Medya Uren

 

AMED - Parlementera HDPyî ya Amedî Remzîye Tosûn têkilîyê hêrişê di şexsîyetê Rayberê PKKyî Abdullah Ocalanî de serê şarê Kurdî û cinîyan de yenê kerdiş erjna û vat: "Cinî benê hêzê azadîye. Seserra 21î de bi şorişê ma yê ke Sêvê û Sakîneyan ra ma dore girewta têkoşîn kenê. Şengal, Rojawan, Mexmûrî de û her çar perçeyan de cinîyan sere çewtîye nêkerdo û komele zî ci dir sere çewt nêkerd. Ma potê sîyayî serê xo ra eştî, ma têkoşîn de resenê tîtikî û ma cinî do tecrîdî zî biancê."

 

Dewleta Tirkîya û komê girêdayeyê ci hêrişê xo yê serê Rojawanî, Mexmûrî û Şengalî de domnenê û di eynî wextî de hêriş benê serê destqezencê cinîyan. La duştê hêrişan de her tim cinîyanê Kurdan serewedaritişê tarîxî dir bîyê verpers. Rojawan, Mexmûr, Şengal û her cayê Kurdistanî de cinî şoriş dayo destpêkerdiş. Parlementera Partîya Demokratîke ya Şaran (HDP) ya Amedî Remzîye Tosûn têkilîyê hêrişê serê Kurdistanî û cinîyan de yenê kerdiş erjnayîşê xo pare kerd.

 

'Cinîyê Kurdan benê numûneyê azadîye'

 

Remzîye Tosûn dîyar kerd ke lazim o ke, ê semedê nê hêrişan seyr bikerê û wina vat: "Eke ma  erjnayîşan û şîroveyanê Birêz Abdullah Ocalanî seyr bikerê ma do bivînê ke asasê azadîye û çarevînayîşê meselayê Rojhelatê Mîyanênî azadîya cinî de vîneno û seba ci zî hewl dano. Xora timî zî ano ziwan û vano azadîya komeleyî azadîya cinî dir mimkun a. Sere ra zî cinîyê Kurdan şorişêko pîl ardo ca. Ewro zî cinîyê Kurdî, ê serewedaritişê xo resinayê tîtikî û cinîyanê dinya rê benê nimûneyê azadîyî. Êdî na seserre,  seserra cinîyan a. Kesêke nêeşkeno vernîyê cinîyan bigîro. Cinî seba qalibê mêrdeyê îqtîdarî ra ke înan rê awan kerdo bixelesîyo, têkoşînêkê bêmabên de ya û pêl bi pêl tora xo pîl kena."

 

'Şorişê cinî îqtîdarî rê bi ters'

 

Remzîye bale ante serê hêrişanê îqtîdarî û vat: "O yo ke îqtîdarî fîneno mîyanê tersî û gumanan zî,  no serewedaritişê cinîyan o. Ê qalibê sîstemî ke ardê meydan yew bi yew rijîyeno. Wexto cinî vernîyê îqtîdarî de sereçewt nêmano, do komelêka sereçewtkerdene nêmano. Eke ma tarîxê îqtîdaran ra û xusûsî zî îqtîdarê Tirkîya seyr bikerê ma do bivînê ke di her tengasîyêke ke duştê hêrişê xo yê serê şarê Kurdî de pîlêr kena. Nê hêrişan de zî sere de cinîya Kurde hedef yena girewtiş. Senîn ke Rojawan û Şengalî de cinî ameyî hedefgirewtiş û qirkerdişêke dir derbas bî no 40 serrî yo zî Tirkîya de eynî hêrişî serê cinîyanê Kurdan de yenê kerdiş. Coka nê semedî ra, ma ê hêrişan cîya nêvînenê. Cinîya Kurde her çar perçeyan de zî binê tehdîdî de ya. Wazenê ê serewedaritişan bitefinê. Cinîya Kurde sîyasetî ra û şorişê ra dûrî bifînê."

