vera dermankerdişê aye baş nêameyo kerdiş, çimê aye yo rast se ra neway û panc(%95) vînayîş, vindî bîyo. Ganî Semîre werdişo wuşk nêwero. Ganî çîyê awinî bi diqet biwero. Pêwa nê roqelayê aye xetemênê. Şorbaya menû de hadreya, a zî başe nîya. Ganî ispenax, pirpar û tewirê şorbayan biwero la çi heyf ke, nê çinî yê."

 

'Şertanê giranan de menda'

 

Adîle vat ke wexto Semîre neql kenê beşa lezkî ya nêweşxaneyî ke dimayê rontgenî gonî îdrarî yena, kenê odeyê muşahîdî û vat: "Wexto rakewtişê aye kenê zî, fînenê qawîşa tepişteyanê nêweşxaneyî. Tedawîya ci Nêweşxaneyê Cigêrayîşê Perwerdeya Gazî Yaşargîla Amedî de, qawîşa tepişteyan de yena kerdiş. Na qawîşe zî verê morge de ya, pacaya ci çinî ya. Klozet,  hemam,  lawabo verê yewbînan de yê. Semîre coka nê şertan nêwaşto tedawîya ci temam bibo û vejîyawa."

 

'Ganî rojêke de hîrê saetan rabikewo'

 

Adîle peynîyê qiseyanê xo de ard ziwan ke Semîre 2 reyan beşa giranî de menda û di nê prosesî de destê aye ameyê kelepçekerdiş û tewr peynî hîrê mengî verî beşa giranî de menda û wina peynî ro ci ard: "Şertê qawîşa tepişteyan ê nêweşxane ya fakulteyî goreyê şertê nêweşxane ya cigêrayîşî başêr a. La nêweşxane ya  cigêrayîşî pêwa rîskê ciwîyayîşî, tepişteyan sewqê fakulteyî nêkena. Red kena. Wexto Fakulte ya Tibbî ya Unîversîteya Dijleyî de emelîyat bî, coka hesabê aye de pere çinîbî, nêeşkabî awe zî bişimo û awa ke keyeyî tever ra ci rê arda zî qebûl nêkerdo. Heto bîn ra ganî Semîre rojêke de hîrê saetan serê payan de bigêro. Seba nê ganî cayê ciwîya aye verhîra bo. Seba bedilnayîşê odeyî vera nê semedî muracat kerdo ci rê bi qerarê heyetî cipersayîşî no ameyo redkerdiş. Ganî Semîre lezkî şert û mercê aye verê çiman de bêro girewtiş û bêro tehlîyekerdişî."