RIHA - Nobeta Edaletî ya Emîne û Ferît Şenyaşarî verê Edlîyeyê Rihayî de roja 347ine de domnena.

 

Çalakîya Nobeta Edaletî ya ke Keyeyê Şenyaşarî verê Edlîyeyê Rihayî de dayo destpêkerdiş, roja 347ine de dewam kena. Nobeta ke Maya Emîne Şenyaşar ke vera acizbîyayîşê xo nêeşka bêro cayê xo, Ferît Şenyaşar domneno.

 

'17 dewayî ameyê akerdiş'

 

Ferît Şenyaşarî dîyar kerd ke, nobeta xo dewam kenê, pankartê peynîyê xo mojna ra û wina vat: "Ma têkoşîna xo mîyanê sînorê huqûqî de kenê. Duştê nê yewî de mudurîyetê polîsan derheqê dadîya mi de 13, derheqê mi de zî 4,  pêro 17 dewayî akerdê."

 

'Wa êdî edalet bêro, no zilm wa peynî bibo'

 

Ferîtî behs kerd ke  wexto seba îfadeyan şîyê, nê bêhuqûqî û bêedaletîyî  persêrî ra û mudurîyetê polîsan ra zî vatê û wina qisey kerd: "Persêr û mudurîyetê polîsan ma ra vanê 'şima heqdar ê la ma goreyê fermanê ke  ma rê yenê hereket kenê, ê karê ma nîyê'.  Her cayê Tirkîya de  merdimî dewaya ma teqîb kenê. No şermê huqûqê Tirkîya yo. Wa êdî edalet bêro  û no zilm wa peynî bibo."