RIHA - Çalakîya 'Nobeta Edaletî' ya Keyeyê Şenyaşarî 346 rojî de ya. Keyeyî ewro no mesaj da rayaumûmîye: "Ma îqtîdarî ra persenê! 346 rojî yo ma verê edlîye de yê, seba qanûnî bêrê  bizorkerdiş, şima do heta çi wext vinderê?"

 

Verîyê weçînayîşê 24ê Hezîrane ya 2018ine de qezaya Pirsûsî ya Rihayî de 14ê Hezîrane ya 2018ine de merdim û pawitoxê Parlementerê AKPyî Îbrahîm Halîl Yildiz hêrişê ferdanê Keyeyê Şenyaşarî kerdî û hîrê ferdê keyeyî qetil kerdî. Emîne Şenyaşar û lajê xo Ferît Şenyaşarî, seba dewa rê edalet bêro, 9ê Adare ya 2021î ra verê Edlîyeyê Rihayî de Nobeta Edaletî gênê. Nobeta Edaletî ya Keyeyê Şenyaşarî di roja 346ine de verê edlîyeyî de dewam kena. Emîne Şenyaşare ke coka ke nêweş, a nêameya nobete. Ferît Şenyaşar Pirsûsî ra ame verê Edlîyeyê Rihayî û verê pankartê ke ferdê keyeyê ey ke ameyê qetilkerdiş de, dest bi nobete kerd.

 

Keyeyî serê hesabê xo yê Medyaya Dîjîtale de no mesaj vila kerd: "Ma îqtîdarî ra persenê! 346 rojî yo ma verê edlîye de yê seba qanûnî bêrê bizorkerdiş şima do heta çi wext vinderê? Serdozgerîya  Rihayî @yeniçerionder bi tay merdiman bawer beno û sûc keno. Ê ke sûcê merdimîye kenê wa bêrê muhakemekerdiş."