 

'Ma sîyaset binê zehmetîyan de kenê'

 

Remzîye dewamîyê erjnayîşê xo de wina dîyar kerd: "Seba cinîya esîre awan bikerê, muracatê ro heme metodan kenê. Ma ewro seke parlementer yan zî heme sîyasetmedarê cinî yê Kurdan binê zehmetîyan de sîyasetê demokratîke  kenê. Îqtîdarêko ziwanê ma rê zî tehemûlê înan çinî yo, vernîyê ma de yo. Seba tewirbîyayîşê çalakîyan, şîyayîşê dewan, konserê ke ci de deyîrê Kurdkî yenê vatişî fezlekeyî ameyî hadrekerdiş. Seke tehdîdêke, ê fezlekeyan verê destê xo de verdenê. No hêrişêke yo hemverê heme şarê Kurdî de yo. Seba tersnayîşî,  eciqnayîşî û çinîkerdişî nê çîyan kenê. Ez dewêke de tewirê çalakîyêke ci de deyîrê Kurdkî ameyêne vatiş ke bîya, nê semedî ra  fezleke mi rê hadre kerdê. No tena hemverê mi de nîno kerdiş. Seba Kurdbîyayîşî û sîyasetê Kurdan sîya bikerê kenê."

 

'Azadîya cinî do meseleyan meydan ra wedaro'

 

Remzîye bale ante serê hêrişanê Tirkîya ke serê cinîya Kurdî de danê kerdiş û wina qisey kerd: "Bi seyan hemrayê ma yê sîyasetê demokratîke kerdê, zîndanan de yê. Nêwazenê cinîyanê hêzdaran bivînê. Hemverê înan de zî her tim hewl danê bibê manî. Sîyaseta cinîya Kurdî ke fînaka ci ya yewin zî  TJAyî  kenê hedef. No tesîrê xo tena serê cinîyê Kurdî de  nêkeno. Bi polîtîkayê ke danê kerdişî dir heme cinîyan tesîr kenê. Semedê krîzê komele; sîyasî û ekonomî zî nê dir girêdaye yo. Her roje cinîyêke yena qetilkerdişî. Ganî ma bizanê qetilkerdişê cinîyan şerê pîlî ra xirabêr o. Lazim o ke ma asan nêgîrê dest. Eke heqê cinî bêro naskerdiş û heqê Kurdan bêro naskerdiş, do krîzo bîyaye yew zî nêmano. Do safîkerdiş nê dir mimkun bo."

 

'Tecrîd duştê azadîya cinî û şarê Kurdî yo'

 

Remzîye da zanayene ke, tecrîd duştê azadîya cinî de û şarê Kurdî  de yo û wina vat: "Yew meseleyêke ra tewr zafêr tesîrî ro komele keno zî tecrîdê serê Birêz Abdullah Ocalanî yo. Coka tecrîd sere de tesîrê xo yo tewr pîl serê cinîye de keno. Bi şorişê azadîye ke Birêz Abdullah Ocalanî dayo destpêkerdişî dir cinîyan potê sîyayî serê xo ra eştî û hewl danê ke xo newe ra pêbîyarê û xo organîze bikerê. Ma fînaka nê zî tewr peynî Rojawan de vîna. Seke ma vernîyê nika zî dîyar kerd ke, her îqtîdar ke serê ma de ameyo sere, hêrişê destqezencîyê cinî û hêrişê bedenê cinî kerdo. Hêrişê DAIŞî de zî no ame ca. Xeylêk cinî ameyî qetilkerdiş, remnayîş û di bazarê êsîran de ameyî rotiş. Raşt o, seba ma cinîyan vindîbîyayîşêk pîlî bî. La belê duştê vindîbîyayîşan de serewedaritişê pîlî yê cinîyan zî ameyî ca. Ê dir zî projeyê Birêz Abdullah Ocalanî ke seba cinî Rojawan de rengê xo ramojna. Cinîyan gama ke ameya eştiş, Rojawan de avêr berda. Azadîya cinî dir azadîya komele mimkun kerdî. Coka tecrîdo ke yeno kerdiş, duştê azadîya cinî û azadîya şarê Kurdî de yeno kerdiş."

 

'Kes nêeşkeno roja ma tarî bikero'

 

Remzîye tewr peynî de bi nê vatişan peynîyê qiseyanê xo ard: "Cinî êdî benê xîretê azadîye. Seserra 21ine de bi şorişê ma Sêvêyan ra û Sakîneyan ra dewr girewto ma têkoşîne kenê. Şengal, Rojawan û Mexmûrî de, her çar perçeyan de cinîyan sereçewtî nêkerd û komele zî ci dir sereçewtîye nêkerd. Îradeyê şarê Mexmûrî 28 serrî yo xêrcê hêrişî, tehdîdî, talanî û polîtîkayê hêrişê xusûsî yê ewro zî serê payan de yo. Sewbîna her cayî de şarê  Kurdî û cinîya Kurde fek îradeyê xo û têkoşîna xo ra vera nêda. Do cinî tecrîdan bişikno û do komployî tal bifîno. Ma hewêna zî vanê, kesêke nêeşkeno  roja cinî û roja Kurdan tarî bikero."