Dilan Babat 

 

ANQARA - Hemsereka ÎHDyî ya Anqara Sevîl Turgut  vat, ganî ATK xo nêkero vera dadgehan û derheqê Aysel Tugluk de raporêk zanistî amade bikero. Vervatoxa Meclîsê Cinîyan ê HDPyî Anqara Zeyno Bayramoglu zî vat, doktorê ATKî şibiyenê doktorê Kampa Nazîyan.

 

Sîyasetmedara Kurd Aysel Tugluk ke zîndanê Tîpê Fyê Hûmara 1ê Cinîyan ê Kandirayê Kocaelîyî de manena, teşhîsê demansî ci rê amebi kerdiş û Sazgehê Tipê Edlî (ATK) 1ê Sibata 2022ine de reyke bîn raporê ‘eşkena zîndan de bimano' da. Vervatoxa Meclîsê Cinîyan ê HDPyî yê Anqarayî  Zeyno Bayramoglu û Hemsereka ÎHDyî ya Anqarayî Sevîl Turgut derheqê rewşa tepişteyê nêweşan  û Aysel Tugluk de ercnayîş kerd.

 

Huqûqê dişminî ra wetayêr o

 

Zeyno Bayramoglu dîyar kerd ke Aysele têkoşînê sîyasetê kurdî de yewin hemsereka cinîyan û tewrê ke xeylêk rey hêrişê ci ameyo kerdiş û vat: "Wexto ke newe ameye tepiştiş, zaf çîyê giran ciwîya. Ma şahidê nê yê. Têkoşînê Aysele îqtîdarî her tim nêrehet kerd. Nêzdîbîyayîşê îqtîdarî yê hemverê Aysele ‘huqûqê dişminî' zî çin o. Seba huqûqê dişminîyî zî hîn krîter estê. La çîyê hemverê Aysele sînor derbas kerdî. ATK û îqtîdar bi kêfî têgêrenê. Îqtîdar mecbûr o huqûq û desturê bingeyîn bikero."

 

‘Xoverdayîş nêwazenê'

 

Zeyno dewam de wina vat: “Ça de paştdayîşê cinîyan bibo, hêrişê uca kenê. Aysele û heme cinîyê kurdî zîndanan de bi hawayêke xurt serê lingan de yê. Pêwa rewşa xidar serberz ê. Îqtîdar wazeno têkoşînê cinîyan qels bikero. Seba nê zî zîndanan de hêrişê xo dewam kenê.  Qetilkerdişê Garîbe Gezer her çî nîşan dano. Xoverdayîş cinîyan înan aciz keno.”

 

Zeyno wina vat: “O wext helwestê hunermendan rayaumumî kerd dewre. Nika zî ganî ganî roşnvîr, hunermendî eynî berpirsyarî bigîrê û rayaumumî bikerê tevger. Paştdayîş îla bi grevê vêşanîye nêbeno. Îşkenceyê zîndanan her ke şino zêde beno. Ma dimayê 12ê êlule zîndanan baş zanê. Nika ma eynî prosesî de yê. No tena problemê ÎHD û HDPyî nîyo. Ganî her kes berpirsyarî bigîro serê xo."

 

‘Metodê huqûqî yê unîversal yenê binpaykerdiş'

 

Sevîle vat, goreyê dayeyêê ÎHDyî hezar û 600 tepişteyê nêweşî estê û înan ra zî 605 nêweşê giran ê. Sevîle wina vat: "Xeylê xo emrê înan pîl o. Şertê zîndana seba weşîye înan baş nîya. Aysel Tugluk pawitoxa heqê merdiman a. Îmkanê ke cuyêka cîya biciwîyo bibi la aye cuya xo da serê têkoşînê azadîya şaran. La nika huqûqê unîversal yeno binpaykerdiş û nîna tahliyekerdiş. Şexsê Aysele de huqûqê dişminî yeno caardiş."

 

‘ATK sey dadgeha xusîsî têgêreno'

 

Sevîle tewr peyîn wina vat: “Şexsê Aysele de heme cinîyê kurdî yenê cezakerdiş. Cinîyê têkoşînê heqê huqûqî danê yenê cezakerdiş. Seba rewşa xo ya sîyasî yenê tepiştiş. Eke huqûq bi ameyîne ca, nika yew zî zîndan de nêbi. ATKyî sey dadgehê xusîsî têgêrenê. ATK mecbûr o raporê zanistî bido. Doktorê ATKyî ganî xo nêkerê vera dadgehe û wina rapor amade nêkerê. Yanî bi pêroyî polîtîk ewnîyenê. Ma do têkoşînê seba tepişteyê nêweşî sey pawitoxê heqî, dewam bikerê."